Read Mousgoum Levitekai 27 Bible Online

Levitekai 27 - Mousgoum bible

Levitekai 27

¹EPIƊ-ƊAI a miɗini wiini Musus:

²Miɗiɗi wiiɗi aliɗi Izrayel, ku miɗiɗi ɓa: Na ɓa ɗif a ha wala mini wiini EPIƊ-ƊAI ɓa aga a sini wala ɗa, a kiɗa a vurga farai ɗa sin kiɗini wala n’a saŋ edi aŋ wiini EPIƊ-ƊAI lai.

³Kitini a na maini nɵa: Ɗif na buzani sini caaɓa par haa doogo doogo ɵaara ta, vrakni sulai doogo doogo ɵim, sini sulai n’e zi gaini amlai war hlai na sɗik ɗa, na ɓa a wus ɗa.

⁴Amma na ɓa te muni ɗa, vrakɗi sulai doogo doogo hu.

⁵Ɗif na buzani sini ɵim par haa caaɓa ta ɗa, na ɓa ahiyogwi na wus vrakni sulai caaɓa, na ɓa te ahiyogoi na muni, sulai doogo lai.

⁶Na ɓa ahiyogwi n’a za tile ɗaw par haa buza ɵim ta, ahiyogwi na wus ɗa sulai ɵim, ahiyogoi na muni ɗa sulai hu lai.

⁷Ɗif na buzani sini doogo doogo ɵaara par ta amai sek, ɗif na wus ɗa sulai doogon pi ɵim, muni ɗa sulai doogo lai.

⁸Na ɓa ɗif n’a ha wala mini a na murga, gdaŋni a kiɗa a vurga sulai na midini ɗif n’a ha wala mini gaini kai ɗa, a ka ɗif hanɗa wuzani pai zi ɓaka; pai zi ɓaka a ɗiya vrakni sini kiɗini ɗif na murga n’a ha wala mini ɗa.

⁹Na ɓa ɗif a ha wala mini ɓa aga a sa wala n’ezini puɗu, na ɓa a wala n’e kiɗi e zi ɓaka wiini EPIƊ-ƊAI gaini ɗa, wala n’a saŋ wiini EPIƊ-ƊAI paŋ ɗa a wala na sɗik;

¹⁰Ɗif a kiɗa a bundaŋ gaini maini na zamai kai koo ɓa a na pɗem gara, koo ɓa a na pɗem gara kai, ɗif a bundaŋ kai. Na ɓa gaini hanɗa paŋ tekeɗeɗi ɗif a bundaŋ li ɗa, wazagai na sulu hanɗa paŋ a na sɗik burini EPIƊ-ƊAI.

¹¹Na ɓa ɗif a ha wala mini gaini wala n’ezini npuɗu na hilu kai, n’e kiɗi e zi ɓaka wiini EPIƊ-ƊAI gaini kai ɗa, e kisi wala hanɗa wuzani pai zi ɓaka.

¹²Pai zi ɓaka aga a kata farai n’a kiɗa a sumaŋ ta ɗa, sin i wala n’a talaŋ ɗa, ɗai e ɗiyi sini farai na pai zi ɓaka a ɗuklaŋ ta lai.

¹³Na ɓa epin-gezani a firiya a bundaŋsi aha ɗa, a vurga farai na pai zi ɓaka a ɗiyaŋ ta ɗa, a sa galni farai n’ag'aŋ ɵim midini ta lai.

¹⁴Na ɓa ɗif a sa dalamni li wiini EPIƊ-ƊAI, pai zi ɓaka a kata na wiini dalam sini dalam n’a talaŋ ɗa, ɗai e ɗiyi sini farai na pai zi ɓaka a ɗuklaŋ ta ɗa lai.

¹⁵Na ɓa epin-gezani dalam a firiya a bundaŋ ɗa, a sa farai na pai zi ɓaka a ɗuklaŋ ɗa, a sa galni farai n’ag'aŋ ɵim midini ta lai. Dalam ɗa a hina aŋ wiini.

¹⁶Na ɓa ɗif a sa galni vuwaini edi wiini EPIƊ-ƊAI li, ɗiyini wûrini a na sini seyem n’e kiɗi e biliŋ warni ta ɗa, na ɓa a vuwai n’a ɓa kilo miya hu na wiini Orge ɗa, a wura sulai doogo doogo ɵim.

¹⁷Na ɓa a sa vuwai hanɗa war buza na wiiɗi fet zi firiyi tar ɗa, virgi ɗa a farai n’aŋ gaini ɗiyi zaw ɗa.

