Read Mousgoum Esaya 58 Bible Online

Esaya 58 - Mousgoum bible

Esaya 58

¹Ɗuula gaini gdaŋku, ku ɓa muku kai, maini fana zi piɵi nɵa, ɗuula gaini wulaku amai, siŋkiɗi wiiɗi ɗaiŋa gadkaiɗi ɗa, siŋkiɗi wiiɗi ɗai na war dalamni Yakob meefiŋɗi ɗa.

²War Mefeŋ paŋ e piyiŋa, e firiyi e siɗi wala na mu daraŋ siɗi par ɗa, maiɗi ziba na te gada gara pini jre nɵa, na hina zi na pini jre na wiini Alaw edi kai nɵa, e zilbiŋa kureɗ midiɗi ziɗi sariya na jre, e firiyi ɓa mu sumna kureɗ gobi gaiɗi.

³Gaini hanɗa paŋ e zilbiŋa ɓa: tikini sai pɗem n’aŋ warni a ma ɗa, won hlai na tuku ku tala wala hanɗa kai? Hûsini si n’azumai aŋ woni pɗem ɗa a ma ɗa, won hlai na tuku kusiɗa hanɗa kai? Nɵa mu wiyiɗi seŋ ɓa: nkam, war Mefeŋki zi tikini sai, a Mefeŋ na ki zi seŋki woni, ki ziɗi gir wiiɗi ɗaiki zi sda lai.

⁴Won hlai na ki tiki sai, ki sispi, ki ɵiɓi siki war hiy lai, Mefeŋ na wiiɗi saiki zi tiki, te na maiɗi Mefeŋ na wiiɗi sai zi tiki nɵa kai, won hlai na ki firiyi ɓa wulaki a ɵina amai.

⁵Sai n’agula te diriti te zaŋa maini nɵa ɗe, war Mefeŋ na ɗif a hosa sini azumai ɗa ɗe? zaw won hlai na ɗif a goɓa, a pa midini azumai maini faiai nɵa, a wa sapakai zi tuwi sini lai? Hanɗa a wala na mu yikiŋ ɓa tikini sai ɗe, zaw Mefeŋ na na ara pɗem ɗi?

⁶Tikiɗi sai na mu diriti gara te hanɗa: pli-n’edi na wiiɗi ɗai na gaini nigi sa, n’e zi wala ktai ma kaw kai, tiki n’edi na wiini galaŋ na gima, n’aŋ gaini tiki ta midini wulaɗi ɗa, sini pli-n’edi wiiɗi nagai n’e ɗi gaini kirpi azumai kafa pini eziɗi ɗai, gopni paŋ a pli-n’edi na wiiɗi ɗai, n’e ɗa gaini ɵi amlai war daŋgai.

⁷A ɓrawni simi gaini ni na wiyamai te zaŋ, a sini hlai zi simni war dalamku, wiini ni na hlaini zi feŋ aŋ kai, a ŋûyini ganala na wiini maiku, won hlai na ku talaŋ war ganala, ɗif gaini neŋsini maiku nɵa, aga ku dugiti agulku sini kai.

⁸Nɵa gaglaiku aga a siɗa edi maini hlai na gorof par nɵa, nɵa wurukku aga a nava zûli witaw, jreku aga te hala wuzaku, abai na pɗem na wiini EPIƊ-ƊAI aga te kuku puku.

⁹Won hlai na ku yika, EPIƊ-ƊAI lai aga a wuyuku seŋ, won hlai na ku zilba zinai tini, ni aga a muɗuku, muna halaɗi. Won hlai na ɓa ku ɗala edi zini bege war dalamku, zini gir na wiɗai, gaini miɗi na ɗewek,

¹⁰ɓa ku ɓuruwa simiku gaini ni na wiini aŋ kai, ɓa ku sa simi wiiɗi ɗai n’e ɗa war wiyamai, nɵa gaglaiku aga a ŋala war gegiŋ, duvuk na wiiku aga te bunda aŋ gaglai, gaglai hanɗa maini gaglai na war girvudi na marba nɵa.

¹¹Kureɗ EPIƊ-ƊAI aga a za aŋ zinai na wiiku, war basga na koloŋ tekeɗeɗi, EPIƊ-ƊAI aga a ɓukuku gaini wazagai zi simi viya, aga a suku gdaŋ, aga ku bunda maini jardin na kureɗ yem midini su nɵa, maiɗi kiliŋi na te liwa yem viya gara nɵa.

¹²Gaiku hlai n’a ho azumai ɗibar aga a riga amai, gaiku pini dalamai na gaini tûûri azumai tor, na rgi midini kai, aga ku zizinaŋ amai, aga e yikiku ɓa ɗif zi rigi hlai amai, ɗif zizini futi na war fuŋ.

¹³Ɓa ku ɗiya sdaku zizi paŋ war Mefeŋ na wiini Sabbat, aŋ ɗala wazagaiku zi zizini paŋ war Mefeŋŋa na sɗik, ɓa ku yika Sabbat, Mefeŋ zi firiyi zaw zi ɵeɗ, zaw Mefeŋ na wiini EPIƊ-ƊAI, Mefeŋ zi kol, ɓa Mefeŋ hanɗa ku zaŋ buriku aŋ Mefeŋ zi kol na wiini EPIƊ-ƊAI, aŋ ɗala suku lai burini sdaku zi zi paŋ,

¹⁴nɵa aga ku nava firiyi n’abai gara warni EPIƊ-ƊAI, aga mu tukuku warni saretai zi gaw, amai midini merfiŋni hlai paŋ, aga mu suku aŋ ɓiki afti zi blum na wiini Yakob, n’apuku. Nkam, hanɗa a wala na EPIƊ-ƊAI a za ɵinini ha midini.