Read Mousgoum Levitekai 23 Bible Online

Levitekai 23 - Mousgoum bible

Levitekai 23

¹EPIƊ-ƊAI a miɗini wiini Musus:

²Miɗiɗi wiiɗi aliɗi Izrayel ɗa ɓa: Won hlai n’aga ki zi fet n’abakai buriya ɗa, aga ki yiki diŋgi na sɗik, diŋgi n’abakai n’aga ki ziŋ buriya ɗa a hanɗa:

³War mefeŋ na ɵaara ɗa ɗif a za sdani, amma mefeŋ n’ag'aŋ muguzak ɗa a Sabbat, a mefeŋ zi si amla, a mefeŋ na wiini diŋgi na sɗik na ki zi sda ktai woni kai, a Sabbat na wiini EPIƊ-ƊAI hlai paŋ n’aga ki simni woni.

⁴Fet n’abakai na burini EPIƊ-ƊAI gaini diŋgi na sɗik n’aga ki yikiŋ war mefeŋ na gaini ɗiyi zaw zaw ɗa a hanɗa:

⁵Mefeŋ doogo pi puɗu na wiini tile n’avut, koskoi na futi te nawa sek ɗa, te fet na wiini Paska na wiini EPIƊ-ƊAI.

⁶Mefeŋ doogo pi ɵim na wiini tile ni dama, te fet na wiini peŋ na gaini is arni kai burini EPIƊ-ƊAI ɗa, aga ki limi peŋ na is arni kai ɗa haa mefeŋ muguzak.

⁷War mefeŋ n’avut ɗa, aga ki yiki diŋgi na sɗik, ki zi sda ktai na gir warni kai.

⁸Mefeŋ na muguzak hanɗa paŋ, aga ki zi ɓaka n’e yiŋ edi gaini afu burini EPIƊ-ƊAI. Mefeŋ n’ag'aŋ muguzak ɗa ki yiki diŋgi na sɗik woni, aga ki zi sda ktai na gir warni kai.

⁹EPIƊ-ƊAI a miɗini wiini Musus:

¹⁰Miɗiɗi wiiɗi aliɗi Izrayel ɗa ɓa: Won hlai na ki cû li aha midini afti na mu dara mu siŋki ɗa, hlai n’aga ki hiɗi seyem ɗa, ki kitini vidi n’avut ɗa wiini pai zi ɓaka, a merfeŋni hiɗi na wiiki.

¹¹Pai zi ɓaka aga a za ɓaka gaiɗi vidi hanɗa burini EPIƊ-ƊAI, kapai ki nivi yum arni, aga a za ɓaka dawaini Sabbat.

¹²Mefeŋ n’aga ki zi ɓaka gaiɗi vidi hanɗa, ki zi ɓaka zi yi wiini EPIƊ-ƊAI lai gaini ahini adime na buza ɗaw, na tirki sini kai.

¹³Pra, ki siŋa kilo ɵaara na wiini avudi n’e hiɗiŋ gaini emel, aŋ ɓaka zi yi edi burini EPIƊ-ƊAI, aŋ lugos n’a ɵiɗiti agul, aŋ vin n’e miŋ azumai aŋ ɓaka, litir ktai gaini gal.

¹⁴Aga ki limi peŋ kai, ki limi seyem zi viŋgi kai, alini seyem na hahakai kaalai, wuzani mefeŋ n’a ɗiya zaw n’aga ki zini ɓaka wiini Alaw na wiiki woni ɗa. A na buriki haa kureɗ aŋ gadai n’a bunda kai, woɗi paŋ n’aga ki simni.

¹⁵Sini mefeŋ n’asakalni Sabbat par tar, ki piɵi kosko muguzak, a dara a muɗa sini mefeŋ na ki kitisi vidi n’avut aŋ ɓaka wuzani EPIƊ-ƊAI gaini de na wiini si na sini EPIƊ-ƊAI par ta.

