Read Mousgoum Levitekai 26 Bible Online

Levitekai 26 - Mousgoum bible

Levitekai 26

¹Ki rgi alawai zamai zamai na jrekai kai ɗa kai; ki ɗiyi alaw zi rgi zaw ahi-fuŋ z'alaw amai wuzaki kai, ki mili ali-fuŋ na sini gaini ɗihi midini aftiki kapai ki hûrgi azumai wuzani kaalai, buri Epiɗ-ɗai Alaw na wiiki muta.

²Ki hini miɗiki a wula gaini Sabbat ɗa kai, ki sini hormo wiini hlaiŋa na sɗik, Epiɗ-ɗai Alaw na wiiki muta.

³Na ɓa ki ɗa zi pini gadaiŋa zi ɗû, na ɓa ki yimi gadaiŋa li, na ɓa ki ɗa zi pini lai ɗa.

⁴Aga mu siki faŋ war sartini, afti aga a wa seyemni, luwuŋ na war vowai aga a wa ali lai.

⁵Aga ki giɵi seyem ahiki haa sini ali luwuŋ zi vin ɗa ta. Ki riwi ali luwuŋ zi vin ɗa haa sini bilini seyemki ta lai. Wala zi simi aga a za siki viya. Ki simni ɵeɗ midini aftiki lai.

⁶Aga mu kasi ɵeɗ midini aftiki, wala ktai n’aga a huyiki war duvuk aŋ kai, aga mu birga Wazagai na tuwarai na war basga edi midini aftiki ki par, hatam aga a za midini aftiki kir kai.

⁷Gawki aga e rivi wuzaki, aga ki fiɗiɗi edi gaini kaɵkar.

⁸Ɗai n’Izrayel ɵim ɗa e birgi ɗai miya ɗaw, ɗai n’Izrayel miya ɗaw e birgi ɗai dubu doogo, ki fiɗiɗi edi gaini kaɵkarki lai.

⁹Aga mu za pɗem siki, mu bindiki ki sisiɗi viya, ki bindi viya, mu gɗima bonuŋa na mu zaŋ gaiki lai.

¹⁰Aga ki simi seyem na wel ɗa haa ki milisi pini n’a hina edi, ki mili na hehe war balamni.

¹¹Aga mu za hlaiŋa zi simni arbaki, aga mu bunda ara edi siki par.

¹²Kureɗ mu na gaiki, Ta m’Alawki, tiki kiɗi ɗaiŋa lai.

¹³Ta m’Epiɗ-ɗai Alaw na wiiki na mu plikisi edi warɗi Egipte par, kapai ki simni aŋ bagakaiɗi kir kai, mu haɗa jug zi begena wulaki edi Muta kapai ki hili arki amai kai, miɗiki gaini pi azumai kir kai.

¹⁴Na ɓa ki ɵini ma kai, ki zi pini gadaiŋa kaalai ɗa,

¹⁵Na ɓa ki bili edi sini gadaiŋa zi ɗû, ki miisi gadaiŋa zi ɗiyi, ki zi pini gadaiŋa kai, bonu na mu zaŋ gaiki, ki ɗûkliŋ daf lai ɗa,

¹⁶Aqa mu za siki maini nɵa: Aga mu kasi gir n’abakai zi mili hunai pini ɗif miɗiki: Vegglek n’a bunda ɗif huruf sek sek lai. Aga ki bili seyem war vowaiki, amma e simiŋ ɗa e ɗi gawki.

¹⁷Aga mu bunda ara edi siki par, gawki aga rɗi amai miɗiki, nagai n’e diriki kai ɗa aga e ŋi miɗiki, koo ɓa ɗif piki par kai maa, aga ki rûvi.

¹⁸Na ɓa ki ɵini ma kai ɗai ɗa, aga mu ziki gir burini tuwurki azi muguzak a suwa hanɗa pra.

¹⁹Aga mu vada gdaŋki na ki kûli siki gaini na ɗa edi, hlai n’amai ɗa aga mu bundaŋ gdaŋ maini kawai nɵa, aftiki mu bundaŋ gdaŋ maini kiya nɵa lai.

²⁰Aga ki kiyi siki edi kadai meere afti aga a wa seyemni kai, luwoŋai na midini afti aga a wa ali kir kaalai.

²¹Na ɓa ki pisi ara, ki ɵini ma kai ɗa, aga mu ziki gir a suwa hanɗa azi muguzak, na kata midini tuwurki na ki ziŋ ɗa.

²²Aga mu ɵinasi wazagai na buza par miɗiki, aga a fiɗiɗi aliki, aga a vada farani faraiki, aga a ɵiriki tiki edi, haa futi na ki hili warni a hina kadai su su.

²³Na ɓa gir hanɗa paŋ a gidiki kai, siki aŋ pi gaya ɵa ɗa,

²⁴Ta lai aga mu pa siki, aga mu ziki gir burini tuwurki azi muguzak a suwa hanɗa pra.

²⁵Aga mu kasi gaw miɗiki, buri ki hini bonu na mu zaŋ gaiki edi mak, nɵa aga ki ŋûyi aha war fuŋ n’abakai zi ɵaga, amma aga mu ɵinaɗi vlak arbaki, aga mu siki war tiɗi gawki lai.

²⁶Won hlai na mu ɗala simi na miki li ɗa, falakai doogo ɗi aga e tipi mini fur ktai aŋ zi peŋ, peŋ n’aga e kiŋkisi ɗa, agwi kadai, ki simiŋ ɗa ki vi gaini kai.

