Read Mousgoum Levitekai 15 Bible Online

Levitekai 15 - Mousgoum bible

Levitekai 15

¹EPIƊ-ƊAI a miɗini wiini Musus gaini Aaron:

²Miɗiɗi wiiɗi aliɗi Izrayel, ki miɗiɗi ɓa: Won hlai na veglek a yima ɗif li sini pini, wala n’a kasi pini ɗif par ɗa a bundaŋ hi-hir.

³Hihirni na war wala n’a kasi pini par ɗa a hanɗa, wala n’a kasi pini par zaw a caka wuzani, buri hanɗa a hi-hir.

⁴Wala zi feŋ paŋ na ɗif hanɗa a fana li midini, a bunda hi-hir, wala zi simni n’a sumna li midini paŋ a bunda hi-hir lai.

⁵Asiya ɗi paŋ n’a tika tini li sini wala zi feŋ hanɗa a ma sapa na sini edi, a ma sini edi gaini yem lai, amma ɗif hanɗa a hi-hir haa koskoi.

⁶Asiya ɗi paŋ n’a sumna midini wala zi simni na ɗif na wala a ka pini a sumna midini ɗa a ma sapa na sini edi, a ma sini edi gaini yem lai, amma a hi-hir haa koskoi.

⁷Asiya ɗi paŋ n’a tika tini sini ɗif zi veglek hanɗa li, a ma sapani edi, a ma sini edi gaini yem lai, amma a hi-hir haa koskoi.

⁸Na ɓa ɗif zi veglek hanɗa a purfa teenek sini ɗif na hilu li, ɗif na hilu a ma sapani edi a ma sini edi gaini yem lai, amma a hi-hir haa koskoi.

⁹Wala paŋ na ɗif zi veglek hanɗa a sumna midini war hilini na war morkoi, a hi-hir.

¹⁰Asiya ɗi paŋ n’a tika tini sini wala n’a nafu azumai pini ɗif zi veglek hanɗa ta ɗa, a hi-hir haa koskoi. Ɗif paŋ n’a luba wala na maini hanɗa ɵa ɗa aga a ma sapani edi, a ma sini edi gaini yem lai, amma a hi-hir haa koskoi.

¹¹Ɗif paŋ na ɗif zi veglek a tika tini sini li, na ɓa tini gaini mi edi kai ɗa, ɗif ni ɗa aga a ma sapa na sini edi, a ma sini edi gaini yem lai, amma a hi-hir haa koskoi.

¹²Grak z'afti paŋ na ɗif zi veglek ɗa a tika tini sini li e gɵiŋ edi, tasa zi luwuŋ zi kilɗi paŋ e miŋ edi gaini yem.

¹³Won hlai na ɗif na wala a ka pini ɗa a zuula li ɗa, a za mefeŋ muguzak haw kapai a za edi hilu. A ma sapani edi, a ma sini edi gaini yem na gaglai lai, asakal par a bunda hilu.

¹⁴War mefeŋ n’ag'aŋ mitwis a paya muguɵuwi sulu, zaw dere a hala wuzani EPIƊ-ƊAI mini gumu n’e nivi gaini EPIƊ-ƊAI woni, aŋ siŋni wiini pai zi ɓaka.

¹⁵Gaini wala zi ɗufli na ktai pai zi ɓaka a za ɓaka na burini tuwur, gaini na ktai a za ɓaka zi yi lai. Pai zi ɓaka a za de na wiini zi n’edi hilu war hi-hir na wiini wala n’a ka pini par wuzani EPIƊ-ƊAI.

¹⁶Won hlai na ɗif a ha sini li edi pini dirini, a ma sini paŋ gaini yem, amma a hi-hir haa koskoi.

¹⁷Sapa paŋ, zaw amur paŋ na sini ɗif a ma li sini ɗa, aga e miŋ edi gaini yem, amma a hi-hir ha koskoi.

