Read Mousgoum Levitekai 25 Bible Online

Levitekai 25 - Mousgoum bible

Levitekai 25

¹Miɗiɗi huwuŋ sinai par EPIƊ-ƊAI a miɗini wiini Musus maini nɵa:

²Miɗiɗi wiiɗi aliɗi Izrayel, ku miɗiɗi ɓa: Hlai n’e cû li aha midini afti na mu dara mu siŋɗi ɗa, buza zamai ɗa afti sini aga amla, a Sabbat na burini EPIƊ-ƊAI.

³Aga ki bili seyem war vuwaiki haa buza ɵaara, ki ciwi tini luwuŋki zi vin ɗa edi, ki hiɗi seyemki, ki riwi alini luwuŋki lai.

⁴Amma buza n’ag'aŋ muguzak ɗa a buza zi si n’amla na wiini Afti, a Sabbat na burini EPIƊ-ƊAI, aga ki bili seyem warni vuwaiki kai, ki ciwi tini luwuŋki zi vin ɗa kaalai.

⁵Aga ki hiɗi seyem n’a diya kiini asakal hiɗi na war buza n’ag'aŋ ɵaara par kai, aga ki riwi alini luwuŋki zi vin n’a wa war buza na ki ciwi tini kai ɗa kai. A buza zi si n’amla na wiini afti.

⁶Seyem n’a diya kiini gaini alini luwuŋ n’a wa war buza zi si n’amla tiki aga ki simiŋ, tiki, bagakaiki na maɵagai gaiɗi na falakai, ɗif n’a za sda ahaki burini vrak gaini ɗif na morkoi n’a na ahaki, gulaini ɓa, ɗai n’e ɗa ahaki paŋ.

⁷Faraiki gaini wazagai na buza na midini aftiki paŋ aga a suma wazagai hanɗa lai.

⁸Aga ki pɵi buza muguzak muguzak azi muguzak, a za paŋ buza doogo doogo puɗu pi ɵeeŋe.

⁹War mefeŋ n’ag'aŋ doogo na wiini tile n’ag'aŋ muguzak ɗa e yibi fana kapai ɗai e ɵini, e sûûri sura zi firiyi; war mefeŋ n’abai na wiini hinini tuwur aga ki yibi fana midini aftiki paŋ.

¹⁰Aga ki miɗi edi midini buza na doogo doogo ɵim ɓa a buza na sɗik, ki ɓiki midini pili n’edi na wiiɗi ɗai na midini afti ɗa paŋ, buza hanɗa aga a za buriki aŋ buza zi firiyi. Asiya asiya paŋ n’arbaki aga a waya midini aftini zi bulum, war piɗi humunini humunini.

¹¹Buza n’ag'aŋ doogo doogo ɵim paŋ a buza zi firiyi, aga ki bili kai, ki hiɗi seyem n’a diya kiini kai, ki riwi alini luwuŋ zi vin na e ciwi tini edi kai ɗa kai.

¹²Buri ɓa a buza zi firiyi, a buza na sɗik buriki, aga ki simi wazagai n’a diya war vuwai kiini paŋ.

¹³War buza zi firiyi hanɗa, asiya ɗi paŋ a waya a tika vuwaini.

¹⁴Na ɓa ki zi ɗa asakala, ku wûrini wala edi wiini maiku, zaw ku wura wala tini par ɗa ɗa, ɗif aga a kara maini kai.

¹⁵Na ɓa ku wura wala tini maiku par, zaw ku wûrini wala edi sek wiini maiku ɗa, ku kataŋ sini buza zi firiti n’a vugasi ɗa par, gaini buza zi hiɗi n’a hina haa sini buza zi hiɗi na wuzaku sek ta ɗa.

¹⁶Na ɓa buza zi hiɗi a hina viya, aga ku wuraŋ edi farai viya, na ɓa buza zi hiɗi a hina viya kai ɗa, aga ku wuraŋ edi farai viya kaalai. Buri wûri a za sini hiɗi.

¹⁷Ɗif a kara maini kai, gaini hanɗa aga a siŋka edi ɓa hunai na pini Alaw na wiiki aŋ warki. Buri Epiɗ-ɗai Alaw na wiiki muta.

¹⁸Ki zi pin gadaiŋa zi ɗû, ki yimi gadaiŋa zi ɗiyi, ki zi pini lai, aga ki simni jam midini afti.

¹⁹Afti aga a sa seyemni, tiki aga ki simi haa ki vi, ki simni ɵeɗ midini afti lai.

