Read Mousgoum Levitekai 19 Bible Online

Levitekai 19 - Mousgoum bible

Levitekai 19

¹EPIƊ-ƊAI a miɗini wiini Musus,

²miɗiɗi wiiɗi vokɗi aliɗi Izrayel, ku miɗiɗi ɓa: simni sɗik buri Ta Epiɗ-ɗai Alaw na wiiki mu na sɗik.

³Asiya asiya paŋ arbaki aga a sa hormo wiiɗi emini gaini epini, a sa hormo wiini mefeŋni Sabbat na wiya lai, Epiɗ-ɗai Alaw na wiiki muta.

⁴Ki bindi arki sini alawai na zamai na jrekai kai ɗa kai, ki zizini alawai zi rgi gaini kawai n’a hiliya kaalai, Epiɗ-ɗai Alaw na wiiki muta.

⁵Won hlai na ki fiɗi wala zi ɓaka zi ɵaŋ wiini EPIƊ-ƊAI, ki zi pini gadai na mu siŋki ɗa, kapai mu yimaŋ tiki par.

⁶Ki kiɗi ki limi neŋni wala zi ɓaka hanɗa war yuvai n’e fiɗiŋ warni, dawai lai, pini n’a hina war yuvai n’ag'aŋ hu ki yiŋ edi.

⁷Na ɓa ɗif a luma neŋ hanɗa li war yuvai n’ag'aŋ hu, a neŋ na gaini futini kir kai, aga mu yima ɓakani kir kaalai.

⁸Ɗif n’a lumaŋ li ɗa, seŋ n’abai aŋ miɗini buri a yima wala na sɗik na wiini EPIƊ-ƊAI maini wala na kadai nɵa, ɗif hanɗa aga e birgiŋ edi arbaɗi pinzibani par.

⁹Won hlai na ki hiɗi seyemki ɗa, aga ki hiɗiŋ haa edi war hagani vuwaiki ta ta kai, ki viri helek n’a hina piki kaalai.

¹⁰Aga ki wiyi war zardeŋ zi luwuŋ zi vin aŋ riwi alini luwuŋ n’a hina amai ktai ktai kai, ki viri alini luwuŋ n’a yaka azumai ɗa kaalai. Ki hiniŋɗi wiiɗi na murgakai gaiɗi na morkokai, Epiɗ-ɗai Alaw na wiiki muta.

¹¹Ki hili wala kai, ki zi eles kai, ki zi rhai siɗi marki kaalai.

¹²Ki hi wala miki war jre kai gaini yikiŋa kai, ki ziŋ li ɵa ɗa, ki miisi na ɗa a yikiŋa, EPIƊ-ƊAI muta.

¹³Ki kiri marki kai, ki hili walani kaalai, vrakni ɗif n’a zuku sda ɗa aga a fana tuku kai.

¹⁴Ki tirki ɗif na ganiŋ kai, ki tiki wala azumai ezini ɗif na melveŋ kapai a ɵiŋkaŋ azumai kai, gaini ha naɗa aga ki siŋki edi ɓa ki ɗa siŋa hormo wiya ta Epiɗ-ɗai Alaw na wiiki, EPIƊ-ƊAI muta.

¹⁵Ki ziti sariya na jre kai ɗa kai, ki ɵi piki pini ɗif na huruf ɗa kai, ki zini pini ɗif zi spak ɗa kaalai, amma aga ki ɗûkliti sariya wiiɗi marki war jre.

¹⁶Ki zi siki aŋ ɗai n’e miɗi meefeŋ siɗi ɗai ɗi kai, ki zi zaida z'eles n’a ka maiki mini mri kai, Epiɗ-ɗai Alaw na wiiki muta.

¹⁷Ki rgi hiini na meefeŋ warki sini tawalki kai, amma na ɓa aŋ war meefeŋ ki gidiŋ kapai ki kisi tuwur miɗiki burini kai.

¹⁸Ki wiyi meefeŋ midini meefeŋ kai, ki zi war murɗek siɗi marki kaalai, amma ɗif paŋ aga a dara maini maini sini dama nɵa, EPIƊ-ƊAI muta.

