Read Mousgoum Esaya 7 Bible Online

Esaya 7 - Mousgoum bible

Esaya 7

¹War sarti na Akaz n’ahini Yotam, na tiyni Oziyas a naka aŋ pai na Yuda ɗa, Retsin pai na Siriya, gaini Peka n’ahini Remaliya, pai na Izrayel, e hilisi aŋ hitimi fuŋ n’abai na Yeruzalem. Amma e kiɗi aŋ rɗi amai kai.

²E kisi labar wiini pinzibani David ɗa ɓa ɗai na Siriya e tiki afti na wiini Efrayim ɗa ɗaw, e pi kaŋɗi warni tiɓ. Akaz gaiɗi ɗaini agulɗi a muguza warɗi maini luwoŋai na smer a muguzaŋ nɵa.

³Nɵa, EPIƊ-ƊAI a miɗini wiini Esaya: Yima ahiku n’e yikiŋ ɓa Seyar-Yasub ɗa gaiku, hili sini Akaz, edi mini kanal zi yem n’amai ɗa, warɗi futi na te ka war vowai na wiini ɗif n’a za sapa bogro ɗa.

⁴Ku miɗini ɓa: Tika hangalku ta, ku huna kai, ku hiniti agulku te giɵiɗa burini hiy n’abai na wiini Retsin, na Siriya par gaini ahini Remaliya ɗa kai. Nagai e ɗi maini luwuŋ n’a ya, n’ahina dum dum kadai nɵa.

⁵Buri ɓa ɗai na Siriya, gaiɗi ɗai na Efrayim gaini Peka n’ahini Remalaia lai e rgi warɗi aŋ zuku meefeŋ, e miɗilai ɓa:

⁶Hulumu, hutumutumu Yuda, muluɗumu hunai piɗi, mu krputum gaini gdaŋ haa e wiyisi azumai pumu, mu tukumu ahini Tabeel aŋ pai midini ta lai.

⁷Epiɗ-ɗai Alaw a na muɗa maini nɵa: wala hanɗa aga a va amai kai, aga a za kaalai.

⁸Buri Damas, te kapital na wiiɗi Siriya, Retsin a pai na midiɗi Damas kadai, buza aŋ kai doogo doogo ɵaara pi ɵim Pinzibani Efrayim aga e zi aŋ ɗai kir kai, aga e vidi edi lai.

⁹Samariya te kapital na wiini Efrayim, pai na midiɗi Samariya ɗa, a Peka n’ahini Remaliya lai. Na ɓa ki ɗiyi yimiki midini EPIƊ-ƊAI kai ɗa, eziki aga a pa kai.

¹⁰EPIƊ-ƊAI a miɗini wiini Akaz pra:

¹¹Zilba wala zi siŋki ktai tini EPIƊ-ƊAI, Alaw na wiiku par, koo n’azumai war hlaiɗi ɗai zi mri, koo n’amai arbani hlai n’amai ɗi, zilbaŋ!

¹²Amma Akaz a waya seŋ a muɗa: Aga mu zilba wala ktai kai, aga mu piyini mini EPIƊ-ƊAI kai.

¹³Nɵa Esaya a muɗa: Mu siiwiki, tiki pinzibani David, ɵini pɗem: Kayai na ki ɗa kiyiɗi ɗai na ɗa, a kiɗiki kai, ki firi ki kyi Alaw na wiya lai ɗi?

¹⁴Tiyana ɗa, EPIƊ-ƊAI gaini midini dama aga a siki wala zi siŋki ktai: Muni na drai ɗa aga te ziya, aga te wa ahi, aga te sini yiki ɓa Immanuel, a dara muɗa ɓa "Alaw a na gaimu."

¹⁵Aga a suma ɗa, emelni ɵaakai gaini emel n’ami, haa a za aŋ siɗa ɓraw arbani pɗem gaini meefeŋ.

¹⁶Haa arwagwi a siɗa aŋ vara wala na pɗem, a bula edi sini na meefeŋ ta ɗa, aftiɗi paakai na sulu n’e ɗa muluku hunai puku gara na ɗa, aga a hina edi kadai su.

¹⁷EPIƊ-ƊAI aga a hinasi gir muduku, midiɗi ɗaiku, midini pinziba na wiini apuku lai. Mefeŋ zi gir na maini hanɗa ɵa, a za ka duk kai, haa hlai na pai na Izrayel te ɓurwa edi siɗi pai na Yuda par. Hanɗa a aga za gaini pai na Asiriya.

¹⁸Mefeŋ ni ɗa, EPIƊ-ƊAI, aga a yikasi aduwai n’a na edi war merfeŋni tini ra Nil na war Egipte, gaini ami n’a na midini afti na Asiriya lai.

¹⁹A halasi li ɗa, aga a sumna wulani avakai, arbani baŋa na sin huwaŋai, ɵimani luwoŋai na hicik paŋ, war hlai na farai a suma warni paŋ lai.

²⁰War Mefeŋ ni ɗa, EPIƊ-ƊAI aga a fiɗɗiki miɗiki edi gaini lazuwar n’aga a tikaŋsi anene duɓani ra Öfrata par A dara a muɗa gaini pai na Asiriya, Aga a faɗa ayir na miɗiki, gaini ayir na siki, gaini miɗigi na miki paŋ edi.

²¹War mefeŋ ni ɗa, ɗif paŋ aga a wula ɵai ktai, haakai sulu lai.

²²Fiyaw ɗa aga bunda viya, haa ɗai e simi ɗa a emelni ɵaakai Nagai n’e hini ka aha midini afti ɗa paŋ ɗa aga e simi ɗa a amelni ɵaakai gaini emel n’ami.

²³War mefeŋ ni ɗa, vowai na luwuŋ zi vin warni a za dubu ɗaw, n’a kiɗa a sumaarzaŋ sikel dubu ɗaw ɗa, aga a hina edi su a diya warni a hedek gaini duvuɗvuɗ.

²⁴Ɗai, aga e hilisi warni aŋ ɵar gaini ɓaraw gaini taŋ, buri afti paŋ aga bunda a hedek gaini duvuɗvuɗ.

²⁵Midini huwaŋai n’amai n’e ɗika e hirmiŋ gaini hidik, ɗif ga a kiɗa warni kir kai, tini hedek gaini duvuɗvuɗ ɗa, Ɗai aga e pûki ɵaakai gaini adumai gaini haakai lai aŋ suma woni.