Read Mousgoum Esaya 62 Bible Online

Esaya 62 - Mousgoum bible

Esaya 62

¹Buri diri n’aŋ wara buriɗi Yeruzalem, mu ɓa ma azumai kai, buriɗi Yeruzalem aga mu hina sa war si zi mli kai, mu na baiya pliɗi-n’edi, haa mu tala gaglaiɗi a ŋala edi maini gaglai na wiini hlai na dawai par nɵa, jre na wiini kûriɗi a siŋka edi gaglai maini afu zi yi, na ɗai e dûŋ tiɗi Dodo nɵa.

²Ɗai paŋ aga e tiliti jreku, paakai paŋ lai aga e siɗiti abai na pɗem na wiiku, aga e yikiku gaini yiki na hehe, na EPIƊ-ƊAI aga a suŋku.

³Aga ku bunda aŋ bogorai zi ŋili war tini EPIƊ-ƊAI, kadamul na wiiɗi pai tini Alaw na wiiku.

⁴Aga e yikiku aŋ fuŋ n’abai na gaini hini edi mak kir kai, yaiku aga e yikiti ɓa yai na gaini tûûri edi kir kai, amma aga e yikiku ɓa yai zi diri na wiini EPIƊ-ƊAI, aftiku aga e yikiŋ ɓa: muni na gaini wusɗi, Buri EPIƊ-ƊAI aga a nava firyini warku.

⁵Maini ahiyogwi na gaula a tikiti ɓulmi nɵa, ni n’a rgiku amai hanɗa aga a bunda aŋ mofaku, maiɗi muni zi giɓi te sini firiyi wiini mafaɗi n’a giɓiti, nɵa aga ku sini firiyi wiini Alaw na wiiku.

⁶Yeruzalem sini zilagaku, mu ɗiyiɗi ɗai zi giɗam. Nagai aga e ɗûûli duvuk gaini girvudi, miɗi aga a ɓa azumai kai zaŋ, tiki gardakai na war duvuk, na ki ɗûûli sini Alaw, buri a hiina midiɗi Yeruzalem, ki hini siki war kilini weseŋ kai.

⁷Ki hinini si zi mli kai, haa won hlai na Yeruzalem te zizinali, haa won hlai na ni a bunditili, aŋ abai na pɗem na wiiɗi duniya paŋ.

⁸EPIƊ-ƊAI a ha mini, hanɗa a jre spak paŋ a wiya, algamaku aga mu saŋ edi aŋ wala zi simi tiɗi gauku kir kai, aliɗi ɗai na morkokai aga e hili aŋ si sulku na pɗem tuku par kir kai.

⁹Amma tamaini algama na e giɗimiŋ amlai, nagai gaini midiɗi dama aga e simiŋ, aga e kûli Alaw lai, ɗai na e hiɗi alini luwoŋai zi vin a ha, aga e si sulni lai, amlai warni tempelŋa na sɗik.

¹⁰Ɗai zi fuŋ n’a Yeruzalem niyisi anene, niyisi anene witaw, ziziniti futi wiiɗi ɗaiŋa, ziziniti futi, mili alini alifuŋ edi gaigai, ɗiyi amai wala zi siŋki buriɗi ɗaiŋa.

¹¹Tili EPIƊ-ƊAI aga a sa gadaini edi midini afti paŋ, miɗiɗi wiiɗi Siyon, tala ɗif na kuruku a na gaɗi, a na kiɗiɗi nagai n’a niviɗi aŋ wiini, a na kaɗi vrak na wiini sdani n’a zaŋ ɗa.

¹²Aga e yikiɗi ɓa ɗai na sɗik, nagai zi pli-n’edi na wiini EPIƊ-ƊAI, tuku Yeruzalem aga e yikiku, aŋ fuŋ n’abai na gaini hini edi mak kir kai, amma fuŋ n’abai zi diri gara na wiini EPIƊ-ƊAI.