¹⁸Na ɓa ɗif a sa vuwaini asakal buza na wiiɗi fet zi firiyi par ɗa, pai zi ɓaka a kata wûrini sini buza n’a hina wuzani sek haa siɗi fet zi firiyi ta, amma farai n’a sumaŋ ta ɗa a wayaŋ azumai dai ɗai.

¹⁹Na ɓa epin-gezani a firiya a bundaŋ ɗa, a sa farai na pai zi ɓaka a ɗuklaŋ ta ɗa, a sa galni n’ag'aŋ ɵim midini ta lai, vuwai ɗa a hina aŋ wiini.

²⁰Na ɓa a bunda vuwaini kai, a wuraŋ edi tini ɗif zamai kai, a kiɗa a bundaŋsi aŋ wiini kir kaalai.

²¹Vuwai hanɗa, war buza na wiiɗi fet zi firiyi ɗa, a wayasi tini epin-gezani kir kai, a vuwai n’aŋ gaini tusa midini, a sa siɗi paakai zi ɓaka buri a wala na sɗik burini EPIƊ-ƊAI.

²²Na ɓa ɗif a sa vuwai n’a wuraŋ gaini wûri wiini EPIƊ-ƊAI, a vuwai n’a navaŋ aŋ bulum tiɗi tamaini par kai ɗa,

²³pai zi ɓaka a kata faraini sini buza n’ahina wuzani haa sini buza na wiiɗi fet zi firiyi ta ɗa. Epin-gezani a sa farai n’a ɗukla ɗa war yuvaini dama; faraini ɗa a wala na sɗik burini EPIƊ-ƊAI.

²⁴War buza na wiiɗi fet zi firiyi ɗa, vuwai hanɗa a waya tini epin-gezani n’avut n’a navaŋsi aŋ bulum siɗi tamaini par ɗa.

²⁵Kitini farai na wiini wazagai n’a sa sini EPIƊ-ƊAI paŋ ɗa, a za sini sulai n’e zi gaini amlai war Hlai na sɗik, na sulai zi arzaŋ na woni ktai te za gram doogo.

²⁶Ɗif a kiɗa a za ɵinini-ha wiini EPIƊ-ƊAI gaini ahi n’avut na wiini wazagai n’ezini puɗu puɗu kai, buri ɓa wala n’a wa avut paŋ, ɓa ahi ɵeŋ, ɓa ahini hek, ɓa zaw ahini adime ɗi ɗa a wiini EPIƊ-ƊAI.

²⁷Na ɓa a ahi n’avut na wiini wala na hilu kai ɗa, epin-gezani a bundaŋ, a vurga farai na pai zi ɓaka a ɗuklaŋ ɗa, a sa galni farai n’ag'aŋ ɵim na midini lai. Na ɓa a bundaŋ kai ɗa, e wiriŋ edi sini farai n’a ɗukla ta ɗa.

²⁸Pra, wala paŋ na ɗif a tusaŋ li burini EPIƊ-ƊAI, arbani wazagai ɗa a kiɗa a wuraŋ edi kai, a bundaŋsi kaalai koo ɓa a ɗif, a wala n’ezini puɗu puɗu, koo ɓa a vuwai na war bulumni. Wala n’a tusa li burini EPIƊ-ƊAI paŋ ɗa a wala na sɗik gara burini EPIƊ-ƊAI.

²⁹Koo ɓa a ɗif murɗek, na ɓa a tusa li ɗa e kiɗi e bindiŋsi kir kai, sai e fiɗiŋ gaini fiɗi.

³⁰Doogoni wala n’arni afti par paŋ, koo na wiini seyem, koo na wiini alini luwuŋ a wiini EPIƊ-ƊAI a wala na sɗik burini EPIƊ-ƊAI

³¹Na ɓa ɗif a firiya a bunda doogoni walani n’a saŋ ɗa, a sa farai na midini ɗa ta, a sa galni farai n’ag'aŋ ɵim ɗa midini ta lai.

³²Doogoni ɵaakai gaini adumai gaini haakai lai ɗa e pɵiŋ haa na te gaŋ doogo ɗa e bisi wala siɗi ɓas kapai e sitini wiini EPIƊ-ƊAI.

³³Epin-gezani a vara gaini viri arbani faraini kai, koo ɓa a na pɗem, koo ɓa a na pɗem kai a kiɗa aŋ bundaŋ kai, amma na ɓa a sali wala ezini maini ɗa, wazagai na sulu hanɗa paŋ a sɗik burini EPIƊ-ƊAI, a kiɗa a bunda kai.

³⁴Hanɗa a gadai n’EPIƊ-ƊAI a siŋni wiini Musus buri a siŋɗi wiiɗi aliɗi Izrayel amai midiɗi huwuŋ sinai.