Read Mousgoum Levitekai 3 Bible Online

Levitekai 3 - Mousgoum bible

Levitekai 3

¹Na ɓa ɗif a dara a za ɓaka zi bonu, na ɓa a yima ɗa arbani farani faraini par, a yima ɗa a gari zaw te ɵai ɗi ɗa, a yima aŋ kasi wuzani EPIƊ-ƊAI a na tirki sini kai.

²A tika tini midini wala zi fiɗi ta, a ɵa wulani mini Gumu n’e nivi gaini EPIƊ-ƊAI woni ɗa, asakal par paakai zi ɓaka n’alini Aaron e yiimi felni amai sini gûwiŋ zi ɓaka war galni na puɗu paŋ.

³Pini wala n’e fiɗiŋ li aŋ ɓaka zi ɵeɗ hanɗa par, wazagai n’aga a sa sini EPIƊ-ƊAI aŋ ɓaka zi yi ɗa a hanɗa: emel na warni gaini n’a yima sini wazagai na warni paŋ,

⁴ɓlaɓlamai na sulu gaini emel n’a yima sini gaini na sini mukuɗufni lai, eɵeɵet a tika edi gaini ɓlaɓlamai ɗa lai.

⁵Asakal par alini Aaron e yi hanɗa paŋ midini gûwiŋ zi ɓaka gaini ɓaka zi yi n’e miliŋ midini luwuŋ na mini afu. A ɓaka n’e yiŋ edi gaini afu, a wala zi lugos n’a ɵiɗiti agulni EPIƊ-ƊAI azumai.

⁶Na ɓa ɗif a za ɓaka zi ɵeɗ gaini adime zaw hek ɗi ɗa, aga a zaŋ gaini wala na wus zaw na muni na tirki sini kai.

⁷Na ɓa a kasi aŋ ɓaka ɗa a adime ɗa, a kaŋ wuzani EPIƊ-ƊAI,

⁸a tika tini midini wala zi fiɗi ta, a fuuɗaŋ mini Gumu n’e nivi gaini EPIƊ-ƊAI woni ɗa, asakal par alini Aaron e yiimi felni amai sini gûwiŋ zi ɓaka war gal na puɗu paŋ;

⁹Pini ɓaka zi ɵeɗ hanɗa par, wazagai n’aga a sa sini EPIƊ-ƊAI aŋ ɓaka n’e yiŋ edi gaini afu, a wazagai z'emel hanɗa: gɗeri gaini hlaiɗi, e ɗûkilitisi amai sini hoŋorni par, emel n’a yima sini wazagai na warni gaini emel na warni paŋ lai,

¹⁰ɓlaɓlamai na sulu gaini emel n’a yima sini, gaini na sini mukuɗufni, eɵeɵet a tika edi gaini lai.

¹¹Asakal par pai zi ɓaka a ya wazagai hanɗa paŋ amai midini Gûwiŋ zi ɓaka, a ɓaka n’e yiŋ edi gaini afu burini EPIƊ-ƊAI.

¹²Na ɓa ɗif a kitisi te hiiki, zaw a kaŋsi wuzani EPIƊ-ƊAI,

¹³a tikiti tini midini wala zi fiɗi ɗa ta, a fuɗaŋ mini Gumu na e nivi gaini EPIƊ-ƊAI woni ɗa, asakal par alini Aaron e yiimi felni amai sini gûwiŋ zi ɓaka war gal na puɗu paŋ.

¹⁴Wazagai n’aga a sa sini EPIƊ-ƊAI aŋ ɓaka zi ɵeɗ n’aga e yiŋ edi a hanɗa: emel n’a yima sini wazagai na warni gaini emel na warni paŋ lai,

¹⁵Ɓlaɓlamai na sulu gaini emel n’a yima sini, gaini na sini mukuɗufni, eɵeɵek a tika edi gaini lai.

¹⁶Asakal par pai zi ɓaka a ya wazagai hanɗa edi midini gûwiŋ zi ɓaka, a lugos na pɗem n’a ɵiɗiti agulni EPIƊ-ƊAI azumai, Emel na warni wala paŋ a wiini EPIƊ-ƊAI.

¹⁷Hanɗa a gadai n’a sɗa a bunda kai haa kureɗ, koo ki simni wata ɗi, wala n’a yika ɓa emel gaini wala n’a hyika ɓa emel aga ki simiŋ duk kai.