Read Mousgoum Levitekai 14 Bible Online

Levitekai 14 - Mousgoum bible

Levitekai 14

²De n’e ziŋ sini ɗif na dugum war mefeŋ n’e diri e ziŋ edi hilu, aga a za maini nɵa: Won hlai n’e kiŋ li wuzani pai zi ɓaka ɗa,

³pai zi ɓaka a niyasi anene mini war kaŋ par, a tala veglek zi dugum n’aŋ sini gaini futini. Na ɓa ɗif na veglek zi dugum aŋ sini ɗa, a zuula ta ɗa,

⁴pai zi ɓaka a sa futi buri e piyinisi wala zi ɗfli sulu na karni na hilu, luwuŋ Sedre, mukusu na mekele keŋ gaini graŋni luwuŋ Isop lai kapai e ziŋ edi hilu gaini.

⁵Pai zi ɓaka a sa futi buri e ɵi wulani wala zi ɗufli na ktai amai par midini grak z'afti gaini vi gaini yem na gaglai ta

⁶A yima wala zi ɗufli na karni ɗa, a mula luwuŋ Sedre gaini mukusu na mekele keŋ, gaini ɵimani luwuŋ Isop ɗa lai, a jibaŋ arni felni wala zi ɗufli n’a ɵini walani amai par midini yem na gaglai ɗa.

⁷A yama yem na gaini fel arni hanɗa sini ɗif n’a dara a za sini edi hilu war veglek zi dugum par azi muguzak, A sa labar edi midini ɓa a hilu, Asakal par a hina wala zi ɗufli na karni a ɗufla edi war basga sek.

⁸Ni n’a za sini edi hilu a ma sapa na sini edi, a faɗa yir na sini paŋ edi, a ma sini edi gaini yem lai, asakal par a bunda hilu; Asakal par a wayasi aha war kaŋ, amma a niya amlai war gumuni kai haa mefeŋ muguzak.

⁹Mefeŋ n’ag'aŋ muguzak ɗa, a faɗa a yir na sini paŋ edi, ayir na midini, muɗgi na mini edi, ayir na mini arni, a faɗa ayir na sini paŋ edi, A ma sapakai na sini paŋ edi, a ma sini edi gaini yem lai, nɵa a bunda hilu.

¹⁰Mefeŋ n’ag'aŋ mitwis ɗa, a yima alini adumai na maɵagai na tirki sini kai sulu, na muni na buza ɗaw na tirki siɗi kaalai; avudi kilo ɵeeŋe na gaini zilni gaini emel gaini galni litir na wiini emel ɗaw lai.

¹¹Pai zi ɓaka n’a za de na wiini zi n’edi hilu ɗa, a kasi ɗif n’a dara a za sini edi hilu gaini wazagaini n’a kaŋsi paŋ wuzani EPIƊ-ƊAI, edi mini gumu n’e nivi gaini EPIƊ-ƊAI woni ɗa.

¹²Pai zi ɓaka a yima ahini adime n’avut ɗa, a za ɓaka na wiini zizinini seŋ gaini, gaini galni litir na wiini emel. a za ɓaka hanɗa gaini de na wiini si na sini EPIƊ-ƊAI.

¹³A ɵa wulani ahini adime hanɗa war hlai n’e fiɗi wazagai zi ɓaka na burini tuwur gaini ɓaka zi yi lai woni, war hlai na sɗik. Buri ɓaka na buri zizinini seŋ gaini ɓaka na burini tuwur gaini sulogoini a sda na wiini pai zi ɓaka a sda na sɗik gara.

¹⁴Pai zi ɓaka a tika felni wala n’a fuɗaŋ buri zizinini seŋ ɗa, a girdaŋ sini mini ɵime na wus na wiini ɗif n’a za sini edi hilu, midiɗi ahi tini na wus, midiɗi ahiɗii ezini n’amai na wus ɗa lai.

¹⁵Pai zi ɓaka a tika galni litir na wiini emel ɗa a ma azumai war tini na muni agwi,

¹⁶pai zi ɓaka a jibiti ahi tini na wus ktai arni emel n’aŋ war tini na muni ɗa, gaiɗi ahi tini na ɗa, a yama emel wuzani EPIƊ-ƊAI azi muguzak.

¹⁷Pini emel n’a hina war tini ɗa, pai zi ɓaka a girdaŋ sini mini ɵime na wus na wiini ɗif n’a za sini edi hilu midiɗi ahi tini n’amai na wus gaiɗi ahiɗi ezini n’amai na wus ɗa lai. A girda hanɗa amai par midini felni wala zi ɓaka na wiini zizinini seŋ ɗa.

