Read Mousgoum Esaya 63 Bible Online

Esaya 63 - Mousgoum bible

Esaya 63

¹Ɗif hanɗa asiya ɗa na halasi a Bostra par, kapital na wiiɗi Edom, gaini sapakai sini zarakai, sapakai na zafai n’a ŋala gara, a na halasi gaini firiyi arni midiɗi abaini, EPIƊ-ƊAI a muɗa: muta mu jus na mu miɗiti jre, mu kiɗa ta buri mu siki kûri lai.

²Buri ma ɗa sapakaiku a tala makalakai ɗa? A siɗa maini sapakaini ɗif n’a haɗa alini luwuŋzi vin, zi hiri warni hulum nɵa. Buri ma ɗa?

³Nkam mu za sda, warni hlai na e siri alini luwoŋai zi sul woni ɗa, ta kiya ktai mu za hanɗa, warɗi suwarŋa gaini hiiŋa n’abai gara, mu biziɗi ɗai azumai, mu kirpiɗi azumai, mu siriɗi edi lai, nɵa felɗi a purfa sini sapakaiŋa.

⁴Warɗi agula mu firiya aŋ waya vrak, mefeŋ hanɗa lai a gizi ɗaw, buza zi pli-n’edi na wiiɗi ɗaiŋa.

⁵Mu tala ara aŋ paya ɗif, amma mu nava ɗif ktai aŋ zina pa kai, mu kwima, ɗif ktai na ɗiya ɵima zaw nɵa aŋ kai, buri nɵa ta gaini mada dama mu za hanɗa, amma suwarŋa te nafu aŋ zinai na pa.

⁶War suwarŋa n’abai mu kirpiɗi ɗai azumai, mu bindiɗi gaini siini sa tiɗi suwarŋa, Nɵa lai mu ma felɗi edi azumai kadai midini afti.

⁷Mada aga a kɵa aŋ muɗa edi midini sda, na pɗemai n’Alaw a zaŋ, gaini kol n’a sa sini Alaw lai, buri pɗem paŋ n’Alaw a zaŋ sumu, aga mu muɗa edi pɗemni n’abai hanɗa, siɗi aliɗi Izrayel, pɗem n’a ziŋɗi.

⁸Alaw a muɗa midiɗi aliɗi Izrayel: ɗai hanɗa e ɗi ɗaiŋa, nagai hanɗa e ɗi aliya, gaini jre aga e gidi pnini seŋŋa, Ni lai a nafu aŋ ɗif zi kûri na wiiɗi.

⁹War girɗi paŋ a ɵinasi ɗif zamai kai, buri a halasi aŋ zinaiɗi, amma ni a ɵasi de gaini midini dama aŋ kûriɗi edim war diri zi hiinini haw a kûriɗi edi, avut par a miliɗisi a libiɗi a kiɗi piɗi war hiliɗi.

¹⁰Amma eɗifu gaini fiki amai sini Alaw, nagai e kwimi Seze Siɗik, ni lai a bunda aŋ gawɗi, a tika pini aŋ hitimiɗi lai.

¹¹Nɵa lai ɗaini midiɗi a kɵa gaini mefeŋ n’a vugasi, n’e ziŋ gaini Musus, ɗif hanɗa aŋ wata ɗa na naka a ɵina Seze Siɗik arbaɗi? Na naka a vuga gaiɗi ɗaini arbani yem n’abai ɗaw, gaini fara na wiiɗi ɗaini gaiɗi ɗai zi giɗimi na piɗi lai, aŋ wata ɗa ni n’a ɵina Sezeni arbaɗi?

¹²Midini gal tini Musus na wus, a miɗiti tini zi spak wuzani, a ɓasa yem amai wuzaɗi, aŋ siŋkiti abaini na pɗem na wiini yikini edi.

¹³A hawa yem n’abai na hulum amai gaiɗi, maini plis n’a vuga ɗaw edi war hlai na basga, wala ktai ma a ziɗi kai.

¹⁴Maini fara na wiini farai, n’a ha azumai warni hlai na huduk zi yem nɵa, Sezeni EPIƊ-ƊAI a kiɗi piɗi won hlai zi milini si, maini nɵa lai tuku ku ɵa wuzaɗi ɗaiku, aŋ siŋka edi yiki na wiiɗi abai na pɗem wiiku.

¹⁵EPIƊ-ƊAI talasi arku azumai sek haw, war fuŋku na sɗik na tuku ku sumna woni, suwarku na afu hiy ya t'aŋ wa ta ɗa? Diriku n’abai gaini hiinini hauku na midiyi aŋ kir kai.

¹⁶Buri nɵa tuku k’apiyi, Abraham na tiyi kaw a siɗa seŋ midiyi kai, Yakob kaw a siɗiyi kaalai. Amma tuku EPIƊ-ƊAI tuk’apiyi, haa war pini hlai zi tiki par, ku ɗifyi na ku pliyi edi, tala hanɗa a yikiku haa avut par haa kureɗ.

¹⁷EPIƊ-ƊAI buri ma ɗa, ku hiniyi aŋ wili edi gaigai siɗi futiku par, ku bunda agulyi hiryik aŋ ɵina puku kir kai, buri diriku na buriyi wayasi miyi, buri tiyi miɗi ɗaiku zi sda, miɗi bulumku lai.

¹⁸Tiyi ɗaiku na ku viriyi edi, mi simni mefeŋ viya kai warɗi yai na ku sitiyi aŋ bulumm amma gauyi e hilisi e siri tempelku azumai pini eziɗi kaw.

¹⁹Mi simni mefeŋ viya maiɗi ɗai na ku ŋa midiɗi kir kai nɵa, na yikiku kaw a wa arbaɗi kir kai nɵa. Ɓa hlai n’amai war fuŋku par, ku malaŋsi mili edi mal, ku hasifu azumai dak lai, huwaŋai paŋ aga a ziriya.