¹⁹Ki zi pini hanɗa lai: war farani faraiki ɗa, ki hinni pinzibani farai na kiini kiini a duɓura marni kai, ki bili pinzibani seyem na kiini kiini war vuwaiki kai, ki wii sapa na e hiniŋ gaini aduzi n’arni kiini kiini sulu siki kai.

²⁰Na ɓa ɗif a fana li gaiɗi bagai na ɗif a giɓiti gaŋ, amma vrak na midiɗi zi pili n’edi na war begeɗi par a za kai, te nava pili n’edi kaalai, ɗif hanɗa a vurga hokumgaini virgi, e fiɗiɗi edi kai buri bagai te nava pili n’edi kai.

²¹Ɗif a kasi adime ktai edi mini Gumu n’e nivi gaini EPIƊ-ƊAI woni, a za ɓaka na burini zizinini seŋ wiini EPIƊ-ƊAI gaini;

²²Pai zi ɓaka a za de na burini hinini tuwur midini ɗif hanɗa wuzani EPIƊ-ƊAI gaini adime zi ɓaka na burini zizinini seŋ ɗa, meefeŋni n’a zaŋ a nava girdi n’edi lai.

²³Waŋ hlai na ki sû li aha midini afti naka naan ɗa, ki pi luwuŋ z'ali li lai, alini luwuŋ hanɗa aga ki tiliŋ aŋ wala na hi-hir haa buza hu, ki simiŋ kai.

²⁴Buza n’ag'aŋ puɗu, ali luwuŋ n’aga a wa avut paŋ ki siŋ sa war fet zi kol na sini EPIƊ-ƊAI,

²⁵sini buza ɵim par ta ɗa, aga ki simiŋ, nɵa luwuŋki aga a wa ali viya a suwa pra, Epiɗ-ɗai Alaw na wiiki muta.

²⁶Ki simi neŋ wala na ki simiŋ war hlai na ki mi felni woni kai, ki tiki hiiniki midini wala n’a siŋ wala na wuze sek ɗa kaalai.

²⁷Ki ɵi mini ayir na miɗiki amai wulla kai, ki fiɗi muɗgi na galaiki edi kai.

²⁸Won hlai na ɗifki a mra li ɗa, ki ɓisi siki burini kai, ki ɗihi zoro siki kaalai, EPIƊ-ƊAI muta.

²⁹Ki hiniɗi aliki na falakai e tûûri siɗi gaini sdaɗi zi zawar na burini alawai ɗa kai. Kapai afti paŋ a niya edi war maɵara, a va gaini sda na hi-hir ɗa kai.

³⁰Ki sini hormo wiini mefeŋ zi Sabbat na wiya, ki sini hormo wiini Hlai na sɗik na wiya lai, EPIƊ-ƊAI muta.

³¹Ki zilbi sezeɗi ɗai zi mri kai, ki tiki futi pini kai, buri ɓa aga a bindiki haharai, Epiɗ-ɗai Alaw na wiiki muta.

³²Ki fiki amai wuza ni ɗif na ayir midini muɗugwi, ki siɗi hormo wiiɗi nagai na walakai, nɵa aga ki siŋki edi ɓa ki ɗa siŋa hormo wiya ta Alaw na wiiki, EPIƊ-ƊAI muta.

³³Won hlai na ɗif zi zak a halalsi li arbaki, midini afti aga ki kiriŋ kai,

³⁴Ɗif n’a sumna gaiki ɗa ki yimiŋ maini ahini fuŋ ɵa, maini ktai n’arbaki nɵa, aga ki diriŋ maini siki dama nɵa, buri tiki lai ki ɗisi ka aŋ ɗai zi zak midini afti n’Egipte, Epiɗ-ɗai Alaw na wiiki muta.

³⁵Ki meefeŋ Won hlai na ki ɗa kiti mogoni wala, zaw ki tili gumani wala zaw, ki ŋi wala na gaglai zaw na barai, Epiɗ-ɗai Alaw na wiiki muta.

³⁶Kilo na wiiki aga a za ɗa a kilo na jre, wala n’a kata gumani wazagai a na jira, zi ŋi wazagai ɗa paŋ a na jre ɗa lai. Epiɗ-ɗai Alaw na wiiki n’a milikisi edi midini afti n’Egipte par muta.

³⁷Gadai zi ɗû gaini gadai zi ɗiyi na wiya ki yimiŋ, ki zi pini lai, EPIƊ-ƊAI muta.