¹⁶Ki piɵi mefeŋ doogo doogo ɵim haa sini mefeŋ n’asakalni Sabbat n’ag'aŋ muguzak, war mefeŋ ni ɗa, ki zini ɓaka wiini EPIƊ-ƊAI gaini seyem na hehe.

¹⁷Hlai na ki simni li woni paŋ ɗa, ki ziŋa ɓaka gaini peŋ sulu gaini de na wiini si na sini EPIƊ-ƊAI wuzani gûwiŋ zi ɓaka, peŋ paŋ e ziŋ gaini avudi agoda hu gaini is arni kai, ɓaka hanɗa e ziŋ gaini merfeŋni seyem n’e hiɗiŋ avut.

¹⁸Pra, sini peŋ ɗa, ki kisi alini adumai muguzak na tirki sini kai, na buza ɗaw ɗaw, gari ktai, gamalakai sulu, wazagai hanɗa paŋ e zi ɓaka zi yi wiini EPIƊ-ƊAI gaini, a tapa gaini avudi lai, gaini vin n’e miŋ azumai aŋ ɓaka lai, a za aŋ ɓaka zi yi, aŋ itir zi ɵiɗiti agulni EPIƊ-ƊAI azumai.

¹⁹Ki zi ɓaka na burini tuwur gaini hek na ktai ɗa, ki zi ɓaka zi ɵeɗ gaini alini adumai na sulu na buza ɗaw ɗaw lai.

²⁰Pai zi ɓaka aga a za ɓaka wuzani EPIƊ-ƊAI gaini de na wiini si na sini EPIƊ-ƊAI gaini alini adumai na sulu gaini peŋ n’e ziŋ gaini merfeŋni seyem n’a naiya avut ɗa lai. A wazagai na sɗik na burini EPIƊ-ƊAI, na asakal par aga a sa sini pai zi ɓaka.

²¹Yuvai ni ɗa aga ki ɵini piɗi marki, aga ki zi diŋgi na sɗik, aga ki zi sda na gir ktai kai. Hanɗa a gadai n’a kiɗa a bunda buriki kai, a hina ɵa wuzaki, hlai n’aga ki simni woni paŋ.

²²Won hlai na ki hiɗi seyemki ɗa, aga ki hiɗiŋ haa edi war hagani vuwaiki ta ta kai, aga ki viri helek n’a hina piki kaalai, ki hiniŋɗi wiiɗi na murgakai gaiɗi morkokai n’e simni gaiki. Epiɗ-ɗai Alaw na wiiki muta.

²³EPIƊ-ƊAI a miɗini wiini Musus:

²⁴Miɗiɗi wiiɗi aliɗi Izrayel ɗa ɓa: mefeŋ n’avut na wiini tile n’ag'aŋ muguzak, buriki a mefeŋ zi si amla, a mefeŋ na wiini ɵini humok, a mefeŋ na wiini sura zi firiyi na ki yiki diŋgi na sɗik warni lai.

²⁵Ki zi sda ktai na gir warni kai, ki zi ɓaka n’e yiŋ edi gaini afu burini EPIƊ-ƊAI warni lai.

²⁶EPIƊ-ƊAI a miɗini wiini Musus:

²⁷Pra, mefeŋ n’ag'aŋ doogo na wiini tile n’ag'aŋ muguzak ni dama, a mefeŋ n’abai na wiini hinini tuwur, aga ki yiki diŋgi na sɗik, ki tiki sai, ki zi ɓaka n’e yiŋ edi gaini afu wiini EPIƊ-ƊAI woni lai.

²⁸War mefeŋ hanɗa aga ki zi sda ktai kai, a mefeŋ n’abai na wiini hinini tuwur, n’e zi de na wiini hinini tuwur miɗiki woni wuzani Epiɗ-ɗai Alaw na wiiki,

²⁹nɵa asiya ɗi paŋ n’a tika sai war mefeŋ hanɗa kai ɗa, aga e birgiŋ edi arbaɗi ɗaini par.