¹⁸Pini emel n’a hina war tini ɗa, pai zi ɓaka a girdiŋni amai midini ɗif n’a za sini edi hilu ɗa, pai zi ɓaka a za de na wiini hinini tuwur wuzani EPIƊ-ƊAI midini lai, kapai a bunda hilu.

¹⁹Asakal par pai zi ɓaka a za ɓaka na burini tuwur, a za de na burini hinini tuwur midini ni n’a za sini edi hilu war hi-hirni par, asakal a ɵa wulani wala zi ɓaka zi yi lai;

²⁰pai zi ɓaka a ka ɓaka zi yi gaini ɓaka na gaini alini seyem midini gûwiŋ zi ɓaka, a za de na wiini hinini tuwur midini ɗif ɗa, nɵa ɗif aga a bunda hilu.

²¹Na ɓa ɗif ɗa a na murga, a kiɗa a nava wazagai hanɗa kai, a kasi ahini adime ktai kapai pai zi ɓaka a za ɓaka burini zizinini seŋ, pini de na wiini si na sini EPIƊ-ƊAI, kapai e zi de na wiini hinini tuwur gaini lai, a kasi avudi kilo hu na gaini zilni gaini emel, aŋ ɓaka na gaini alini seyem galni litir na wiini emel ɗaw lai.

²²Muguɵuwi sulu zaw dere sulu sini gdaŋni, na ktai te na burini ɓaka na burini tuwur, na ktai aŋ ɓaka zi yi lai.

²³War mefeŋ n’ag'aŋ mitwis a kasi wazagai hanɗa wiini pai zi ɓaka kapai a zaŋ edi hilu gaini edi mini gumu n’e nivi gaini EPIƊ-ƊAI woni wuzani EPIƊ-ƊAI.

²⁴Pai zi ɓaka a yima ahini adime zi ɓaka na burini zizinini seŋ ɗa, a tika galni litir na wiini emel ɗa lai, pai zi ɓaka a za ɓaka hanɗa wiini EPIƊ-ƊAI, pini de na wiini si na sini EPIƊ-ƊAI.

²⁵A ɵa wulani ahini adime na burini zizinini seŋ ɗa, pai zi ɓaka a ma felni wala n’a fuɗaŋ ɗa agwi, a girdaŋ sini mini ɵime na wus na wiini ɗif n’a za sini edi hilu ɗa, midiɗi ahi tini n’amai na wus gaiɗi ahiɗi ezini n’amai na wus ɗa lai.

²⁶Pai zi ɓaka a ma emel war tini na muni agwi;

²⁷Pai zi ɓaka a jibiti ahi tini na wus ktai arni emel n’aŋ war tini na muni, a yamaŋ wuzani EPIƊ-ƊAI azi muguzak.

²⁸Pai zi ɓaka a girda emel n’aŋ tini sini mini ɵime na wus na wiini ɗif n’a za sini edi hilu midiɗi ahi n’amai na wus gaiɗi ahiɗi ezini n’amai na wus ɗa lai, Won hlai n’a girda felni wala zi ɓaka na wiini zizinini seŋ woni ɗa.

²⁹Pini emel n’a hina war tini ɗa, pai zi ɓaka a girdaŋ amai midini ɗif n’a za sini edi hilu ɗa, kapai a za de na wiini hinini tuwur midini wuzani EPIƊ-ƊAI lai.

³⁰A navasi ɗa a muguɵuwi, a dere, n’a na navaŋsi paŋ ɗa pai zi ɓaka a yima pini ktai;

³¹a za ɓaka na burini tuwur gaini, na ktai n’a hina ɗa a za ɓaka zi yi gaini ɓaka na gaini, gaini ɓaka na gaini alini seyem. Asakal hanɗa pai zi ɓaka a za de na wiini hinini tuwur midini wuzani EPIƊ-ƊAI lai.

³²Hanɗa a gadai na ɗif na veglek zi dugum aŋ sini, na gdaŋni a kiɗa midini wazagai n’a za sini edi hilu gaini kai ɗa.

³³EPIƊ-ƊAI a miɗini wiini Musus gaini Aaron:

³⁴Won hlai na ki niyi li aha midini afti na Kanaan na mu dara mu siŋkia aŋ wiiki, na ɓa mu tika buki li sini dalam midini afti na mu dara mu siŋki aŋ wiiki ɗa,

³⁵epini dalam aga a za labar hanɗa wiini pai zi ɓaka ɓa, mu tala buku aŋ siɗi dilimiŋa.

