Read Mousgoum Esaya 65 Bible Online

Esaya 65 - Mousgoum bible

Esaya 65

¹Mu kiɗa aŋ waya seŋ wiiɗi ɗai, na e kiɗi aŋ zilbiŋa midini wala ktai kai, mu hina sa aŋ nivi tiɗi ɗai na e piyiŋa kai, mu siŋka sa mu muɗa m’an na m’an na, arɗi ɗai na e siɗi yikiŋa kai.

²Kureɗ mu miɗiti ta edi siɗi ɗai na e gidi kai, n’e piyi kureɗ warɗi futi na mafini, war hiiniɗi nagai dama.

³E ɗi ɗai na e tûûri suŋfaɗi agula kûreɗ-kûreɗ, e zi wazagai zi ɓaka edi war jardin, e yi encens wiini alawai na kadai midini brik.

⁴E simni warni waŋ ɗai zi mri, e fini edi warni hudukni hlai zi ŋoyai, e limi neŋ na wiini hohoŋ, tasakaiɗi na n’e simi simi woni, warni gaini didiɓi gaini wazagai na haharai.

⁵E miɗiɗi wiiɗi ɗai ɓa: ɗiyisi edi gaigai, ki tûrisi siyi gobi kai, buri a meefiŋ buriki, buri mu na gaini viri edi ɗaw burini EPIƊ-ƊAI, won hlai na mu tala zini wazagai hanɗa paŋ, suwar te yimaŋa, te ya amlai sa Mefeŋ paŋ maini afu nɵa.

⁶Amma mu tala payaiɗi paŋ war hlai hanɗa, mu kiɗa aŋ doga ma duk buri hanɗa kai, aga mu siɗi vrak midini hanɗa paŋ.

⁷Muta EPIƊ-ƊAI mu na muɗa: aga mu ŋa midiɗi tuwurɗi gaini na wiiɗi tamaiɗi lai, na e yi encens amai midini huwaŋai, e siiwi tini alawaiɗi na kadai amai midini hlai na boŋor, aga mu siɗi vrak midini wazagai na maafanai paŋ n’e ziŋ ɗibar, mu muɗa hanɗa muta EPIƊ-ƊAI.

⁸Buri nɵa EPIƊ-ƊAI a muɗa, won hlai na yem na pɗem a na warni alini luwuŋ zi vin, ɗai e miɗi ɓa: e tûriŋ edi kai, buri ɓiki aŋ warni, aga mu za gaiɗi ɗaiŋa zi sda maini nɵa lai, aga mu turiɗi edi kai zaŋ.

⁹Aga mu siɗi ɗai war pinzibani Yakob, wiini zibani Yuda aga mu sini huwaŋai na wiya, nagai na wiya na mu viriɗi edi aŋ ɗaiŋa zi sda, aga e zi simniɗi woni.

¹⁰Buriɗi ɗaiŋa na e bindisi arɗi sa, baŋa na wiini hlai na wiiɗi Saron, aga a bunda aŋ hlai zi kuzum na wiini farai n’agogoi, huduk na wiiɗi Akor aga a bunda aŋ hlai zi ŋoyai, wiini farai n’abakai.

¹¹Amma buriki tiki na ki hini Alaw edi, na miɗiki a wula gaiɗi huniya na sɗik, na ki zizini wala zi simi zi ɓaka midini tabelni Gad, e sini wazagai zi si wiini Meni,

¹²ta lai mu siki edi mini mri zi belek, aga ki hûrgi azumai kafa, aga e fiɗiki edi, buri mu yikiki ki ɵini kai, buri mi miɗiki, amma ki ziɓiri kai, wala na mu daraŋ kai ki viriŋ aŋ ziɗa a ni, wala na ki viriŋ hanɗa a wala n’a firiya agula kai.

¹³Buri nɵa Epiɗ-ɗai Alaw a na muɗa: tili ɗaiŋa zi sda aga e simi simi viya, amma tiki wiyamai aga te ziki, tili ɗaiŋa zi sda aga e si wala zi si, amma tiki sai aga te ziki,

¹⁴Tili ɗaiŋa zi sda aga e rɗi amai, gaini firiyi n’abai warɗi agulɗi, amma tiki aga ki ɗûûli gaini gir n’abai warɗi agulki, aga ki ɵi marava siki dama lai, gaini kwimi n’abai.

¹⁵Nagai na wiya na mu viriɗi edi ɗaw aŋ wiya, yikiki aga a bunda aŋ wiiɗi, aŋ yiki na tûsi gaini, a dara ɓa EPIƊ-ƊAI a fuɗuku edi maiɗi ɗai hanɗa nɵa, amma wiiɗi ɗaini zi sda aga a siɗi yiki na zamai na hehe.

¹⁶Ɗif na firiya ɓa a nava ɓiki warɗi yai, aga a navaŋ tini Alaw na wiiɗi jre ɗikat, ɗif na warɗi yai na firiya a ha wala mini, aga a haŋ gaini yikini Alaw na jre, buri gir paŋ na vugasi ɗibar aga a wula midiɗi ɗai

¹⁷Hlai n’amai gaini afti paŋ aga mu rgaŋ hehe, aga midini ɗif aga a kɵa kir kai, gaini hlai n’a naka avut par kai.

¹⁸Ki firiyi firiyi n’abai, ki firiyi kûreɗ-kûreɗ, burini wazagai na mu rgaŋ, buri mu rgiti Yeruzalem burini firiyi, ɗai ɗi lai burini firiyi n’abai.

¹⁹Aga mu ziti Yeruzalem aŋ fuŋa zi firiyi n’abai, ɗaiŋa maini nɵa lai. Ɗif aga a ɵina sura na wiini tuwi gaini ɗuwal kir kai.

²⁰Aliogoi na koɗokokai aga e mri kir kai.

²¹Ɗaiŋa aga e rgi dalamai, aga e simni woni lai, aga e zi vowai zi luwoŋai, aga e simi alini lai.

²²Dalamai n’e rgiŋ a na buriɗi, ɗif zamai aga a sumna woni kai, luwaŋaiɗi n’e piŋ aga a za ɗa aŋ simi na wiiɗi, ɗif zamai aga a tika simiɗi tiɗi kai, mefeŋɗi ɗaiŋa warɗi yai aga a za viya, maini mefeŋ na wiini luwoŋai nɵa, aga e nivi firiyi n’abai.

²³Girɗi na e siɗiŋ na wiini wiini ali, aga a za aŋ wala na kadai meere kir kai, amma aliɗi aga e zi aŋ zibaɗi ɗai, n’Alaw aga a siɗi ɓikini, aliɗi gaiɗi nagai aga e zi aŋ ɗai zi fuŋ na war fami ktai.

²⁴Buri nɵa ta lai aga mu wiyiɗi seŋ, won hlai na nagai e yikiŋa kai hai, aga mu ɵina seŋɗi wuzani hlai, won hlai na nagai e miɗiŋa kai hai.

²⁵Belemke gaiɗi ahiɗi-adumi, aga e simi simiɗi won hlai ktai, gurnai gaini gari aga e simi kuzum ktai, wala-meefeŋ aga a suma alogodo, meefiŋ gaini tuwur paŋ, aga a za amai midiɗi huniya na sɗik kai zaŋ.