Read Mousgoum Esaya 59 Bible Online

Esaya 59 - Mousgoum bible

Esaya 59

¹Zlaga zi ɓraw arbaki gaini Alaw Ki hiini ɓa tini EPIƊ-ƊAI te gulai gara buri te kûriki ɗi? Zaw ɵimani a ɵiniki kai buri a yim yim ɗi?

²Amma a tuwurki dama a tika ɵaga arbaki gaini Alaw, a tuwurki dama a ŋiyiki wuzani arni Alaw, gaigai edi gaigai gaini aŋ ɵiniki kai.

³Alini tiki aŋ gaini didiɓi gaini fel, miki a muɗa ales, a muɗa ginai lai.

⁴Ki ɗûûli midiɗi marki war jre kai, ki piyiti futi aŋ ziti sariya na jre kaalai, ki ɗiyi war seŋ na jre kaalai, ki rigi warki ɓak aŋ ziyi a zini meefiŋ, a wa edi an ahi a tuwur,

⁵halki aŋ maini eɵe na wiini wala-meefeŋ nɵa, won hlai na ɗif a limaŋli, a nava mri, won hlai na ɗif a kirpa eŋɵeɗi li ktai, te niyaɗi warni par te makai.

⁶Adûzi na wiiɗi a na buri hini sapakai kai, buri ŋoyai na wiini siɗi, amma sda na wiiɗi a sda zi meefeŋ, war tiɗi a zini sda zi fiɗi mok.

⁷A ziɗi a na kelek aŋ luwi pini tuwur, e pirmi buri mi edi felni ɗif na tini mini ta, hiiniɗi a hiini zi meefiŋ, warɗi futi na e vigi warɗi ɗaw, e hini dubaɗi a tuwi gaini ɓilki n’edi.

⁸Futi zi ɵeɗ nagai e siɗiti kai, warɗi futi na e hili warɗi ɗaw, nivini jre woɗi aŋ kai, futiɗi zi hili aŋ gaini ûrli, ɗif n’a tika futi piɗili a nava simni na ɵeɗ kai.

⁹Buri nɵa Alaw a bunda edi gaigai gaimu, a halasi aŋ zutumu jre kir kai, mu biyumu gizini gaglai, amma mu ɗumu ɗa arni gegiŋ sa, mu firiyimu ɓa gaglai a ŋala, amma mu hulumu ɗa war duvuk.

¹⁰Mu hulumu mu tupkumu sini hlai, maiɗi ɗai na malvanai nɵa, mu tupkumu maiɗi ɗai na arai piɗi kai nɵa. War girvudi na marba kaŋ, azumu ɗa a daba maini won hlai na duvuk nɵa, mu tulumu sumu ŋga wala sumu kai, amma gaiɗi ɗai na gaini mri sa nɵa.

¹¹Mu ɓurumu gaini sura maini wazagai n’edi war buza nɵa, maini hiɗiɗû mu-- mu biyumu ɓa Alaw a halasi, a kitimusu ziɗi sariya na jre, amma wala armu kai, mu biyumu ɓa a kurumu, amma kûri armu kai, arbamu a bunda gaini gaigai.

¹²A jre EPIƊ-ƊAI, mi zi tuwur arku viya, tuwuryi dama a za zaida midiyi, tuwuryi na mi ziŋ a na kureɗ wuzani aryi, tiyi mi siɗi hanɗa,

¹³EPIƊ-ƊAI mi fiki amai suku, mi ɓiɓiri miyi buriku, Alawyi mi pri edi gaigai suku par, war miɗiyi miɗi ɗa sai midini kripiɗi ɗai na zamai azumai, zaw midini fikiyi n’amai suku, agulyi te va gaini rihai, miyi a va gaini eles lai.

¹⁴Buri nɵa ziɗi sariya na ɗikat aŋ kir kai, a waya asakal marwai, jre te vada edi vat, te bunda gaigai, jre te kɵa azumai su, balamɗi kir kai,

¹⁵jre te kɵa su, ɗif na ɓa a ɗiyafu war jre, ni a nava fiɗi n’edi, EPIƊ-ƊAI a tala wala hanɗa paŋ, wuzani arni a talaŋ aŋ wala na hi-hir, buri ziɗi sariya na jre aŋ kir kai.

¹⁶EPIƊ-ƊAI a tala, a siɗa ɓa ɗif ktai aŋ kai, a zilba sini buri ɗif ktai na faka amai aŋ za wala aŋ kai, nɵa ni gaini midini dama a faka amai aŋ za wala, jreni lai te zina pini, te sini gdaŋ lai.

¹⁷A wuti jre sini maiɗi sapai zi gaw nɵa, a piti midini bogorai zi kûri, wiyini meefiŋ na azini maini a waŋ sini, maiɗi sapai n’amlai warni marɗi nɵa, sile a birti sini maini zani nɵa.

¹⁸Hanɗa a vrak n’aga a saŋ burini tuwur na ɗai e ziŋ. Suwarni midiɗi ɗai na e fiki amai sini, zini gir lai siɗi gawni paŋ, haa siɗi nagai paŋ n’e ɗa won hlai na gaigai.

¹⁹Nɵa war piɗi futi na dawai, haa piɗi futi na koskoi, ɗai paŋ aga e hûni yikini EPIƊ-ƊAI, paŋ aga e hûniti abaini na pɗem, nkam, EPIƊ-ƊAI aga a purmasi kokolai, maini yem zi ki na wiiɗi arai, na smer a hogoŋ nɵa.

²⁰EPIƊ-ƊAI aga a halasi a Yeruzalem, aŋ pliɗi edi aliɗi Izrayel, na e piyi bindi buri tuwurɗi. Hanɗa a miɗi na EPIƊ-ƊAI a muɗaŋ.

²¹EPIƊ-ƊAI a muɗa: tili hanɗa a bonuŋa na mu zaŋ gaiɗi ɗa: Sezeŋa aga a sumna midiɗi, aga mu siɗi seŋŋa war miɗi haa kureɗ, aga mu tikaŋ edi war miɗi par kai, koo war miɗi aliɗi, koo war miɗi tiyakaiɗi, seŋ hanɗa mu muɗaŋ hanɗa muta.