Read Mousgoum Levitekai 18 Bible Online

Levitekai 18 - Mousgoum bible

Levitekai 18

¹EPIƊ-ƊAI a miɗini wiini Musus:

²Miɗiɗi wiiɗi aliɗi Izrayel, ku miɗiɗi ɓa: EPIƊ-ƊAI, Alaw na wiiki mu Ta;

³Aga ki zi wala n’a nasi ka a za warɗi Egipte na ki simnisi ka woni kai, aga ki zi n’a na za midini afti na Kanaan na mu na kiki woni sek na kaalai. Ki zi pini gadai zi ɗû na wiiɗi kai.

⁴Ki zi ɗa pini gadai zi ɗiyi gaini gadai zi ɗû na wiya. Epiɗ-ɗai Alaw na wiiki muta.

⁵KI yimi gadai zi ɗû gaini gadai zi ɗiyi na wiya, asiya ɗi paŋ n’a za pini ɗa aga a sumna karni. Epiɗ-ɗai Alaw na wiiki muta.

⁶Ɗif na Izrayel paŋ aga a fana gaiɗi zigeliŋi kai, Epiɗ-ɗai Alaw na wiiki muta.

⁷Ku fana gaiɗi amuku kai aga ku tikini siyer wiini apuku. Aga ku tikiɗi siyer wiiɗi amuku kai, buri ɓa na t'amuku.

⁸Ku fana gaiɗi munini apuku kai, buri aga ku tikini siyer wiini apuku.

⁹Ku fana gaiɗi tawalku kai, zaw na epiki ktai, zaw emiki ktai, koo ɓa ku wasi edi, koo ɓa ku wa aha.

¹⁰Aga ku fana gaiɗi tiyiku kai; t'ahini ahiku, t'ahiɗi ahiku ku fana gaiɗi kai. Ku kasi muduku na ɗa a siyer kadai.

¹¹Ku fana gaiɗi ahiɗi munini apuku kai, a wûti ɗa a apuku, te tawalku.

¹²Ku fana gaiɗi tawalni apuku kai, buri ɓa gaini apuku e wii war fel ktai.

¹³Ku fana gaiɗi tawalɗi amuku kai, buri ɓa gaiɗi amuku e wii war fel ktai.

¹⁴Ku fana gaiɗi munini tawalni apuku kai, buri na te tawalni apuku.

¹⁵Ku fana gaiɗi suwulku kai, buri na te munini ahiku, ku fana gaiɗi kai.

¹⁶Ku fana gaiɗi munini tawalku kai, ku kinisi siyer midini kai.

¹⁷Ku fana gaiɗi: muni, gaiɗi ahiɗi, gaiɗi tiyiɗi n’ahiɗi ahiɗi na wus, zaw n’ahiɗi ahiɗi na muni. E ɗi felɗi muni na kai, hanɗa a wala na hi-hir gara.

¹⁸Ku tikiti tawalɗi muniku aŋ muniku kai, Won hlai na muniku te na karɗi hai ɗa aŋ kasi sile arbaɗi kai.

¹⁹Ku fana gaiɗi muni kai, Won hlai na walaɗi falakai aŋ siɗi hai, buri te na hi-hiri.

²⁰Ku fana gaiɗi munini maiku kai buri aga a bunduku hi-hir.

²¹Ku sa ahiku edi aŋ ɓaka wiini alaw Molek kai, ku kasi miisi sini yikiŋa kai, Epiɗ-ɗai Alaw na wiiku muta.

²²Ku fana gaini ɗif maini n’e fini gaiɗi muni nɵa kai. Hanɗa a wala na hi-hir gara.

²³Ku duɓura gamaw gaini farai n’e zini puɗu puɗu kai, ɗif n’a za hanɗa li ɗa a hi-hir. Muni te za hanɗa kaalai. Hanɗa a ɓilki n’edi na hi-hir gara.

²⁴Ki bindi siki haharai gaini sda na maini hanɗa nɵa kai, buri pinziba na mu birgaŋ edi wuzaki a bunda sini hi-hir gaini sda hanɗa.

²⁵Afti naka naan lai a bunda hi-hir burini meefeŋ hanɗa, haa mu faka amai sini a hûŋviɗi ɗai na warni edi

²⁶Tiki ɗa, gadaiŋa zi ɗû gaini zi ɗiyi ɗa, ki yimiŋ pɗem, ki zi wazagai na haharai n’a na ɗa kai, koo ahi-fuŋ, koo ɗif zi zak n’a na arbaki ki zi hanɗa kai.

²⁷Ɗai n’e ɗika midini afti naka naan wuzaki par, e zi wazagai ni ɗa, afti a bunda hi-hir buri hanɗa.

²⁸Nɵa tiki aga ki bindi afti hi-hir, kapai a hûŋviki edi maiɗi ɗai n’e ɗika midini avut par ɵa kai.

²⁹Asiya ɗi paŋ n’a za li ktai arbani wazagai na haharai hanɗa, aga e birgiŋ arbaɗi ɗai na Izrayel ɗa par.

³⁰Ki zi pini gadaiŋa, wazagai na haharai n’a naka a za wuzani giziki, ki bindi siki haharai gaini sda hanɗa kai, Epiɗ-ɗai Alaw na wiiki muta.