³⁶Pai zi ɓaka a sa miɗi buri e milisi wazagai n’amlai paŋ anene wuzani hlai na ni gaini midini dama a niya amlai aŋ tala buki hanɗa. Nɵa wazagai n’a naka amlai warɗi dilimi hi-hirni aŋ kai. Asakal hanɗa, pai zi ɓaka a niya amlai aŋ tiliti dilimi ɗa,

³⁷aga a tala buki hanɗa, na ɓa n’a na amai sini hlai a co sini hlai co co,

³⁸pai zi ɓaka a hala woni. Won hlai n’a co li mini hlai ɗa, a doogo min hlai duk haa mefeŋ muguzak.

³⁹Pai zi ɓaka a waya woni pra. Na ɓa a nava li ɓa buki a riya edi wuzani sek ɗa,

⁴⁰pai zi ɓaka a sa futi buri e rɗi ali-fuŋ na buki aŋ sini ɗa, e kiŋ edi sini fuŋ n’abai ɗa par gaigai, war hlai na hi-hir.

⁴¹A miɗiɗi wiiɗi ɗai buri e hûrki warɗi n’amlai azumai, siɗi n’e hûrkiŋsi amai par ɗa e libiŋ edi war hlai na hi-hir edi war basga sek.

⁴²E piyisi kriyit zamai n’e wiŋ amai war balamni n’avut n’e wiŋ azumai ɗa, e piyisi afti zamai e wiyi e ɵirɓi warɗi dilimi lai.

⁴³Asakal n’e rɗi kiryit azumai li, n’e hûrki siɗi dilimi azumai li, na e ɵirɓiti li lai; na ɓa buki a wayasi pra ɗa,

⁴⁴pai zi ɓaka a waya pra, a tala sdani buki hanɗa pɗem, na ɓa a riya edi wuzani sek sek siɗi dilimi paŋ a veglek zi dugum n’a diŋga, dilimi te bunda hi-hiri;

⁴⁵E giɵiti dilimi azumai, kriyit na siɗi, luwuŋ na midiɗi gaini afti n’e ɵirɓiti gaini paŋ e libiŋ edi war basga war hlai na hi-hir.

⁴⁶Ɗif paŋ n’a niya li amlai, asakal na pai zi ɓaka a ɵa mini hlai ka ɗa, a bunda hi-hir, a hi-hir haa koskoi;

⁴⁷ɗif paŋ n’a fana li amlai warɗi dilimi hanɗa aga a ma sapa na sini edi, ni n’a suma li amlai warɗi dilimi hanɗa aga a ma sapa na sini edi lai,

⁴⁸amma na ɓa, pai zi ɓaka a niya li amlai, a tala buki ɗa li, n’a riya edi wuzani siɗi dilimi asakalni ɵirɓiɗi par kai, pai zi ɓaka aga a muɗa edi midiɗi dilimi hanɗa ɓa te na hilu, buri buki a vada edi vad.

⁴⁹Kapai dilimi na buki a ɵa siɗi te za edi hilu ɗa, pai zi ɓaka a yima wazagai zi ɗufli sulu, a mula luwuŋ Sedre, mukusu na mekele keŋ gaini graŋni luwuŋ Isop lai;

⁵⁰Wala zi ɗufli na ktai a ɵini wulani amai par midini grak z'afti na yem na gaglai aŋ warni ɗa;

⁵¹A mula luwuŋ Sedre, graŋni luwuŋ Isop, mukusu na mekele keŋ gaini wala ɗufli na karni lai, a jibaŋ arni felni wala zi ɗufli n’a fuɗaŋ ɗa, arni yem na gaglai ɗa lai, a yamaŋ amai siɗi dilimi azi muguzak.

⁵²Gaini hanɗa aga a tika hi-hir n’aŋ siɗi dilimi edi, aga a ziti dilimi edi hilu maini hanɗa nɵa, aga a za hanɗa gaini felni wala zi ɗufli, gaini yem na gaglai, gaini wala zi ɗufli na karni, gaini luwuŋ Sedre, gaini graŋni luwuŋ Isop gaini mukusu na mekelekeŋ lai.

⁵³A hina wala zi ɗufli na karni a ɗufla edi basga sek, a za de na wiini hinini tuwur midiɗi dilimi lai, nɵa te za edi hilu.

⁵⁴Hanɗa a gadai na burini veglek zi dugum paŋ zaw bigruw,

⁵⁵buki na sini sapa zaw sini dalam

⁵⁶ɓilik n’a ɵa ɗef, zaw kabrai kabrai, gaini hlai na huwur huwur;

⁵⁷Gadai hanɗa a kiɗa a sunkumu midini wala, ɓa a hi-hir zaw, a hilu ɗi. Hanɗa a gadai na midini vegek zi dugum.