Read Mousgoum Levitekai 10 Bible Online

Levitekai 10 - Mousgoum bible

Levitekai 10

¹Amma Nadab gaini Abihu n’alini Aaron na sulu, e mili wazagai n’e mili wala zi ɗûgûdi zi lûgûzi tiɗi, e mili afu warni, e kû wazagai zi ɗûgûdi zi lûgûzi midini, e kisi afu na kadai n’EPIƊ-ƊAI a miɗiɗi midini kai wuzani.

²Nɵa afu a niyasi wuzani EPIƊ-ƊAI par a yiɗi, e mri azumai wuzani EPIƊ-ƊAI.

³Musus a miɗini wiini Aaron: EPIƊ-ƊAI a mu ɗaŋ edi gaglai ya ɓa: Aga mu siŋka edi ɓa mu na sɗik, gaiɗi nagai paŋ n’e tûrisi sa ɗa, mu firiya ɓa e siŋa kol wuzani arɗi ɗai paŋ. Aaron a kitiŋa faɵ.

⁴Musus a yikasi Mikayel gaini Elsafan n’alini Uziyel, na tawalni epini Aaron, a miɗiɗi: Hilisi libi kopoŋɗi tawalakaiki edi mini hlai na sɗik par, kiɗi anene duɓani kaŋ sek.

⁵Won hlai n’e cûsi, e libiɗi gaini sapaɗi paŋ edi duɓani kaŋ, maini na Musus a muɗaŋ ɗa nɵa.

⁶Nɵa Musus a miɗini wiini Aaron gaiɗi alini na sulu, Eliyazar gaini Itamar maini nɵa: Ki hini yir na miɗiki a kutusa kai, ki ɓisi sapa na siki edi kai, kapai ki mri kai, ki glisi hiy na wiini EPIƊ-ƊAI midiɗi ɗai na Izrayel ɗa kaalai. Aga e tûwiiɗi nagai n’EPIƊ-ƊAI a fiɗiɗi gaini afu ɗa e ɗi tawalakaiki na war pinzibaɗi Izrayel ɗa.

⁷Tiki, ki yimi siki edi mini gumu n’e nivi gaini EPIƊ-ƊAI woni par kai, ɵa kai ɗa aga ki mri, buri tiki ki nivi mini emel n’e tiki ɗai war sda gaini miɗiki, emel hanɗa a siki edi mini sdani na wiini EPIƊ-ƊAI. Aaron gaiɗi alini e zi maini na Musus a miɗiŋɗi nɵa.

⁸EPIƊ-ƊAI a miɗini wiini Aaron:

⁹Tuku gaiɗi aliku ki ci vin n’a ciina kai, sul kaalai, Won hlai na ki firiyi ki hili amlai war gumu n’e nivi gaini EPIƊ-ƊAI woni ɗa, nɵa aga ki mri, a gadai n’aga a bunda buriki kai haa kureɗ.

¹⁰Kapai ki siɗi aŋ zi braw arbani wala na gaini viri edi burini Alaw gaini wala na kadai, arbani wala na hilu gaini na hi-hir,

¹¹kapai ki hitriɗi gadai n’EPIƊ-ƊAI a siŋki war mini Musus wiiɗi aliɗi Izrayel.

¹²Musus a miɗini wiini Aaron gaiɗi alini na sulu n’e hini, Eleyazar gaini Itamar: Tiki ɓaka na gaini alini seyem ɗa, asakal na ki yimi bri n’a sa sini aŋ ɓaka n’a ya edi gaini afu burini EPIƊ-ƊAI li aŋ ɓaka aga ki simi n’a hina gaini is arni kai ɵimani gûwiŋ zi ɓaka buri a bri na sɗik gara.

¹³Tiki aga ki simiŋ war hlai na sɗik, buri hanɗa a bri na wiiku gaiɗi aliku, war ɓaka n’e yiŋ edi gaini afu burini EPIƊ-ƊAI par, hanɗa a gadai n’a mu navaŋsi sini EPIƊ-ƊAI par.

¹⁴Amma didik gaiɗi ɓuli na wiini ɓaka zi ɵeɗ na wiiɗi aliɗi Izrayel ɗa, asakal n’e zi deni li ɗa aga ki simiŋ war hlai na hilu tuku gaiɗi aliku na maɵagai gaiɗi na falakai lai, buri a bri n’a sa suku gaiɗi aliku war ɓaka hanɗa.

¹⁵Ɓuli na gaini didik hanɗa, nagai n’e kisi ɓakaɗi, e kiŋsi gaini wazagaini z'emel zi yi paŋ, kapai e zi de na wiini si na sini EPIƊ-ƊAI gaini. Asakal hanɗa par a sa suku gaiɗi aliku lai aŋ bri na wiiki kûreɗ-kûreɗ, maini n’EPIƊ-ƊAI a muɗaŋa nɵa.

¹⁶Won hlai na Musus a zilba burini hek zi ɓaka na burini tuwur, a navaŋ ɓa e yiŋ yit, a za hiy sini Eleyezar gaini Itamar alini Aaron n’e hini ɗa, a miɗiɗi:

¹⁷Tiki ki limi wala zi ɓaka hanɗa war hlai na sɗik kai ɗa buri maɗa? Hanɗa a wala na sɗik gara koo! EPIƊ-ƊAI a sa hanɗa siki buri a tika tuwur ɗai edi gaini, kapai ki zi de na wiini hinini tuwur midiɗi gaini wuzani EPIƊ-ƊAI.

¹⁸Buri ɓa felni a ka amlai war Hlai na sɗik kai, nɵa aga ki limi wala zi ɓaka hanɗa war Hlai na sɗik maini na mu miɗiŋki nɵa.

¹⁹Aaron a wiyini seŋ wiini Musus, zuɓura pɗem: War mefeŋ n’e kisi ɓakaɗi na burini tuwur wuzani EPIƊ-ƊAI, gaini ɓakaɗi zi yi, wala n’a za sa tuku ku sɗaŋ ya, nɵa EPIƊ-ƊAI aga a firiya buriya Won hlai na mu luma wala zi ɓaka na burini tuwur war mefeŋ hanɗa ki ɗi ɗi!

²⁰Seŋ na Musus a ɵinaŋ maini hanɗa ɵa ɗa a yima agulni.