Read Mousgoum Esaya 57 Bible Online

Esaya 57 - Mousgoum bible

Esaya 57

¹Ɗai na jrekai e nivi fiɗi n’edi, amma ɗif ktai na hina buriɗi aŋ kai, ɗai na e zi pɗem e vidi edi ɗif ktai n’a tika hangal buriɗi aŋ kai, nkam, ɗai na e gidi pini Alaw e vidi edi, buri meefiŋ na wiiɗi ɗai na tuwurai,

²amma ɵeɗ aga a halasi, buriɗi ɗai na e piyi payai na ɗikat, aga e nivi si zi mli war hlaiɗi zi kili weseŋ,

³Tûrisi won hlai hanɗa, aliɗi muni zi z'evek, zibaɗi muni zi zawar.

⁴Ki zini anya wiini asiya ɗa? Ki mili miki amai sini asiya ɗa? Ki hini a mini asiya ɗa? Ki siɗi ɓa ki ɗi ali na ki gidi kai kai ɗi, zibaɗi ɗai z'alesakai kai ɗi?

⁵Won hlai na ki cû li ɵimani luwoŋai n’abakai ɗa, hangalki paŋ a pra edi paŋ. Pin luwoŋai n’a na goɗa paŋ lai. Ki zi ɓaka gaiɗi aliki agoɗom wulani arakai, amlai war huduk na sini huwaŋai.

⁶Farani kriyitai na gilɓuwai n’agoɗom n’agoɗom ɗa paŋ, na wulani arakai zi yem paŋ ɗa a wiiku, tala, tala hanɗa a sdaku. Ku ma vin azumai aŋ ɓaka ɗa burini lai, ku siɗi wazagaiku aŋ wala zi yi lai. EPIƊ-ƊAI a zilba gaini hanɗa nɵa ɗa, agula te kiɗa aŋ nava firiyi woni ɗe?

⁷Amai midiɗi huwuni na muguwi, ku zizina hlaiku zi feŋ woni, woni ku ha amai, aŋ ka wala zi ɓaka.

⁸Dubani porte na mini hlaiku par, ku haga kopokaiku amai mini lew, war ŋoyai zi kuɗu haihai wuzani ara, ku foko sapakaiku na suku edi, ku ha amai, ku zizina hlaiku zi feŋ edi gaini futini,

⁹Ku girda emel suku, ku ɵiɓa yitir suku lai, kapai ku hala aŋ nava gaini pai n’abai, ku ɵiniɗi ɵeŋku edi won hlai na gaigai,

¹⁰Ku fuɗa was viya aŋ hala warɗi futi, ku kaya suku edi kadai meere, amma ku zilba suku kai, burini hili na kadai meere avut sek, ku nava gdaŋ zek, ku rɗa amai midini kayai ɗa

¹¹Asiya ɗa na kiɗa aŋ muluku hunai puku maini nɵa ɗa, aŋ wula muduku gaya, aŋ hiina mada kir kai, aŋ saŋa warku kir kai, ta lai mu sumna walaŋa hiyak, mu muɗa wala ktai kir kai, buri nɵa ku hunaŋa kir kai.

¹²Amma muta lai aga mu siŋka jreku edi, sdaku na ku zaŋ paŋ riba warni kir kai.

¹³Won hlai na ku ɗuula ɗuwal zi zinai, alawaiku na viya hanɗa aga e hilisi aŋ pluku edi. Simer aga a miliɗi kafa a hala gaiɗi, smer zi viviwi aga a dûgiɗi edi. Amma nagai na e piyi hlaiɗi zi ŋoyaiɗi ta, aga e niviti yai aŋ bulum, huwuŋ na sɗik lai aga te sa tiɗi aŋ wiiɗi.

¹⁴EPIƊ-ƊAI a nafu a muɗa: Futi ɗa ki ziziniti, witaw, ɵiti futi, warɗi futi n’a eziɗi ɗaiŋa, mili edi gaigai wazagai na azumai woɗi.

¹⁵Buri nɵa ni n’a na amai gaigai a na muɗa, ni na simnini a na haa hlai na vada kai, ni na yikini lai a na sɗik: muta, Alaw na sɗik, mu za simniŋa won hlai n’amai gaigai, amma muna gaiɗi ɗai na e kirpiɗi azumai, na agulɗi war kwimi, na e tili siɗi war sezeɗi gaini hûsi azumai, aŋ sa suŋfa wiiɗi nagai na murgakai, gaiɗi nagai na gaini hûsi azumai.

¹⁶Buri nɵa mu sumna gaini hiy kureɗ wuza sek kai, gaini suwar zizi kureɗ kaalai, ɓa nɵa kai, suŋfa na wiini wazagai paŋ na mu rgaŋ, a tuura edi kafa.

¹⁷Buri ɵiptini seŋ na wiiɗi Izrayel, buri milini wazagai zi gdaŋ, mu za hiy griŋ gara, mu ɵiɓiti, mu bunda ara edi siɗi, mu nafu gaini hiy gara, mu firiya mu tiliti wuzani ara kai zaŋ, te firiya te gada kai, te firiya aŋ tikiti futi na pini hiiniɗi agulɗi.

¹⁸Payaiɗi paŋ mu sɗaŋ kafa, buri nɵa tili vrak n’aga mu siŋɗi, aga mu zuliti, mu ɵa wuzaɗi lai, aga mu siɗi arai-zi-pi lai, ɗai ɗi n’e ɗa war tuwi nɵa lai,

¹⁹aga mu tika war miɗi yama zi firiyi. Sleɗ, ɵeɗ burini ɗif na na war hlai na gaigai, gaini ni na gobi lai, nkam aga mu zuliɗi ɗaiŋa, a muɗa hanɗa EPIƊ-ƊAI.

²⁰Amma ɗai na tuwarai e ɗa maini yem na ɵiɓa maiau amai, na tika azumai hiyak kai, maini yem n’a muguza, n’a burhuɗasi salte gaini dodoɓo amai.

²¹Sleɗ aŋ kai, buriɗi ɗai na tuwarai, a muɗa hanɗa Alaw.