¹⁸Won hlai na muni te fana li gaini wus ɗa, nagai sulu paŋ aga e mi siɗi edi gaini yem, amma e ɗa haharai haa koskoi.

¹⁹Won na muni te na war mefeŋ na wiiɗi walaɗi falakai, fel n’a ka ɗa a binditi hi-hiri haa mefeŋ muguzak, asiya ɗi paŋ n’a tika tini li siɗi, a hi-hir haa koskoi.

²⁰Wala zi feŋ paŋ gaini wala n’e simni midini paŋ, na te fana midini, zaw te sumna midini war mefeŋni ni ɗa, a hi-hir.

²¹Asiya ɗi paŋ n’a tika tini sini walaɗi zi feŋ, aga a ma sapani edi, a ma sini edi gaini yem, amma a hi-hir haa koskoi.

²²Asiya ɗi paŋ n’a tika tini sini wala na te sumna midini aga a ma sapani edi, a ma sini edi gaini yem, amma a hi-hir haa koskoi.

²³Na ɓa ɗif a tika tini sini wala n’a na war hlaiɗi zi feŋ, zaw midini hlai na te sumna midini, pini n’a tika tini sini wala hanɗa, a hi-hir haa koskoi.

²⁴Na ɓa Won hlai na ɗif a fana gaiɗi, walaɗi falakai a cosi a ka sini ɗif, ɗif ni ɗa a hi-hir haa mefeŋ muguzak, wala zi feŋ paŋ na fana midini paŋ ɗa a hi-hir.

²⁵Na ɓa muni fel a naka gaiɗi mefeŋ viya, a suwa na wiini walaɗi falakai li, zaw na ɓa apra edi midini mefeŋni walaɗi falakai su ɗa, te hi-hir maini na war mefeŋ na wiini walaɗi falakai nɵa.

²⁶Hlai na fel a naka gaiɗi hai, wala zi feŋ na te fana midini paŋ a na hi-hir maini na wiini mefeŋ na wiini walaɗi falakai nɵa. Wala paŋ na te sumna li midini a hi-hir maini na war mefeŋ na wiini walaɗi falakai nɵa.

²⁷Asiya ɗi paŋ n’a tika tini li sini walaɗi zi feŋ, zaw sini walaɗi na te sumna midini, a hi-hir, a ma sapani edi, a ma sini edi gaini yem, amma a hi-hir haa koskoi.

²⁸Na ɓa fel n’a ka gaiɗi muni a ɗiya li, muni te baiya haa mefeŋ muguzak kapai te za edi hilu.

²⁹War mefeŋ n’ag'aŋ mitwis ɗa, te paya muguɵuwi sulu, zaw dere sulu ɗi, te kiŋnisi wiini pai zi ɓaka edi mini gumu n’e nivi gaini EPIƊ-ƊAI woni.

³⁰Pai zi ɓaka a za na burini tuwur gaini wala zi ɗufli na ktai, na ktai a za ɓaka zi yi gaini lai. Pai zi ɓaka a za de na wiini zi n’edi hilu war hi-hir na wiini fel zi ki par midiɗi wuzani EPIƊ-ƊAI.

³¹Aga ki miɗiɗi wiiɗi aliɗi Izrayel buri e niyi amlai war Hlai zi simni na wiya kai Won hlai n’e ɗa haharai, kapai e siɗi aŋ mri burini hi-hirɗi kai, a dara a muɗa kapai e bindi Hlai zi simni na wiya n’a na arbaɗi edi hi-hir.

³²Hanɗa a gadai n’a sa burini ni n’a wala a ka pini par, zaw na sini a ha edi pini dirini kai n’a bundaŋ hi-hir,

³³gaiɗi na na te na war mefeŋ na wiini walaɗi falakai ɗa. Gulaini ɓa: gadai hanɗa a na burini ni, zaw na na wala a ka piɗi par, gaini ni n’a fana gaiɗi muni na hi-hiri.