Read Mousgoum Esaya 50 Bible Online

Esaya 50 - Mousgoum bible

Esaya 50

¹EPIƊ-ƊAI a na muɗa maini nɵa: Letre zi bidi na mu biditi emiki gaiɗi ɗa t'aŋ wata ɗa? Zaw, ɗif n’a tumuŋni aŋ mada, na mu siki edi tini burini ɗa asiya ɗa? E wiriki edi na ɗa burini meefeŋki, E birgiti emiki edi na ɗa, burini hi n’amai midini gadai na wiiki lai.

²Mu halasi a ya, amma mu nava ɗif kai, Mu yika, amma ɗif a ɵinaŋa kaalai koo Ta ɗa, te gulai, te gulai gara, te kiɗa aŋ plikisi edi kai ɗi? Gdaŋa a kiɗa aŋ plikisi edikai ɗa ɗi? Won hlai a na u ɓara yem-ra n’abai ɗa li ɗa, a huula amai; Rakai ɗa, mu bundaŋ aŋ basga na kaɗataŋ; Hilif na warni a hofa buri ɓa yem aŋ kai, a mra edi tiɗi sai lai.

³Mu wa gegeŋ sini hlai n’amai ɗa maini sapa ɵa, mu wa sak sini aŋ sapa zi tuwi lai.

⁴EPIƊ-ƊAI a saŋa aŋ muɗa seŋ maiɗi ɗai n’epin-gezaɗi a hitriɗi ya nɵa, kapai mu sɗa aŋ sa arai zi pi wiini ni n’aŋ gai kiyi su gaini seŋ na pɗem. Gorof gorof paŋ, a yimaŋa ɵima amai, a yiaŋa ɵima amai, kapai mu jiɓira seŋ maiɗi ɗa zi hitri nɵa.

⁵Epiɗ-ɗai Alaw a malaŋa ɵima edi, ta ɗa, mu faka amai sini kai, mu bla sa edi kaalai.

⁶Mu sa duba wiiɗi nagai n’e ɵiɓiŋa, mu sa galaia wiiɗi nagai n’e riwi muɗugi na ma edi ɗa; mu bunda ara edi wuzani tirki gaini teenek ɗa kai.

⁷Amma Epiɗ-ɗai Alaw a zina pa; Siyer a yimaŋa kai na ɗa buri hanɗa, mu siita ara kaŋ maini ahi-fuŋ granit nɵa, buri mu sɗa ya ɓa aga mu tika siyer kai.

⁸Ni n’asiŋka jreŋa edi ɗa, aŋ ɵima gobi, n’a firya a paŋa seŋ mada ɗa asiya ɗa? Zumu sariya gaiɗi marmu haw! n’a dara a bla edi sin jre na wiya ɗa asiya ɗa? A fakasi amai ma haw!

⁹Epiɗ-ɗai Alaw aga a luwaŋa ɗuwal, n’aga a rgaŋa war sariya ɗa asiya ɗa? Nagai n’e dirŋa kai ɗa paŋ aga e timsi edi maini sapa nɵa, masalam aga a limiɗi edi lai.

¹⁰Arbaki ɗa ɗif n’a sini hormo wiini EPIƊ-ƊAI lai, a ɵina mini ɵeŋni lai asiya ɗa? Asiya ɗi paŋ n’a na paya war gegeŋ, gaglai arni kai ɗa, a pɗem ɓa a tika hiinini midini EPIƊ-ƊAI, a pɵa midini Alaw na wiini lai.

¹¹Amma tiki paŋ na ki tiki afu pin hlai, na ki rgi siki amai gaini wazagai zi hatam n’a naɓa ɗa, hili arni afuki, warn waŋ z'au n’abai ɗa, gaini wazagai zi htam n’a naɓa na ki ziziniŋ aŋ tiki ɗa, hanɗa a wala na ta aga mu zaŋ siki ki mri li ɗa, ki simni na ɗa war gir.