Read Mousgoum Esaya 60 Bible Online

Esaya 60 - Mousgoum bible

Esaya 60

¹Ɗiya amai Yeruzalem, bunda aŋ gaglai, tala gaglai a na halasi, gaglai na wiiɗi abai na pɗem na wiini EPIƊ-ƊAI, a na halasi muduku.

²Tala gegiŋ paŋ a guna afti gun, ɗai paŋ gegiŋ a dugûɗi duk, amma muduku tuku EPIƊ-ƊAI a faka amai fak, muduku tuku EPIƊ-ƊAI a yimiti abaini na pɗem kai.

³Ɗai paŋ aga e hilisi suku buri gaglai na ku na woni, paakai lai e hilisi suku buri ŋili na ku ŋala.

⁴Yima arku amai haw, tala arku ɵimaku, aliku paŋ e ɗa hilisi, e ɗa diŋgisi amai suku, nagai n’e ɗa war hlai na gaigai par paŋ, aliku na falakai e ɗa libiɗisi gaini tiki amai ɗaw ɗaw.

⁵Buri nɵa aga ku tala hanɗa, firiyi aga a yimuku, agulku aga te va gaini firiyi n’abai, maini te naɓafu edi nɵa, buri der na war yem n’abai paŋ aga a halasi a haku, gaini wazagai zi godai na wiiɗi ɗai paŋ, aga a luɓukusi a ha.

⁶Yaiku aga te va azumai gaini ɵigini viya, fara na wiini ɵigini n’a halasi war Madiyan par gaiɗi Eyifa lai, paŋ aga e hilisi war Saba par, aga e kisi or gaini encens, aga e zini yama zi kol na wiini EPIƊ-ƊAI wuzaɗi ɗai paŋ.

⁷EPIƊ-ƊAI a muɗa: fara na wiini farai paŋ na wiiɗi Gedar aga a diŋgasi paŋ a haku, adumai zi adime paŋ na wiiɗi Nebaiot, aga sasi edi burini sdaku, aga a niyasi amai midini hlai zi ɓaka na wiya, ɓaka hanɗa lai aga a firiya agula, aga mu siŋkiti edi abai na pɗem na wiini tempelŋa.

⁸Ɗai hanɗa paŋ e ɗi miɗi asiya ɗa? N'e rivi maini ɗugul nɵa, maini derekai n’a niya amlai war fuŋni nɵa.

⁹Yai paŋ n’edi gaigai a baiya ta ktai, batokai na woni paŋ a diŋga sini amai won hlai kai, batokai na wiiɗi Tarsis a halasi avut wuzani hlai a ni, aŋ kiɗisi aliku na edi gaigai par, gaini arzaŋ, or lai, e hilisi buri e kûliŋa ta, Epiɗ-ɗai Alaw na wiiku, na mu sutuku abai na pɗem.

¹⁰E ɗi ɗai na morkokoi aga e rgi zilagaku paŋ amai, paakaiɗi aga e zi sdaku zi ɵeŋ lai, Buri gaini suwar n’abai mu ɵuɓuku, amma buri pɗemŋa aga mu siŋka diriŋa suku.

¹¹Mini magalaku paŋ aga a hina gaini mili edi mal, girvudi kai, duvuk kai aga a nava dûgi n’amai kai, kapai a niyasi a ha, farai gaini godai, gaini fara na wiiɗi ɗai paŋ, gaiɗi paakaiɗi gaini tiɓi piɗi marɗi teɓ teɓ.

¹²Pinzibaɗi ɗai na woɗi, zaw te paiɗi pai na wata ɗi, na e firiyi e gidi puku kai, aga e vidi edi kafa, ɗai hanɗa paŋ aga e nivi tûri-n’edi kafa.

¹³Abai na pɗem paŋ na wiini luwoŋai na Liban, aga te halasi a haku, Sipre, orme gaini bui paŋ kafa, aŋ za wala zi zûvi na wiini tempelŋa na sɗik, nkam, hlai na mu mla aza amlai woni, aga mu zaŋ edi aŋ hlai na wiiɗi abai na pɗem.

¹⁴Ɗai na e sɗiku gir aga e hûyisi wuzaku, aliɗi ɗai paŋ na tikuku siyer, aga e hûrgi azumai wuzaku, nagai paŋ na e zuku gir muduku viya, aga e yikiku ɓa: fuŋ n’abai na wiini EPIƊ-ƊAI.

¹⁵Ku nafu gaini hini edi mak, e miisiku gaini miisi, ɗif n’a duruku aŋ kai, ɗif a hala a haku aŋ kai, ɗif na tuluku aŋ kai, buri nɵa tiyana aga mu zuku aŋ hlai, na firiyi na woni a vada kir kai zaŋ, war vunaɗi ɗai paŋ n’aga e hilisi aŋ wi midiɗi yai.

¹⁶Ɗai na warɗi yai gaiɗi paakaiɗi paŋ, aga e bindi aŋ wala zi der na wiiku, nɵa aga ku siɗa lai ɓa ɗif na kuruku, hanɗa muta EPIƊ-ƊAI, na mu pluku edi, Alaw na gdaŋ na wiini Yakob.

¹⁷War balamni bronze aga mu kaɗi or, war balamni kawai aga mu kaɗi arzaŋ, war balamni luwuŋ aga mu kaɗi broze, war balamni alifuŋ lai aga mu kaɗi, kawai, ŋi na wiiɗi pai n’aga mu tikiti a haku, a ɵeɗ gaini jre.

¹⁸Aga e ɵini labarni wala zi zi na meefiŋ warɗi yaiku kai, tûrini wazagai n’edi aga a za kai, amlai mini hagakai na wiiɗi yaiku gaw aga a za kai. Fuŋku aga ku yikaŋ ɓa fuŋ zi ɵeɗ, portekai na mini dalamaiku, aga e yikiŋ ɓa portekai zi kol.

¹⁹Haa zazaw futi aga te suku gaglaiɗi war Mefeŋ kir kai, tile lai aga a suku gaglaini war duvuk kir kai, EPIƊ-ƊAI aga a sumna aŋ gaglai na wiiku haa kureɗ.

²⁰Buriku futi war Mefeŋ aga te nawa kir kai, tile lai aga a niya azumai kir kai, buri EPIƊ-ƊAI aga a za buriku aŋ gaglai haa kureɗ, mefeŋ na wiiku zi tuwi zi mri aga a ɗiya.

²¹Ɗaiku gaini hlaiɗi paŋ aga e bindi aŋ ɗai zi yimi na jrekai, haa kureɗ aga e tiki afti paŋ aŋ bulum, mu rgiɗi muta gaini ta, kapai e siŋkiti abaiŋa na pɗem edi, e ɗa buriya maini alini luwoŋai, na ta gaini ta mu paŋ azumai nɵa.

²²N'agwi arbaɗi kadai aga a wiiɗi ali dubu ɗaw, pini-ziba n’agwi kadai aga a bunda aŋ ziba zi spak. Muta EPIƊ-ƊAI, war sartini hlai muta EPIƊ-ƊAI, aga mu va seŋ hanɗa amai witaw.