Read Mousgoum Esaya 9 Bible Online

Esaya 9 - Mousgoum bible

Esaya 9

¹Ɗai n’e ɗika e piyi war gegeŋ ɗa, e tili gaglai n’abai, Midiɗi nagai n’e simni midini afti na gegeŋ, na wiiɗi ɗai zi mri ɗa, gaglai a tika pini a ŋala.

²EPIƊ-ƊAI, ku bindiɗi pinziba hanɗa viya, ku viɗi gaini firiyi lai, Nagai e ɗa firiyi wuzani arku maini war firiyi na wiini hiɗini seyem nɵa, maini war firiyi na wiini ɓraw na wiini der na pin hatam nɵa.

³Buri ɓa jug n’a naka wulani, luwuŋ n’e tikiŋ wulani, gaini daɓala n’e ɵiɓiŋ gaini lai ɗa, ku haɗaŋ edi kafa, maini war mefeŋ na ku birgiɗi Madiyanitekai nɵa.

⁴Harabak n’eziɗi gawyi n’e kirpi hlai gaini, gaini sapa n’a didiɓa gaini fel paŋ ɗa, aga e pukiŋ arni afu kapai afu a yaŋ edi.

⁵Buri ahi a wa li burimu, ahi a sa li sumu. Abai te sa sini ta, aga e yikiŋ ɓa: Ɗif zi si gadai na pɗem gara, Alaw na gdaŋ gara, Api na vadakai, Pai na wiini ɵeɗ.

⁶Sdani a na maini nɵa: Aga a wa tini midini hlai paŋ, a sa ɵeɗ na vidini aŋ kai wiiɗi Paramai zi pai na wiini David gaiɗi paini lai, aga a ɗiyiti gidiŋi, a hiniti te kɵa kai Aga a ɗiya midini zi na pin gadai gaini jre lai, tiyana par haa hlai n’a vada kai, Hanɗa wala na Sile zi diri na wiini EPIƊ-ƊAI zi Spak paŋ aga a zaŋ ɗa.

⁷EPIƊ-ƊAI a ɵinasi seŋ ktai midiɗi pinzibani Yakob, seŋ hanɗa a kɵa midiɗi pai na Izrayel.

⁸Ɗai paŋ aga e siɗi hanɗa, Ɗai na Efrayim gaiɗi, ɗai na Samariya lai n’e miɗi war kûlûni-si ɓa:

⁹Zlaga z'afti ɗa a ho azumai ho ho, tiyi aga mi rgi na gaini ali-fuŋ n’abakai, luwuŋ Sikimor n’amai midini dalam ɗa a haɗa ɗe ɗe aga mi bindiŋ gaini luwuŋ Sedre lai.

¹⁰EPIƊ-ƊAI aga a sa rɗi n’amai wiiɗi gawni Retsin, a hugiɗisi gawɗi aŋ fikisi amai siɗi,

¹¹Ɗai na Siriya piɗi futi na dawai par, Filistrekai piɗi futi na koskoi par lai e kirpiɗi ɗai na Izrayel ɗa haa miɗi a hina huuwa. Amma gai hanɗa paŋ, hiyni a tika azumai kai, tini t'aŋ gai miɗi meɗ ɗaai.

¹²EPIƊ-ƊAI a ziɗi gir arɗi ɗaini mai hanɗa ɵa. Amma gai hanɗa paŋ ɗa, ɗai e wiyisi sini kai, e wiyisi sini EPIƊ-ƊAI zi Spak paŋ kai.

¹³Nɵa mefeŋ ktai, EPIƊ-ƊAI a ɗukla humok gaini giɗer edi war Izrayel par, ɵimani hura gaini vayai lai.

¹⁴Abakai n’arbaɗi ɗai gaiɗi abakai n’e ɵi wuze ɗa, nagai e ɗi humok, ɗai na min Alaw n’e hitri eles ɗa, e ɗi giɗer lai.

¹⁵Ɗai n’e ɵi wuzaɗi ɗai e wûliɗi edi cikeŋ. Nagai n’e ɗi piɗi yaw e tikiti futi na maafini ɗaw.

¹⁶Buri hanɗa, EPIƊ-ƊAI aga a hiniɗi aliɗi na gawlakai kai, aga a hiina haw buriɗi aliɗi na huyokai gaiɗi falakai na war greŋ ɗa kaalai. Buri nagai paŋ e ɗi ɗai na haharai, na maafanai, e miɗi ɗa a seŋ na haharai lai. Gai hanɗa paŋ, hiyni a tika azumai kai, tini t'aŋ gai miɗi meɗ ɗaai.

¹⁷Buri ɓa meefeŋ a ya maini afu n’a ya hedek gaini duvuɗuvud nɵa, n’afuni a dilɗa pini jur na hicik, n’agiyiŋni a ɗuguda amai ɗa nɵa.

¹⁸Suwar na wiini EPIƊ-ƊAI zi Spak paŋ, a na ya afti ɗa, ɗai e tili maini n’e ɗa arni afu nɵa, ɗif n’a zina pini maini aŋ kai.

¹⁹Ɗai e kipisi nɵa par, wiyamai ɗa a siɗi ɵa, e vuwisi nɵa par, e vi kai sam; ɗif paŋ a kara ɗa a maini.

²⁰Pinziba na wiini Manase a kirpa pinziba na wiini Efrayim, Pinziba na wiini Efrayim a kirpa pinziba na wiini Manase, nagai sulu paŋ e huri midiɗi Yuda. Gai hanɗa paŋ hiy na wiini EPIƊ-ƊAI a tika azumai kai, tini t'aŋ gai miɗi meɗ ɗaai.