Read Mousgoum Esaya 55 Bible Online

Esaya 55 - Mousgoum bible

Esaya 55

¹Tiki paŋ na sai te ziki, tili, yem an na, hilisi, koo, tiki na silai tiki kai, hilisi, wûri simi, simi, kadai. Hilisi, wûri sul gaini fiyaw gaini silai kai.

²Buri ma ɗa ki bi faraiki edi burini wala n’a siki simi kai? Aŋ siɗi gir war sda war wala n’a viki kai? Slini, ɵiniŋa haw, aga ki simi wazagai na pɗemai, aga ki nivi firiyi n’abai sini simi zi di na pɗem.

³Zigi ɵimaki hilsi sa, ɵiniŋa, nɵa lai aga ki simni karki, aga mu za gaiki bonu na vadakai, aga mu sa siki wazagai na pɗemai, na mu za ɵinini ha wiini David midini.

⁴Tili, mu zaŋ aŋ ɗif zi zaida na wiya siɗi ɗai, avut par mu tikaŋ aŋ pai zi ŋi na midiɗi ɗai kadai paŋ.

⁵Tala, Izrayel aga ku yikiɗisi pinziba na zamai, na ku siɗiɗi kai, ɗai na morkokai, zibaɗi ɗai zamai na e sɗiku kai, aga e rivisi suku, burini Epiɗ-ɗai Alaw na wiiku, nkam, burini Epiɗ-ɗai Alaw na sɗik na wiiɗi Izrayel, n’a sitiku abai na pɗem na wiini.

⁶Bindisi arki aŋ piyi EPIƊ-ƊAI, won hlai na tiyana ni a na hai, yikiŋ buri a na gob.

⁷Ɗif na tuwur a hiniti futini na mafini edi, ɗif na ɗikat kai a hina hiinini na meefiŋ edi lai, a wayasi sini EPIƊ-ƊAI, buri nɵa EPIƊ-ƊAI aga a hiina haw burini, sini Alaw na wiimu na sa ni burini tuwur abai gara.

⁸EPIƊ-ƊAI a muɗa: hiini na wiiki ɗai a wiya ta kai, futi na wiya te futi na wiiki kai.

⁹Maini mogoni hlai n’arbani afti gaini hlai n’amai nɵa, futiŋa a na gaigai gaini futi na wiiki, hiiniŋa a na gaigai gaini hiini na wiiki.

¹⁰Maini faŋ zi ɵi gaini wutiŋ zi yiki n’amai par, a vada walani nɵa aŋ za alam azumai midini afti kaalai, a ɓula seyem amai kaalai, ɗai kaw e nivi simi kaalai.

¹¹Buri nɵa, seŋŋa na niya edi war ma par a ɓa kadai kai, sai a za wala tetew, a va diriŋa amai, a za wala na mu ɵinaŋ midini lai.

¹²Aga ki niyi edi warɗi Babilon par gaini firiyi n’abai, aga ki hili ki sû a haki war ɵeɗ, war vigiki huwaŋai gaini hlai n’amai boŋor, aga a ɵiɓa tini gaini firiyi n’abai, luwoŋai na edi a basga lai aga a firiya lai.

¹³Kukub aga a diya kai, amma aga a diya ɗa a Sipre, kai tiɓ a diya a orties ɗa, aga a diya ɗa a myrte, hanɗa aga a za aŋ wala zi si kol wiini yikini EPIƊ-ƊAI, wala zi siŋki hanɗa aga a ɗala duk kai zaŋ.