³⁰Asiya ɗi paŋ n’a zali sda war mefeŋ hanɗa aga mu burgaŋ edi arbaɗi ɗaini par.

³¹Aga ki zi sda ktai kai, hanɗa a gadai n’a kiɗa a bunda buriki kai, a hina ɵa haa wuzaki sek, hlai n’aga ki simni woni paŋ.

³²Buriki a Sabbat, a mefeŋ zi si amla, n’aga ki tiki sai woni, sini mefeŋ na ɵeeŋe koskoi par haa sini mefeŋ na doogo koskoi ta, aga ki hini siki amla war mefeŋ hanɗa.

³³EPIƊ-ƊAI a miɗini wiini Musus:

³⁴Miɗiɗi wiiɗi aliɗi Izrayel ɓa: War mefeŋ na doogo pi ɵim na wiini tile n’ag'aŋ muguzak ɗa, te fet na wiini gumu, te za haa mefeŋ muguzak aŋ kol na sini EPIƊ-ƊAI.

³⁵Mefeŋ n’avut ɗa ɗai aga e yiki diŋgi na sɗik, ki zi sda ktai na gir warni kai.

³⁶Mefeŋ na muguzak hanɗa paŋ, aga ki zi ɓaka n’e yiŋ edi gaini afu burini EPIƊ-ƊAI, mefeŋ n’ag'aŋ mitwis ki yiki diŋgi na sɗik, ki zi ɓaka n’e yiŋ edi gaini afu burini EPIƊ-ƊAI, hanɗa a dibiɗi fet ɗa, ki zi sda ktai na gir warni kai.

³⁷Hanɗa a fet n’abakai na burini EPIƊ-ƊAI, n’aga ki yiki diŋgi na sɗik woni, aŋ zi ɓaka n’e yiŋ edi gaini afu burini EPIƊ-ƊAI, gaini ɓaka zi yi, gaini ɓaka na gaini alini seyem, gaini ɓaka zi ɵeɗ gaini vin zi mi azumai wiini EPIƊ-ƊAI lai pini deni n’a za gaini war mefeŋni paŋ.

³⁸Ɓaka hanɗa paŋ, ki miliŋ sini ɓaka na ki ziŋ war Sabbat ɗa, sini like gaini ɓaka na ki ziŋ pini ɵinini-ha, zaw pini dirini ɗif tizaw sini EPIƊ-ƊAI.

³⁹Mefeŋ doogo pi ɵim na wiini tile n’ag'aŋ muguzak, asakalni hiɗini seyem na war vuwaiki, aga ki ziti fet burini EPIƊ-ƊAI haa mefeŋ muguzak. Mefeŋ n’avut a mefeŋ zi si amla, n’ag'aŋ mitwis nɵa lai.

⁴⁰Mefeŋ n’avut ki piyi alini luwuŋ na pɗamai tiki gaini goyer hura gaini tini luwuŋ na ɵimani sini marni hisik gaini luwuŋ sol n’a diya agoɗom wulani ra. Aga ki firiyi wuzani Epiɗ-ɗai Alaw na wiiki haa mefeŋ muguzak.

⁴¹Buza paŋ aga ki ziti fet na buriya hanɗa haa mefeŋ muguzak, a gadai n’a bunda. Hanɗa a gadai n’a kiɗa a bunda buriki kai haa wuzaki sek. War tile n’ag'aŋ muguzak paŋ ki ziti fet hanɗa.

⁴²War mefeŋ na muguzak hanɗa, ki simni war gumu. Ahiɗi Izrayel paŋ a sumna war gumu.

⁴³Kapai wuzaki sek ɗa, aliki gaiɗi tiyakaiki e siɗi ɓa, Won hlai na mu miliɗisi tiyakaiɗi edi midini afti n’Egipte par e simni war gumu. Epiɗ-ɗai Alaw na wiiki muta.

⁴⁴Musus a miɗiɗi wiiɗi aliɗi Izrayel midini fet n’abakai n’aga e ziŋ burini EPIƊ-ƊAI ɗa maini hanɗa nɵa.