Read Mousgoum Levitekai 21 Bible Online

Levitekai 21 - Mousgoum bible

Levitekai 21

¹EPIƊ-ƊAI a miɗini wiini Musus: miɗiɗi wiiɗi paakai zi ɓaka n’alini Aaron ɗa ɓa: Pai zi ɓaka aga a bunda sini hi-hir gaini titimini kopoŋni zigelni n’a mra kai,

²sai a tetema ɗa a kopoŋni zigelni na amai haɵ tar maini: emini, zaw epini, ahini na wus, zaw na muni, zaw tawalni na wus,

³buriɗi tawalni na muni na te tika wus kai hai ɗa, a kiɗa a tika tini siɗi buri te sa edi sini wus kai hai, te pɵa war pakatai na wiini epiɗi ɵa.

⁴Ni ɗa a ɗif n’abai arbaɗi zagalakaini aga a bunda sini hi-hir kai kapai a ɓa hormoni edi kai.

⁵Paakai zi ɓaka e ɵi mini ayirɗi amai wulla kai, e fiɗi muɗugwi na galaiɗi edi kai, e ɓisi siɗi kaalai Won hlai na mri a za li siɗi zagalakaiɗi ɗa.

⁶Nagai aga e siɗi edi mini sda na wiya, e kisi miisi sini yikiŋa kai buri ɓa aga e kisi ɓaka n’aga e yiŋ edi gaini afu burini EPIƊ-ƊAI, n’a simi na wiya wuza e ɗi nagai, nɵa aga e simni sɗik.

⁷Pai zi ɓaka aga a tikiti te muni zi zawar, zaw muni na te kɵa war zini maɵara gaini ɗif, zaw na te badasi pini wus par aŋ muni kai. Buri pai zi ɓaka a na sɗik buri sda na wiya.

⁸Aga ki tiliɗi paakai zi ɓaka aŋ ɗai na sɗik, buri e kiŋasi simi na wiya ta Alaw na wiiki ɗa e ɗi nagai. Aga ki tiliɗi aŋ ɗai na sɗik maini na mu na sɗik nɵa, buri ta EPIƊ-ƊAI mu na sɗik.

⁹Na ɓa ahini pai zi ɓaka na muni te ɓa hormoɗi edi war zini zawar ɗa, te tika edi na ɗa a hormo na wiini epiɗi, e yiti edi gaini yi.

¹⁰Pai zi ɓaka n’abai a abai midiɗi marni na paakai zi ɓaka ɗa, e siŋ edi mini sdani gaini mini emel n’e tiki ɗai war sda gaini midini war mefeŋ n’a tika sda warni ɗa, a wa sapa na sɗik sini lai, a hina ayir na midini gaini tûkûsi kai, a ŋirwa sapa na sini edi kaalai.

¹¹A tora sini kopoŋ gobi kai, kapai a bunda sini hi-hir kai, koo ɓa a mra ɗa a epini, koo ɓa t'emini,

¹²Aga a niyasi edi war Hlai na sɗik par kai, kapai a kasi miisi sini Hlai na sɗik na wiini Alaw na wiini kai, buri ɓa aŋ gaini emel n’e tiki ɗai war sda gaini midini, EPIƊ-ƊAI muta.

¹³A tikitia aŋ muni t'ahiyagwi na ɓulmi na te fana gaini wus kai,

¹⁴aga a tikiti muni na war greŋ kai, muni nna te badasi pini wus par kai, muni na te ɓa hormoɗi edi burini zini zawar kaalai, amma aga a tikiti aŋ muni te ɓulmi na war pinzibani.

¹⁵Kapai a wa ali na haharai war pinzibaɗi kai, buri mu zaŋ edi sɗik muta EPIƊ-ƊAI.

¹⁶EPIƊ-ƊAI a miɗini wiini Musus:

¹⁷miɗini wiini Aaron ɓa: haa sini pinzibani na wuzani sek, ɗif na gaini tirki sini ta a kiɗa a halasi wuzani Gûwiŋ zi ɓaka aŋ zaŋa ɓaka kai.

¹⁸Ɗif n’aŋ gaini tirki sini paŋ ɗa a halasi wuza kai, ɓa na melveŋ, ɓa na dlai, a na merfeŋni gaini kirpi, a n’a wa zigla sini wuzani arni, zaw sini graŋni gaini ezini,

¹⁹ɗif na ezini, zaw graŋ aŋ gaini hiɗi,

²⁰ɗif na duɓani dobol gaini hûgi ya ha, zaw na tew arni, zaw na hurdai sini, zaw na kabrai kabrai sini, na moohomni gaini gɵi,

²¹Arbani pinzibani pai zi ɓaka Aaron ɗa, ɗif n’aŋ gaini tirki sini a kiɗa aŋ halasi aŋ za ɓaka n’e yiŋ edi gaini afu burini EPIƊ-ƊAI ɗa kai, buri ɓa aŋ gaini tirki sini a kiɗa a halasi aŋ za ɓaka wiini Alaw na wiini kai,

²²a kiɗa aŋ suma wala zi ɓaka n’a sa sini Alaw na wiini, ɓaka na sɗik gara gaini ɓaka na sɗik lai.

²³Amma aga a hala haa sini rido, a hala haa sini Gûwiŋ zi ɓaka kaalai buri ɓa aŋ gaini tirki sini kapai a kasi miisi sini Hlaiŋa na sɗik gaini wazagai na warni kaalai, buri mu ziɗi paakai zi ɓaka edi sɗik ɗa muta EPIƊ-ƊAI.

²⁴Musus a muɗa seŋ hanɗa wiini Aaron gaiɗi alini gaiɗi ɗai na Izrayel paŋ lai.