Read Mousgoum Esaya 8 Bible Online

Esaya 8 - Mousgoum bible

Esaya 8

¹EPIƊ-ƊAI a muɗaŋa: Tika wala n’e ɗû midini n’abai daidai, ɗo midini, ku ɗoŋ daidai na ɗif a kiɗa a ŋaŋ, ɓa: Maher-Salal -Has-Baz a dara muɗa Mili der na min gaw ɗa witaw, Pirmi aŋ virmi hlai ɗa.

²Nɵa mu siŋka wala n’e ɗû midini ɗa wiiɗi zaidakai sulu na gai futiɗi, Pai zi ɓaka Uriya gaini Sakariyas n’ahini Yeberekiya.

³Nɵa asakal par, mu yimiti muniya, muni na min Alaw ɗa sa, te tika fel, te wa ahi na wus. EPIƊ-ƊAI a muɗaŋa: Sini yiki ɓa: Maher-Salal Has Baz a da muɗa Mili der na min gaw ɗa witaw, Pirmi aŋ virmi lai ɗa;

⁴Buri wuzani hlai n’arwagwi a kiɗa yika epini zaw a yikiti emini ɗa, ɗai aga e ki der na war Damas gaini wazagai n’e virmiŋ na Samariya par lai, wuzani pai na Asiriya.

⁵EPIƊ-ƊAI a muɗaŋa pra:

⁶Ɗai na Yuda ɗa e tili yem na Siluwe, n’a ka gaini hangal ɗa maini wala kadai nɵa, amma e firyi pini Retsin gaini ahini Remaliya.

⁷Buri nɵa, EPIƊ-ƊAI aga a hinasi yem n’abai, na gdaŋ na war ra Efrat par midiɗi, a dara muɗa: Pai na Asiya gaini spakni paŋ. Aga a tika amai haa a huŋva edi wulni daŋ, maini yem nɵa a suma hlai paŋ.

⁸Aga a niya aha war Yuda, a suma hlai, a rɓa wazagai, haa amai wûle ta. Tini n’a waŋ edi ɗa, aga a va midini aftiku paŋ Immanuel.

⁹Tiki pinzibaɗi ɗai sûûri gaini gdaŋ, hunai n’abai aga a yimiki, Ziki ɵimaki, tiki paŋ, na ki ɗa edi midini afti na gaigai, Zizini siki min gaw ɗa, hunai n’abai aga a yimiki. Zizini siki min gaw ɗa, hunai n’abai aga a yimiki.

¹⁰Kiti miki midini wala ktai haw le, aga a za kai Ɗiyi seŋ ktai zaw, seŋ ni aga amai kaalai. buri, Alaw a na gaiyi.

¹¹Won hlai n’EPIƊ-ƊAI a yimaŋa, won hlai n’a gdaŋa buri mu tikiti futi na wiiɗi na wiiɗi ɗai na Yuda kai ɗa, a muɗaŋa maini nɵa:

¹²Wala na ɗai e yikiŋ ɓa: kitini-miy na meefeŋ ɗa, tiki ki yikiŋ ɵa kai. Wala na nagai e huniŋ ɗa, ki hûniŋ kaalai.

¹³Ki yimi aŋ Alaw na sɗik ɗa a EPIƊ-ƊAI zi spak paŋ, ki sini hormo wiini, ki hûni ɗa wuzani ni lai.

¹⁴Aga a za aŋ hlai na Siɗik, aŋ ahi-fuŋ zi dibi azi, aŋ huwuŋ na ɵiŋka ɗai azumai lai, burini piniziba na sulu na wiiɗi Izrayel, amma, buriɗi ɗai na Yeruzalem ɗa, aga a za aŋ ava aŋ azaw lai.

¹⁵Viya aga e dibi sini, aga e kɵi azumai, aga e hiɗi lai. Aga e yimi warni azaw, e kiɗi e pri edi kir kaalai.

¹⁶Giɗima wala zi zaida hanɗa, giɗima gaidai hanɗa warni agulɗi ɗai zi hitri na wiya ɗa.

¹⁷Mu baiya na ɗa a EPIƊ-ƊAI, n’a bunda arni edi siɗi pinzibani Yakob ɗa par, Mu baiya na ɗa tini.

¹⁸Ta lai aliogoi n’EPIƊ-ƊAI a siɗaŋa lai, mi ɗi wala zi siŋki, mi ɗi wala n’a siŋka wala na wuze aha warɗi Izrayel, na sini EPIƊ-ƊAI zi Spak paŋ, na hlaini zi simni a na amai midiɗi huwuŋ Siyon.

¹⁹Na ɓa ɗai e miɗiki ɓa: Hili miɗi ɗai zi siɗi wuti, gaiɗi n’e zilbi sezeɗi ɗai zi mri n’e yibi huwit, gaiɗi n’e ŋûriyi gai ŋuriyi won hlai n’e miɗi midini wazagai na wuze lai ɗa a futini, ɗai aga e zilbi tini alawai na wiiɗi kai ɗi? Zaw e zilbiɗi zi mri, buriɗi na karɗi kai ɗi? Na ɓa e ɗa miɗiki ɵa ɗa,

²⁰Aga ki wiyi seŋ ɓa: Ki wiyi sin gadai zi ɗû gaini wala zi zaida ɗa. Na ɓa ɗai e miɗi ɵa kai ɗa, aga e tili gaglai na dawai par kai.

²¹Aga e vigi aftiɗi, war kayai, gaiɗi wiyamai; Won hlai na wiyamai te sûwiɗi gdaŋɗi li, aga e bindi gaini hiy, e miɗi seŋ na meefeŋ sin pai na wiiɗi gaini Alaw na wiiɗi lai, aga e tili arɗi amai.

²²Asakal par aga e tilisi arɗi azumai midini afti lai, Hlai paŋ ɗa a gir, a gegeŋ, a hunai n’abai, aga e wiiɗi war gegeŋ na tikiɗim.

²³Amma gegeŋ ɗa aga a hina midini afti n’aŋ war hunai ɗa ɵa haa kai, Na ɓa aɗipar ɗa afti na Zabulon gaini na Neftali a naka a nava kai ɗa, dawai sek ɗa, futi n’agoɗom war yem-ra n’abai sek, gaini hlai n’anene duɓani Yurdan par, gaini afti na wiiɗi ɗai na kadai lai aga a va kol.