Read Mousgoum Levitekai 20 Bible Online

Levitekai 20 - Mousgoum bible

Levitekai 20

¹EPIƊ-ƊAI a miɗini wiini Musus:

²Ku miɗiɗi wiiɗi aliɗi Izrayel ɓa: Asiya asiya paŋ ɗif na Izrayel, zaw ɗif zi zak n’a na arbaki, n’a sa ahini ktai li aŋ ɓaka wiini Alaw Molek aga a nava fiɗi n’edi. Ɗai na midini aftiki aga e fiɗiŋ edi gaini kiryit.

³Ta lai aga mu faka amai sini ɗif hanɗa, aga mu birgaŋ edi arbaɗi pinzibani par buri a sa ahini ktai aŋ ɓaka wiini alaw Molek. A bunda hlaiŋa na sɗik hi-hir, a kasi miisi sini yikiŋa na sɗik.

⁴Na ɓa ɗai na midini aftiki e dûgi arɗi sini sdani na meefeŋ n’a zaŋ ɗa,

⁵Ta dama aga mu faka amai sini ɗif hanɗa gaiɗi piɗi humunini, aga mu birgiɗi edi arbaɗi pinzibaɗi par ni gaiɗi nagai paŋ n’e zi ɵeŋni alaw Molek maini ni nɵa lai, e hûrgi ɗa azumai wuzani Alaw na jre ɗa kai.

⁶Na ɗif a zilba sezeɗi ɗai zi mri aga mu faka amai sini, mu birgaŋ edi arbaɗi pinzibani par,

⁷buri nɵa ki zi siki edi sɗik kapai ki simni sɗik, buri Epiɗ-ɗai Alaw wiiki muta.

⁸Ki yimi gadaiŋa zi ɗiyi, ki zi pini lai, EPIƊ-ƊAI n’a ziki edi sɗik muta.

⁹Buri nɵa asiya ɗi paŋ n’a muɗa seŋ na ɗewek wiini epini zaw wiiɗi emini a nava fiɗi n’edi, buri a muɗa seŋ na ɗewek wiini epini gaiɗi emini, felni aga a zilba tini.

¹⁰Won hlai na ɗif a za maɵara li gaiɗi munini maini, ɗif zi maɵara gaiɗi muni zi maɵara e nivi fiɗi n’edi.

¹¹Na ɓa ɗif a fana gaiɗi munini epini ɗa, a kasi na ɗa a siyer midini epini, gaini sulogoiɗi aga e nivi fiɗi n’edi, felɗi aga a zilba tiɗi lai.

¹²Won hlai na ɗif a fana li gaiɗi munini ahini, gaini sulogoiɗi aga e nivi fiɗi n’edi, e zi ɗa a wala zi hawai, felɗi aga a zilba tiɗi lai.

¹³Na ɓa ɗif a fana gaini maini na wus, maini n’e fini gaiɗi muni ɵa, e zi ɗa a wala zi hawai, aga e nivi fiɗi n’edi gaini sulogoiɗi, felɗi a zilba tiɗi.

¹⁴Na ɗif a miliɗi aŋ falakai ɗa, muni gaiɗi ahiɗi, a wala zi siyer gara, aga e yiɗi edi ni gaiɗi falakai na sulu ɗa. Nɵa wala na hi-hir hanɗa aga a za arbaki kir kai.

¹⁵Na ɓa ɗif a duɓura gamaw li gaini wala n’ezini puɗu ɗa, ki fiŋ edi, ki fiɗi wala n’ezini puɗu lai.

¹⁶Na ɓa muni te duɓura gamaw li gaini wala n’ezini puɗu ɗa ki fiɗiti edi gaini wala n’ezini puɗu lai; e nivi fiɗi n’edi, felɗi a zilba tiɗi lai.

¹⁷Na ɓa ɗif a tikiti tawalni n’ahini epini zaw ahiɗi emini aŋ muni, e fini gaiɗi marɗi, a wala zi siyer gara, aga e nivi fiɗi n’edi wuzani arɗi ɗai ɗi paŋ buri a fana gaiɗi tawalni, meefeŋni a zilba tini.

¹⁸Na ɓa ɗif a fana gaiɗi muni Won hlai na walaɗi falakai aŋ siɗi, nagai sulu paŋ aga e birgiɗi edi arbaɗi ɗai par buri e kiti miɗi aŋ tili fel n’a naka.

¹⁹Aga ku fana gaiɗi tawalɗi amuku zaw tawalni apuku na muni kai, na ɓa ɗif a fana li gaiɗi zigelini n’amlai tar ɗa, meefeŋɗi a zilba tiɗi.

²⁰Na ɓa ɗif a fana gaiɗi munini epini, a kasi na ɗa a siyer midini tawalni epini, meefeŋɗi a zilba tiɗi, e wii kai haa e mri ɵa.

²¹Na ɓa ɗif a tikiti munini tawalni aŋ munini a wala na hi-hir, a kasi na ɗa a siyer midini tawalni, aga e wii ali kai.

²²Gadaiŋa zi ɗû gaini gadaiŋa zi ɗiyi ki yimiŋ, ki zi pini lai, kapai afti na mu kiki aŋ simni woni ɗa aga a huŋvikisi edi kai.

²³Ki zi pini gadai zi ɗiyi na wiiɗi ɗai n’aga mu birgiɗi edi wuzaki ɗa kai. Nagai e bizi ma e zi wazagai na maini hanɗa nɵa ɗa.

²⁴Buri nɵa mu miɗika ya ɓa, aftiɗi ɗa aga a hina aŋ wiiki, mu siŋki aŋ wiiki na ɗa muta, afti na pɗem na fiyaw gaini emelni ami a ka woni. Mu tikikisi arki sini ziba na zamai ɗa par muta Epiɗ-ɗai Alaw na wiiki.

²⁵Buri nɵa ki zi ɓraw arbani wazagai n’ezini puɗu puɗu gaini na haharai, arbani wazagai zi ɗufli na haharai gaini na hilu, kapai ki kisi tusa miɗiki gaini wazagai n’ezini puɗu puɗu, zaw wazagai zi ɗufli, zaw wazagai n’a muguza midini afti paŋ, na mu tikini arni edi ɓa a haharai ɗa kai.

²⁶Aga ki zi siki edi sɗik buriya, buri mu milikisi edi pinziba na zamai ɗa par kapai ki simni aŋ na wiya.

²⁷Na ɓa ɗif na wus zaw na muni a na zilba sezeɗi ɗai zi mri ɗa, aga e nivi fiɗi n’edi, e fiɗiɗi edi gaini kiryit, felɗi a zilba tiɗi lai.