²⁷Gaini hanɗa paŋ na ɓa ki ɵini kai ɗai, ki pi gaya tiɓ ɵa ɗa,

²⁸Ta aga mu pa gaiki lai, gaini hiy n’abai, ta gaini ta mal aga mu ziki gir, a suwa hanɗa azi muguzak burini tuwurki.

²⁹Tiki aga ki limi neŋɗi aliki na maɵagai gaiɗi na falakai.

³⁰Aga mu hlai zi ɓaka na wiiki edi gaini gûwiŋ zi ɗûgudi zi lûgûzi ɗûgûdi, aga mu tapa kopoŋki midini kolkoɗaini alawaiki na jrekai kai na mu haɗaŋ azumai ɗa, aga mu tika hiiniŋa edi miɗiki par.

³¹Aga mu bunda fuŋki n’abakai paŋ edi aŋ greŋ, aga mu tuura hlaiki na sɗik edi, lugos na pɗem n’a ɵiɗiti agulni EPIƊ-ƊAI azumai na wiini ɓakaki ɗa, mu firiyaŋ kir kai.

³²Aga mu tuura aftiki edi Muta mal, gawki n’aga e hilisi e simni midini ɗa, aga e bindi hiyak.

³³Amma tiki ɗa aga mu ɵiriki edi arbaɗi pinziba na zamai aga mu hitimiki, aftiki aga a hina edi aŋ basga kadai, fuŋki n’abakai aga a hina aŋ deeɓer na gaini pi midini marni tiɓ tiɓ.

³⁴Nɵa buza n’aga ki ziŋsi edi tiɗi gawki ɗa, afti n’a hina edi ɗa sini aga a tika, si n’amla hanɗa a hina ezini mefeŋ zi si n’amla n’a za kai ɗa.

³⁵Nɵa afti aga a nava si n’amla, kapai si n’amla n’a ɓa edi won hlai na ki simni warni par ɗa a va amai.

³⁶Nagai n’aga e hini karɗi midini afti na wiiɗi gawɗi aga mu bindiɗi muhunakai, wuzani ɵimani luwuŋ na smer a ɵaŋsi azumai tekeɗeɗi, e rûvi wiiɗi tiɓ. E rûvi maini n’e rûvi wuzani gawɗi n’aŋ gaini wazagai zi hatam tini nɵa, aga e yiki azumai maini na ɗif a na tikasi futi piɗi ɵa.

³⁷Aga e yiki azumai midiɗi marɗi maiɗi ɗai n’e rivi wuzaɗi gawɗi n’e ɗa gaini wazagai zi hatam zi hatam nɵa. Paŋ ktai ɗif piɗi par kaalai. Aga e kiɗi aŋ ɗiyi miɗi gawɗi kai.

³⁸Aga e mri edi pinziba na zamai, aftiɗi gawki aga a simiki.

³⁹Nagai n’e hini piɗi karɗi aga e bindi hurafai sek sek buri tuwur na wiiɗi tyakaiɗi n’e ziŋ ɗa lai.

⁴⁰Amma meefeŋ na wiiɗi n’e ziŋ gaini na wiiɗi tiyakaiɗi ɗa, aga e miɗiŋ edi gaini miɗi ɓa: Tiyi mi zi meefeŋ abai gara sini Alaw, mi pi sini tiɓ.

⁴¹Aga e siɗi ɓa Ta mu pa siɗi tiɓ lai haa mu kiɗi edi midini afti na wiiɗi gawɗi, nɵa aga e niyisi azumai wuza, e siɗi lai ɓa e ɗi fu war jre kai. Aga e yimi gir n’e niviŋ buri meefeŋɗi siɗi lai.

⁴²Mada aga a kɵa gaini bonuŋa na mu zaŋ gaini Yakob gaini Isaak gaini Abraham ɗa lai. Mada aga a kɵa gaini ɵinini ha na mu ziŋɗi burini afti n’aga mu siŋɗi.

⁴³Hlai n’aftiɗi a hina li edi kadai, e ɗa midini kir kai, n’a nava si n’amla li, hlai n’e yimi gir n’e niviŋ burini meefeŋɗi siɗi li, buri ɓa azi pini gadaiŋa zi ɗû gaini gadaiŋa zi ɗiyi kai li ɗa,

⁴⁴koo ɓa e ɗa edi midini afti na wiiɗi gawɗi tekeɗeɗi, mu bunda ɗa ara edi siɗi par kai, mu bula ɗa a gaw siɗi kaalai. Aga mu vidiɗi edi kai, bonuŋa na mu zaŋ gaiɗi ɗa mu ɗuklaŋ kai. Buri ɓa Epiɗ-ɗai Alaw na wiiɗi Muta.

⁴⁵Mada aga a kɵa gaini bonu na mu zaŋ gaiɗi tiyakaiɗina mu pliɗisi edi midini afti n’Egipte par sini ziba zamai, viya e tiliɗi. Mu zaŋ ɵa ɓa kapai Ta EPIƊ-ƊAI mu sumna aŋ Alaw na wiiɗi.

⁴⁶Hanɗa a gadai zi ɗû gaini zi ɗiyi lai n’EPIƊ-ƊAI a ɗiyaŋ arbani gaiɗi aliɗi Izrayel. A siŋɗi war mini Musus amai midini huwuŋ Sinai