²⁰Na ɓa ki ɗa hiini ɓa: Buza n’ag'aŋ muguzak ɗa aga mi simi ɗa a ma ɗa, mi sûûɗi kaalai, mi hiɗi kaalai na ɗa?

²¹Aga mu ɓiki war buza n’ag'aŋ ɵaara ɗa. Seyem n’aga ki hiɗiŋ warɗi ɗa, aga a za haa buza hu.

²²Aga ki sûûɗi ɗa war buza n’ag'aŋ mitwis, seyem na wel ɗa aga ki simiŋ haa war buza n’ag'aŋ ɵeeŋe ɗa ta. Haa seyem na war buza n’ag'aŋ ɵeeŋe ɗa a haɗasi aha; aga ki simi seyem na wel ɗa.

²³Vowai ɗa a wura edi gamai kai. Afti ɗa a wiya, tiki ki ɗi ɗai zi zak gaiɗi n’e ɗa buri hlai n’agwi kadai.

²⁴Midini afti na mu siŋki paŋ ɗa, aga ki hini futi buri ɗif a kiɗa a wura vowaini n’a wuraŋ edi pra.

²⁵Na ɓa tawalku a za li murga, a firya a wura galni vowaini ktai edi ɗa, ɗif n’a kiɗa a wura vowaini, zigelni n’amlai tar a kiɗa a bunda hlai na tawalni a wuraŋ edi ɗa.

²⁶Na ɓa ɗif, ɗifni n’a kiɗa a bundinisi walani aŋ kai, na ɓa a fuɗasi was a ni gai gdaŋni aŋ bunda hlaini ɗa,

²⁷a tika pini a pɵa buza ɗa sini buza n’a wuraŋ edi warni par, a wiyini farai edi wiini ɗif n’a wuraŋ ɗa agwiya agwiya haa a waisi war vowaini ɗa.

²⁸Na ɓa wala n’a wiyiŋni edi aŋ kai ɗa, hlai n’a wuraŋ edi a hina tini ɗif n’a wuraŋ ɵa, haa sin buza na wiini Firyi ta. Sin buza ni par, ɗif a waya midini vowaini pra.

²⁹Na ɓa ɗif a wura dalamni n’a na aha war fuŋ n’abai na gaini ɵaga amai sini su edi, futi te na buri a bundaŋ. E sini buza ɗa, sini mefeŋ n’e wûriŋ edi warni par ta. Futi na sa sini ɗa te na buza ɗaw bas.

³⁰Na ɓa dalam n’a na aha war fuŋ n’abai zi ɵaga ɗa haa buza dam, epin-gezani a bundaŋ kai ɗa, a hina tini ɗif n’a wuraŋ gaiɗi alini ɵa gamai, koo war buza zi Firyi tekeɗeɗi dalam hanɗa aga a sa sini epin-gezani kai.

³¹Dalam na war fuŋ n’agogoi na ɵaga amai sini kai ɗa, a na kalkal maini vowai ɗa ɵa, asakal buza dam par ɗif a kiɗa a bundaŋ bas, na ɓa a za ɵa kai ɗe, war buza zi Firyi ɗa, a sa wiini epin-gezani lai.

³²Fuŋ n’abakai na wiiɗi levitekai ɗa, gaini dalam n’aŋ war fuŋ n’abakai n’a sa aŋ wiiɗi ɗa, futi te na ɓa levitekai e bindiŋ bas. Ɗiyini mefeŋ aŋ kai.

³³Koo ɓa a wura dalam hanɗa a levite lai yekeɗeɗi, aga a wiyiŋni wiini epin-gezani war buza zi Firyi ɗa, buri ɓa dalam n’aŋ war fuŋ n’abakai na wiiɗi levitekai ɗa a bulumɗi na war Izrayel ɗa a ni ɵa ta.

³⁴Vowai n’aha sin fuŋɗi n’abakai gobi ɗa, a wura edi kai; a wiiɗi ɵa haa kûreɗ.

³⁵Na ɓa tawalku tumuŋ aŋ midini, gdaŋni a kiɗa a vurgaŋ kai, ku zina pini, koo ɓa a ɗif zi zak n’a na arbaki, na morkoi na gaini ezini blaŋ kapai a kiɗa a sumna arbaki.

³⁶Ku zilba riba sini par kai, ku paya wala zamai sini par kaalai, gaini hanɗa aga ku siŋka edi ɓa hunai na wiini Alaw t'aŋ warku, nɵa tawalki aga a sumna arbaki.

