Read Mousgoum Esaya 6 Bible Online

Esaya 6 - Mousgoum bible

Esaya 6

¹War buza na pai Oziyas a mra ɗa, mu tala EPIƊ-ƊAI gai simni dam midiɗi Paramai zi pai n’amai mugwi; min sapani n’azumai a va tempel ɗa ta.

²Ɗai zi ɵeŋ n’e yikiɗi ɓa Serafeŋ gai ɗiyi amai midini sa; Serafeŋ paŋ ɗa, baada graŋni ɵaara ɵaara: na sulu, a arni gaini, na sulu, a ŋoya ganalni gaini, na sulu a ɗufla gaini lai.

³E yiki marɗi, e miɗi: EPIƊ-ƊAI zi Spak paŋ a na sɗik sɗik sɗik, afti paŋ a va gaiɗi abai na wiini.

⁴Wulaɗi na wa ɗa a ziriya, porte na gai pi azumai tiɓ ɗa, tempel a va gaini agiyiŋ lai.

⁵Nɵa mu muɗa: Haw buriya, ta mu ɓa li, buri mu ɗif na ma hi-hir, mu na arbaɗi ɗai na miɗi haharai lai, Tiyana mu tala Pai, EPIƊ-ƊAI zi Spak paŋ gaini ara.

⁶Amma ktai arbaɗi Serafeŋai a ɗiflasi sa, a tikasi morjo tini mini juɓam war gûwiŋ zi ɓaka par.

⁷A tikaŋa ma a muɗa: Wala hanɗa a titima muku li, meefeŋku a tika li edi, tuwurku a haza edi li lai.

⁸Mu ɵina wulani EPIƊ-ƊAI a na muɗa ɓa: N'aga mu ɵina ɗa asiya ɗa? N'aga a ka ɵeŋmu asiya ɗa? Mu waya seŋ: M'an na, ɵinaŋa!

⁹Nɵa a muɗaŋa: Hala ku miɗiɗi wiiɗi ɗai hanɗa ɓa: Aga ki ziɓiri haa, amma aga ki ɵini wala kai. Aga ki tili haa amma aga ki siɗi wala ktai kai.

¹⁰Bunda agulɗi ɗai hanɗa guma, taka ɵimaɗi tek, ŋulva arɗi tik, Kapai e tili gaini arɗi kai, e ɵini gaini ɵimaɗi kai, agulɗi yima seŋ kaalai; kapai wiyisi sa, e zûûli kai.

¹¹Mu zilbaŋ: Sla haa kaswata ɗa EPIƊ-ƊAI? A wayaŋa seŋ: Haa fuŋ n’abakai paŋ a tuura edi, ɗai e hini warni kai, dalamai, ɗai e hini warni kaalai, haa afti a tuura edi, a hina edi aŋ basga kadai su;

¹²Haa EPIƊ-ƊAI a ɵiriɗi ɗai edi midini afti hanɗa par, haa afti a hina edi kadai su.

¹³Na ɓa gal n’ag'aŋ doogo na wiiɗi ɗai a na aha midini afti ɗaai ɗa, afu aga aiaŋ edi; Amma maini luwuŋ Terebente gaini luwuŋ Sene n’e fiɗiŋ li azumai ɗa pini a hina dum, nɵa lai, piɗi n’a hina agwi ɗa a za seyem na pɗem n’Alaw a firyaŋ.