Read Mousgoum Levitekai 24 Bible Online

Levitekai 24 - Mousgoum bible

Levitekai 24

¹EPIƊ-ƊAI a miɗini wiini Musus:

²Miɗiɗi wiiɗi aliɗi Izrayel buri e piyikusi emel na wiini luwuŋ Olive na gaini futini, kapai koskoi koskoi paŋ ɗa, e tiki afu war lampa,

³Aaron a ɗiya wala n’e higi lampa sini amlai war gumu n’e nivi gaini EPIƊ-ƊAI woni, anene par wuzani rido n’e ɵiŋ amai arni Zunduk na gaini alini fuŋ na babɗamai na wiini bonu warni. Lampa ɗa aga a ya koskoi par haa hlai a sɗa edi wuzani EPIƊ-ƊAI kûreɗ-kûreɗ, a gadai n’a kiɗa a bunda buriki kai haa wuzaki sek.

⁴Aaron aga a haga lampa n’a ya amai sini wala n’e higi lampa sini zi or na hilu wuzani EPIƊ-ƊAI kûreɗ-kûreɗ.

⁵EPIƊ-ƊAI a miɗini wiini Musus: ku mula avudi na kriiɗ, ku pa gamla doogo pi sulu, gamla paŋ kilo ɵaara ɵaara.

⁶Ku mulaŋ amai midini marni arni sulu, ɵaara woni hlai ktai, ɵaara woni hlai ktai, midiɗi tabel na zi or na hilu wuzani EPIƊ-ƊAI.

⁷Amai midini peŋ na ɵaara ɵaara ɗa, ku mula wala zi ɗûgûdi zi lûgûzi na gaini futini, kapai e yiŋ aŋ wala zi ɵi humok war balamni peŋ ɗa, hanɗa a ɓaka n’e yiŋ edi gaini afu burini EPIƊ-ƊAI.

⁸Sabbat Sabbat paŋ, aga e miliŋ wuzani EPIƊ-ƊAI maini hanɗa nɵa haa kureɗ, aliɗi Izrayel aga e si wazagai hanɗa, hanɗa a bonu n’a sɗa aŋ vada edi kai.

⁹Gamla hanɗa a hina wiini Aaron gaiɗi alini, e limiŋ war Hlai na sɗik, buri ɓa, buriɗi nagai a wala na sɗik gara, n’e tikiŋsi war ɓaka n’e yiŋ edi gaini afu burini EPIƊ-ƊAI par, a bri na wiiɗi ɵa haa kureɗ.

¹⁰Mefeŋ ktai, seŋ a za aha war kaŋ, ɗif ktai n’emini te muni na Izrayel, epini ɗa a ɗif n’Egipte a hala arbaɗi aliɗi Izrayel, hiy a niya arbani gaini ɗif na tamaini e ɗi ɗai na Izrayel ca,

¹¹ɗif n’emini t'ahiɗi Izrayel ɗa a muɗa seŋ na ɗewek sini Alaw a tirkaŋ lai, nɵa e kiŋsi wuzani Musus. Emini e yikiti ɓa: Selomit t'ahini Dibri war pinzibani Dan.

¹²E dûgûŋ war hlai ktai duk, e mili ɗai mini ca aŋ giɗimiŋ, e biyi miɗi n’EPIƊ-ƊAI aga a saŋ ɗa.

¹³EPIƊ-ƊAI a miɗini wiini Musus:

¹⁴Yimasi ɗif n’a tirkaŋa ɗa edi war kaŋ par, nagai paŋ n’e tiliŋ a na tirkaŋa, e ɵini mini lai ɗa e tiki tiɗi midini, asakal par ɗai na doogo paŋ e fiɗiŋ edi gaini kiryit.

¹⁵Aga ku miɗiɗi wiiɗi aliɗi Izrayel ɗa ɓa: Na ɓa a tirka Alaw na wiini li, tuwur hanɗa a zilba tini,

¹⁶Nɵa, ni n’a muɗa seŋ na ɗewek sini yikini EPIƊ-ƊAI ɗa, aga a nava fiɗi n’edi, ɗai na doogo paŋ aga e fiɗiŋ edi gaini kiryit, koo ɓa ahi-fuŋ, a na morkoi a nava fiɗi edi buri a muɗa seŋ na meefeŋ sini yikini Alaw.

¹⁷Na ɓa ɗif a fuɗa ɗif murɗek li, koo ɓa asiya ɗi, a nava fiɗi n’edi.

¹⁸Na ɓa a fuɗa wala n’ezini puɗu na wiini ɗif li, a bundaŋ gaini maini na karni.

¹⁹Na ɓa ɗif a zini huruk li wiini maini, e zini huruk ni sini ni ta lai.

²⁰Hiɗi buri hiɗi, arai buriɗi arai, sesiyeŋ burini sesiyeŋ. Aga ki zi sini ɗa a wala na ni a zaŋ sini maini ɗa lai.

²¹N'a fuɗa wala na ezini puɗu li a bundaŋ gaini maini, n’a fuɗa ɗif li, a nava fiɗi n’edi lai.

²²Tiki paŋ, gadai n’a ɗiya a na buriki paŋ, na morkoi kai, ahini fuŋ kaalai a na buriki paŋ, buri Epiɗ-ɗai Alaw na wiiki mu ta.

²³Musus a miɗiɗi gadai hanɗa wiiɗi aliɗi Izrayel. Asakal par e yimisi ɗif n’a tirka Alaw ɗa edi war kaŋ par, e fiɗiŋ edi gaini kiryit. Aliɗi Izrayel e zi pini gadai n’EPIƊ-ƊAI a siŋni wiini Musus.