³⁷Ku sini farai kapai ku paya riba pini kai, na ɓa ku sini wala zi simi li ɗa, ku paya wala pini kaalai.

³⁸Ta m’Epiɗ-ɗai Alaw na wiiki, na mu milikisi edi war Egipte par aŋ siki afti na Ka naaŋ, kapai mu za aŋ Alaw na wiiki.

³⁹Na ɓa tumuŋku aŋ midini tawalku, na ɓa a wuruku sini li, ku zaŋ aŋ begeku kai.

⁴⁰Aga ku yimaŋ maini ɗif n’a zuku sda burini vrak ɵa, zaw maini morkoi na gaini ezini blaŋ nɵa, aga a za ɵeŋku haa sini buza na wiini fet zi firiyi ta,

⁴¹Nɵa aga a niyasi ahaku par gaiɗi alini, a waya aha arbaɗi ɗaini.

⁴²Buri ɓa, nagai na mu miliɗisi edi midini afti n’Egipte par e ɗi bagakai na wiya, aga e wûri edi maini n’e wûri bagakai edi nɵa kai.

⁴³Aga ku ŋa midini gaini gdaŋ kai, gaini hanɗa, aga ku siŋka edi ɓa hunai na wiini Alaw na wiiku t'aŋ warku.

⁴⁴Amma bagakai na maɵagai gaiɗi na falakai n’aga ki wûriɗisi war pinzibaɗi ɗai na ɵimaki par,

⁴⁵Ki kiɗi ki wûri arbaɗi aliɗi morkokoi n’e hilisi ahaki midini eziɗi yaw, n’e simni gaiki, zaw arbaɗi ɗai ɗi n’e zi fuŋ arbaki, n’e wii midini aftiki, nagai ɗa e ɗi bagakaiki,

⁴⁶n’aga ki hiniɗi aŋ bulum wiiɗi aliki, kapai asakalki sek ɗa, e hini aŋ bagakaiɗi marwai. Nagai ɗa, ki kiɗi aŋ ziɗi aŋ bagakaiki ɵa haa kureɗ, amma tawalakaiki n’aliɗi Izrayel ɗa, ɗif aga a ziɗi gir midiɗi kai.

⁴⁷Na ɓa ɗif zi zak, zaw n’a halasi aŋ morkoi gaini ezini blaŋ midini aftiki, na ɓa aŋ gaini farai, na ɓa ahiɗi Izrayel a tika tumuŋ tini a wûrini sini li wiini ɗif zi zak ɗa, zaw wiini ɗif na morkoi na gaini ezini blaŋ ɗa, zaw wiini pinzibani ɗif na morkoi ɗi ɗa,

⁴⁸Futi te na buri e bindisi ɗif na Izrayel ɗa aha, zigelni ktai a kiɗa a bundaŋsi.

⁴⁹Na ɓa tawalni aŋ kai ɗa, tawalni epini zaw zigelni n’amlai tar, zaw na war pinzibani a kiɗa a bundaŋsi. Na ɓa faraini a na ɗa, ni dama a bunda sini.

⁵⁰Nɵa e kitiŋ arbaɗi gaini epin-gezani ɗa, a pɵa buza n’a vuga sini buza n’a wura sini edi warni par haa sini buza na wiiɗi fet zi firiyi ta ɗa. Farai n’a vurgaŋ ɗa a na sini pɵani buza ɗa, farai na war buza dam ɗa a kata ɗa sini farai n’e siŋni wiini ɗif zi sda war yuvai ɗa.

⁵¹Na ɓa buza a hina wuzani sek viya ɗa, aga a vurga abaini farai n’epin-gezani a wuraŋ gaini ɗa.

⁵²Na ɓa buza na haa siɗi fet zi firiyi ta, a hina viya kai ɗa, a pɵaŋ ta, a vurga farai na midini ɗa.

⁵³Ɗif na Izrayel hanɗa a kiɗa a sumna ahani epin-gezani maini ɗif zi sda ɵa, a sini vrakni na war buza ɗa. Amma ki hini epin-gezani a zini gir midini kai.

⁵⁴Na ɓa a nava pili n’edi gaini futi hanɗa kai ɗa, gaiɗi alini aga e nivi pili n’edi war buza na wiiɗi fet zi firiyi ɗa.

⁵⁵Nkam, Aliɗi Izrayel ɗa e ɗi bagakai na wiya, e ɗi bagakai na wiya buri ɓa mu miliɗisi edi war Egipte par. Epiɗ-ɗai Alaw na wiiki muta.