Read Mousgoum Levitekai 17 Bible Online

Levitekai 17 - Mousgoum bible

Levitekai 17

¹EPIƊ-ƊAI a miɗini wiini Musus:

²Ku miɗini wiini Aaron, wiiɗi alini, wiiɗi aliɗi Izrayel paŋ lai ɓa wala n’EPIƊ-ƊAI a gada midini ɗa a hanɗa:

³Na ɓa ɗif na Izrayel a fuɗa ɵeŋ zaw adime, zaw hiki aha war kaŋ, zaw anene duɓani kaŋ par ɗi.

⁴Na ɓa a kaŋsi mini gumu na e nivi gaini EPIƊ-ƊAI kapai a za ɓaka gaini wiini EPIƊ-ƊAI war hlai zi simni na wiini kai, fel n’a maŋ edi hanɗa aga a zilba war tini, ɗif ni ɗa, aga e birgiŋ edi arbaɗi ɗaini par.

⁵Nɵa aliɗi Izrayel aga e zi ɓakaɗi edi war basga kir kai, e kiŋsi wuzani EPIƊ-ƊAI mini gumu na e nivi gaini EPIƊ-ƊAI woni wiini pai zi ɓaka, aga e zi ɓaka zi ɵeɗ wiini EPIƊ-ƊAI gaini.

⁶Pai zi ɓaka aga a yama fel amai sini gûwiŋ zi ɓaka na wiini EPIƊ-ƊAI n’a na anene par mini gumu n’e nivi gaini EPIƊ-ƊAI woni, aga a ya emel na warni aŋ lugos na pɗem n’a ɵiɗiti agulni EPIƊ-ƊAI azumai.

⁷Aliɗi Izrayel aga e zini ɓaka wiini alawai na zamai n’a sɗa maini haakai nɵa kai, aga e hini EPIƊ-ƊAI na wiiɗi aŋ tipi gaini alawai hanɗa kai. Gadai hanɗa aga ki zi pini kûreɗ-kûreɗ haa sini pinzibaki wuzaki sek.

⁸Aga ku miɗiɗi pra: na ɓa ɗif na Izrayel zaw na morkoi n’a na arbaki, na ɓa a za ɓaka zi yi zaw na zamai,

⁹a kaŋsi mini Gumu n’e nivi gaini EPIƊ-ƊAI woni aŋ zini ɓaka wiini EPIƊ-ƊAI gaini kai ɗa, ɗif hanɗa aga e birgiŋ edi arbaɗi ɗaini par.

¹⁰Ɗif na Izrayel zaw na morkoi n’a na arbaki, n’a suma li fel, koo ɓa gaglai, koo ɓa gaini cifriki ɗi ɗa, aga mu faka amai sini, aga mu birgaŋ edi arbaɗi ɗaini par.

¹¹Buri suŋfani wala zi rgi paŋ aŋ war fel, ta mu siti futi aŋ zi sda gaini amai midini Gûwiŋ zi ɓaka kapai tuwurki a nava girdi n’edi, nkam fel a girda tuwur edi buri suŋfa aŋ warni.

¹²Hanɗa a wala na mu miɗiɗi wiiɗi aliɗi Izrayel ɓa, ktai arbaki zaw morkoi n’a na arbaki aga a suma fel kai buri ni ɗa.

¹³Na ɓa ɗif na Izrayel zaw na morkoi n’a na arbaki, a yimasi wala zi ɗûfli n’a kiɗa a lima edi war ɵar par, a ɵa wulani, a yima afti midini felni lai.

¹⁴Buri suŋfani wala zi rgi paŋ a felni, na ɓa a na karni hai ɗa. Buri nɵa, mu miɗiɗi wiiɗi aliɗi Izrayel ɓa, aga ki simi felni wala zi rgi kai buri suŋfani wala zi rgi paŋ a felni. Asiya ɗi paŋ n’a sumaŋ li aga e birgiŋ edi arbaɗi ɗaini par.

¹⁵Na ɓa ahi-fuŋ zaw ɗif zi zak, a luma wala n’a mra kiini, zaw na wala na buza a fuɗaŋ, aga a ma sapa na sini edi, a ma sini edi gaini yem lai, Amma a hi-hir haa koskoi, asakal par a bunda hilu.

¹⁶Na ɓa a ma sapani kai, a ma sini kaalai ɗa seŋ aŋ miɗini.