Read Mousgoum Levitekai 2 Bible Online

Levitekai 2 - Mousgoum bible

Levitekai 2

¹Na ɓa ɗif a dara a za ɓaka wiini EPIƊ-ƊAI gaini ali seyem ɗa, aga a zaŋ gaini avudi, a ma emel midini, a mula wazagai zi ɗûgûdi zi lûgûzi midini lai.

²Asakal par a kaŋ wiiɗi paakai zi ɓaka n’alini Aaron, ktai arbaɗi a mula tiy zuguɗ pini avudi na gaini zilni gaini emel ɗa, a tika wala zi ɗûgûdi zi lûgûzi gaini hlaini paŋ lai, pai zi ɓaka ɗa a yaŋ midini gûwiŋ zi ɓaka ɗa aŋ wala zi ɵi humok. Hanɗa a ɓaka na afu a yaŋ edi, a wala zi ɗûgûdi zi lûgûzi n’a ɵiɗiti agulni EPIƊ-ƊAI azumai.

³Pini wala zi ɓaka n’a hina a wiini Aaron gaiɗi alini, buri a wala na sɗik gara, buri a hinasi pini ɓaka n’e yiŋ edi gaini afu burini EPIƊ-ƊAI.

⁴Na ɓa ku zini ɓaka wiini EPIƊ-ƊAI gaini ali seyem n’e diŋsi warni fur, aga ku zaŋ gaini avudi na hiniŋ gaini gato na is arni kai n’e hiɗiŋ gaini emel zaw gaini gamla na is arni kai n’e mi emel sini.

⁵Na ɓa ku za ɗa a ɓaka na gaini ali seyem n’e diŋ war wala na parkaɗak, aga a za gaini avudi n’e hiɗiŋ gaini emel na is arni kai.

⁶Asakal na ku haɗaŋ li edi agogoi agogoi, ku ma emel sini, hanɗa a ɓaka na gaini ali seyem.

⁷Na ɓa ku za ɗa a ɓaka n’e diŋ war langa n’agwi na gaini pini mogo tiɓ, avudi aga e diŋ arni emel.

⁸Nɵa ku kasi ɓaka na gaini ali seyem na ku zizinaŋ burini EPIƊ-ƊAI, ku siŋni wiini pai zi ɓaka, kapai a kaŋ midini gûwiŋ zi ɓaka.

⁹War ɓaka hanɗa par pai zi ɓaka a tika bri n’e yikiŋ ɓa ɵini humok, a yaŋ midini gûwiŋ zi ɓaka, hanɗa a ɓaka na afu a yaŋ edi, a wala zi ɗûgûdi zi lûgûzi n’a ɵiɗiti agulni EPIƊ-ƊAI.

¹⁰Pini wala zi ɓaka n’a hina a wiini Aaron gaiɗi alini. Hanɗa a wala na sɗik gara buri a hinasi pini ɓaka n’e yiŋ edi gaini afu burini EPIƊ-ƊAI.

¹¹Aga ki zi ɓaka wiini EPIƊ-ƊAI gaini is arni kai, buri nɵa aga ki yi wala na is zaw emelni ami arni aŋ ɓaka n’e yiŋ edi gaini afu burini EPIƊ-ƊAI kai zaŋ.

¹²Ki kiɗi ki kiŋsi wiini EPIƊ-ƊAI arbani merfeŋni seym, amma aga ki kiŋ midini gûwiŋ zi ɓaka aŋ ɓaka n’e yiŋ edi gaini afu n’a ɵiɗiti agulni EPIƊ-ƊAI azumai ɗa kai zaŋ.

¹³Ɓaka n’aga ku zaŋ paŋ ku mula manta sini, muduku aga a wula gaini manta na sini ɓaka kai zaŋ, buri a siŋka midini bonu n’Alaw a zaŋ gaiki, buri nɵa, ɓaka n’aga ku zaŋ paŋ ɗa, ku kasi manta na midini lai.

¹⁴Na ɓa ku kasi ɓaka na gaini alini seyem aŋ merfeŋni seyem wiini EPIƊ-ƊAI ɗa, aga ku zaŋsi maini nɵa: Ku zibiya midini wai ɗa huw huw, zaw ku haaraŋ har har, Won hlai na ku dara ku kaŋsi ɗa.

¹⁵Ku ma emel sini, ku mula wazagai zi ɗûgûdi zi lûgûzi midini lai. Hnaɗa a ɓaka na gaini ali seyem.

¹⁶Asakal hanɗa pai zi ɓaka a ya bri n’e yikiŋ ɓa: "Slini humok", a mula wai zi hiri agwi, a ma emel agwi, gaini wazagai zi ɗûgûdi zi lûgûzi paŋ lai. A tika wala zi ɗûgûdi zi lûgûzi gaini hlaini paŋ lai. Hanɗa a ɓaka n’e yiŋ edi gaini afu burini EPIƊ-ƊAI.