Read Mousgoum Esaya 64 Bible Online

Esaya 64 - Mousgoum bible

Esaya 64

¹Maini afu zi yi na war hlai zi faifai nɵa, maini yem n’afu a huraŋ amai a hiɗika nɵa, gauku aga e siɗi ɓa tuku ku siya ɗa, ɗai paŋ aga e ziriyi wuzani yikiku.

²Won hlai na ku za wazagai zi hiila, na ɗif a hiina midini zini kai, ku hasi azumai dak, huwaŋai paŋ wuzani arku a ziriya.

³Wala hanɗa ɵimani ɗif a kiɗa aŋ ɵinaŋ duk kai, arni ɗif kaw a kiɗa aŋ talaŋ duk kai, alau na maiku tuku nɵa aŋ kai, na kiɗa aŋ za wazagai zi siŋki, na ɗai e kiɗi aŋ biyi war tini.

⁴Tuku ku paya aŋ nava gaiɗi ɗai na e zi wala na war jre-ɗikat, na midiɗi a kɵa gaini seŋku buri e zi pini,

⁵Tiyi mi bindi maini wala na hi-hir nɵa, sdaɗi jre ɗikat na wiyi, a tala maini sapa na hi-hir gaini didiɓi dab nɵa, tiyi paŋ mi siiti edi siyat maini ɵimani luwoŋai nɵa, tuwuryi na mi ziŋ a fliyi edi maini smer nɵa.

⁶Ɗif ktai na yika yikiku aŋ kai, ɗif ktai n’a ɵiya amai, ɗif ktai n’a faka amai fak na kiɗa aŋ naga suku ɓak aŋ kai, buri nɵa ku ŋoya arku cok wuzaɗi, ku hiniyi edi kadai, burini meefiŋ na wiini tuwuryi.

⁷Amma gaini hanɗa paŋ EPIƊ-ƊAI tuku k’apiyi, tiyi miɗi afti kadai, ku rgiyi ku tuku, tiyi miɗi sdaku.

⁸Ku sumna gaini suwar buriyi kai, EPIƊ-ƊAI, ku hina muduku a kɵa burini tuwuryi na mi ziŋ ɗa kai, tala tiyi paŋ miɗi ɗaiku.

⁹Fuŋku n’abakai na sɗik paŋ ɗai warni kir kai, Yeruzalem te bunda edi aŋ basga, Siyon te bunda edi aŋ greŋ zi deeɓer kadai.

¹⁰Tempelyi na sɗik na zuva gara, na tamaii eɗika aŋ kulu woni, tiyana a bunda aŋ wala zi der na wiini afu, wazagaiɗi n’a naka zi pɗmemai paŋ a tuura edi kafa.

¹¹Gaini gir hanɗa paŋ EPIƊ-ƊAI, a fuɗuku suku kai ɗi? Aga ku muɗa seŋ ktai kai zaŋ ɗi? Aga ku hiniyi aŋ simni war siyer haa kureɗ ɗi?