Read Mousgoum Levitekai 1 Bible Online

Levitekai 1 - Mousgoum bible

Levitekai 1

¹EPIƊ-ƊAI a yikasi amlai warni Gumu na e nivi gaini EPIƊ-ƊAI woni par, a miɗini maini nɵa:

²Miɗiɗi wiiɗi aliɗi Izrayel, ku miɗiɗi ɓa: Won hlai na ktai arbaɗi a dara a za ɓaka wiini EPIƊ-ƊAI gaini wala n’ezini puɗu ɗa, aga a yima arbani ɵaakaini par, zaw adumaini, zaw haaakaini par.

³Na ɓa a dara a za ɓaka zi yi gaini ɵaakai ɗa, a yima gari na tirki sini kai, a kaŋsi mini Gumu na e nivi gaini EPIƊ-ƊAI woni, kapai EPIƊ-ƊAI a yimaŋ tini par.

⁴Ɗif n’a za ɓaka hanɗa, a tika tini midini wala zi fiɗi ɗa kapai EPIƊ-ƊAI a yima ɓaka hanɗa tini par, a haza tuwurni edi lai.

⁵A ɵa wulani wala hanɗa wuzani EPIƊ-ƊAI nɵa paakai zi ɓaka n’alini Aaron e ki fel hanɗa wuzani EPIƊ-ƊAI, asakal par e yiimiŋ amai sini gûwiŋ zi ɓaka n’a na mini Gumu na n’e nivi gaini EPIƊ-ƊAI war gal na puɗu paŋ.

⁶A lufta wala n’a fuuɗaŋ edi, a rɗaŋ edi bak bak.

⁷Nɵa alini pai zi ɓaka Aaron, e pi afu war Gûwiŋ zi ɓaka, e mili luwuŋ mini lai.

⁸Asakal par e mili neŋ na gaini rɗi bak bak midini luwuŋ na mini afu ɗa, humok gaini emel na warni paŋ lai.

⁹Ɗif ɗa a ma wazagai na warni gaini ɓaɓarani edi gaini yem, asakal par Pai zi ɓaka a ya hanɗa paŋ midini gûwiŋ zi ɓaka. Hanɗa a ɓaka zi yi, a ɓaka na afu a yaŋ edi, a wala zi lûgûzi na pɗem n’a ɵiɗiti agulni EPIƊ-ƊAI azumai.

¹⁰Na ɓa, a za ɗa a ɓaka zi yi na gaini adime zaw gaini hek ɗa, n’a yimaŋsi arbani adumaini par zaw haakaini par, a zaŋ ɗa gaini adime zaw hek na tirki sini kai.

¹¹A ɵa wulani wuzani EPIƊ-ƊAI, war galni Giwiŋ zi ɓaka n’azumai sek. Nɵa paakai zi ɓaka n’alini Aaron e yiimi felni amai sini Gûwiŋ si ɓaka war galni na puɗu paŋ.

¹²A rɗa neŋni edi bak bak, humok gaini emel na warni arbani paŋ, pai zi ɓaka a mulaŋ midini luwuŋ na mini afu na warni gûwiŋ zi ɓaka ɗa.

¹³A ma wazagai na warni gaini ɓaɓarani edi gaini yem, asakal par pai zi ɓaka a za ɓaka hanɗa a ya hanɗa paŋ midini gûwiŋ zi ɓaka. Hanɗa a ɓaka n’a fu a yaŋ edi, a wala zi lûgûzi na pɗem n’a ɵiɗiti agulni EPIƊ-ƊAI azumai.

¹⁴Na ɓa, a za ɗa a ɓaka zi yi wiini EPIƊ-ƊAI gaini wala zi ɗufli ɗa, aga a yimasi arbani muguɵuwi par zaw dere par,

¹⁵pai zi ɓaka a kaŋsi midini gûwiŋ zi ɓaka, a rɗa humokni edi, a yaŋ midini gûwiŋ zi ɓaka, asakal par a cirɗa felni amai sini war galni na puɗu paŋ.

¹⁶A tika godorni edi gaini wazagai na warni paŋ, a bulaŋ ɵimani gûwiŋ zi ɓaka war gal na piɗi futi na gorof par su, war hlai n’e pûkû bono z'emel woni.

¹⁷A ɓasa wala zi ɗufli arbani graŋni, amma a ɓurwaŋ edi kai. Asakal par pai zi ɓaka a yaŋ midini luwuŋ na mini afu na war gûwiŋ zi ɓaka ɗa. Hanɗa a ɓaka zi yi, a ɓaka na afu a yaŋ edi, a wala zi lûgûzi na pɗem n’a ɵiɗiti agulni EPIƊ-ƊAI azumai.