Read Mousgoum Levitekai 4 Bible Online

Levitekai 4 - Mousgoum bible

Levitekai 4

¹EPIƊ-ƊAI a miɗini wiini Musus:

²miɗiɗi wiiɗi aliɗi Izrayel maini nɵa, na ɓa ɗif war siɗi kai a za tuwur zi gadai n’EPIƊ-ƊAI a gada midini buri e ziŋ kai, zaw na ɓa a ha amai midini ktai arbani,

³Na ɓa a za tuwur ɗa a pai zi ɓaka n’a vara edi ɗaw gaini mini emel n’e tiki ɗai war sda gaini, na pini tuwur n’a zaŋ ɗa, a bindiɗi ɗai paŋ tuwarai aga a sa sini EPIƊ-ƊAI aŋ ɓaka na burini tuwur n’a zaŋ ɗa a gari na tirki sini kai.

⁴A kasi gari hanɗa mini gumu n’e nivi gaini EPIƊ-ƊAI woni wuzani EPIƊ-ƊAI, a tika tini midini ta, a ɵa wulani wuzani EPIƊ-ƊAI,

⁵pai zi ɓaka n’a vara edi ɗaw gaini mini emel n’e tiki ɗai war sda gaini, a ma pini felni gari agwi a kaŋ amlai war gumu n’e nivi gaini EPIƊ-ƊAI woni.

⁶A wûti ahi tini arni fel, fel hanɗa a yaamaŋ wuzani EPIƊ-ƊAI azi muguzak sini galni rido na war hlai na sɗik na anene sek.

⁷Asakal par pai zi ɓaka a tika fel zamai amai sini koŋni Gûwiŋ zi ɓaka na puɗu na wiini Gûwiŋ zi yi wala zi ɗûgûdi zi lûgûzi na pɗem n’a na amlai war gumu n’e nivi gaini EPIƊ-ƊAI woni wuzani EPIƊ-ƊAI. Pini felni gari n’a hina a maŋ azumai ezini Gûwiŋ zi ɓaka na wiini ɓaka zi n’a na anene par mini gumu na e nivi gaini EPIƊ-ƊAI woni.

⁸Wazagai z'emel paŋ n’a na sini gari n’e fiɗiŋ aŋ ɓaka na burini tuwur ɗa a mulaŋ paŋ, emel n’a yima sini wazagai na warni gaini emel na warni paŋ lai,

⁹ɓlaɓlamai na sulu gaini emel n’a yima sini, gaini na sini mukuɗufni, eɵeɵet a tika edi gaini lai.

¹⁰E mili wazagai hanɗa sini gari, sini ɓaka n’e fiɗiŋ aŋ bonu par nɵa, asakal par pai zi ɓaka a yaŋ midini Gûwiŋ na wiini ɓaka zi yi.

¹¹Amurni gari, neŋni paŋ, humokni gaini ɓaɓara, wazagai na warni gaini fulaini lai,

¹²a dara a muɗa neŋni gari n’a hina paŋ a kaŋ anene duɓani kaŋ ɗa par war hlai na hilu, hlai n’e pûkû bonuni wazagai z'emel woni ɗa, a yaŋ midini afuni luwuŋ n’abakai, midini hlai n’e pûkû bonuni wazagai z'emel ɗa woni.

¹³Na ɓa e zi meefeŋ e ɗi aliɗi Izrayel gaini hlaiɗi war siɗi kai, na ɓa wala n’e ziŋ ɗa e siɗiŋ ɓa a meefeŋ kai, na ɓa e hi amai midini ktai arbani gadai n’EPIƊ-ƊAI a gada midini ɓa e ziŋ kai, na ɓa e bindi li tuwarai burini wala n’e ziŋ ɗa,

¹⁴won hlai na tuwur hanɗa a mala edi arɗi li, ɗai na doogo e kisi gari aŋ ɓaka na burini tuwur, e kiŋsi mini gumu n’e nivi gaini EPIƊ-ƊAI woni,

¹⁵n’abakai n’arbaɗi ɗai n’e ɗa arbaɗi e tiki tiɗi midini gari ɗa ta ta wuzani EPIƊ-ƊAI, e ɵini wulani wuzani EPIƊ-ƊAI lai.

¹⁶Pai zi ɓaka n’a vara edi ɗaw gaini mini emel n’e tiki ɗai war sda gaini a ma pini fel ɗa agwi, a kaŋ amlai war gumu n’e nivi gaini EPIƊ-ƊAI woni.

¹⁷Pai zi ɓaka a wûti ahini tini, a yamaŋ wuzani EPIƊ-ƊAI azi muguzak sini galni rido na war hlai na sɗik gara.

¹⁸Asakal par a tika fel zamai amai sini koŋni Gûwiŋ zi ɓaka n’a na wuzani EPIƊ-ƊAI, amlai war Gumu n’e nivi gaini EPIƊ-ƊAI woni, a ma pini fel n’ahini ɗa azumai ezini Gûwiŋ zi ɓaka na wiini ɓaka zi yi n’a na anene par mini Gumu n’e nivi gaini EPIƊ-ƊAI woni ɗa.

¹⁹Wazagai z'emel n’a tapaŋ paŋ ɗa, a yaŋ midini Gûwiŋ zi ɓaka

²⁰A za gaini Gari hanɗa maini n’a za gaini Gari n’e zi ɓaka gaini burini tuwur ɗa nɵa, aga a zaŋ kal kal maini n’a zaŋ burini tiwur na wiini ni ɗa nɵa. Won hlai na pai zi ɓaka a za de na burini hinini tuwur na wiiɗi aliɗi Izrayel ɗa li, Alaw a siɗi ni burini tuwurɗi lai.

²¹A ka neŋni gari n’a hina anene duɓani kaŋ ɗa par, a yaŋ maini na wiini gari n’amai par ɗa nɵa. Hanɗa a ɓaka na burini tuwur na wiiɗi ɗai na Izrayel na doogo paŋ.

²²Na ɓa ɗif n’abai zi ɵi wuze, a za tuwur li war siɗi, a ha amai midini ktai arbani gadai n’Epiɗ-ɗai Alaw na wiini a gada midini buri e ziŋ kai, n’a bunda li tuwur burini hanɗa,

²³na ɓa a sɗa tuwurni n’a zaŋ ɗa li, buri hanɗa a kasi hek ktai na wus, na tirki sini kai.

²⁴A tika tini midini hekni ta, a ɵa wulani woni hlai n’e fiɗi wala zi ɓaka zi yi woni wuzani EPIƊ-ƊAI. Hanɗa a ɓaka na burini tuwur.

²⁵Pai zi ɓaka a wûti ahini tini arni fel na wiini wala n’e fiɗiŋ aŋ ɓaka na burini tuwur, a tikaŋ amai sini koŋni Gûwiŋ zi ɓaka na wiini ɓaka zi yi, asakal par a ma pini na ahina azumai ezini Gûwiŋ zi ɓaka na wiini ɓaka zi yi.

²⁶Wazagai z'emel paŋ a yaŋ midini Gûwiŋ zi ɓaka maini na wiini ɓaka zi bonu nɵa, Won hlai na pai zi ɓaka a za de na burini hinini tuwur na midini ɗif n’abai zi ɵi wuze ɗa li, tuwurni ɗa a nava girdi n’edi.

²⁷Na ɓa ktai arbaɗi ɗai na Izrayel a za tuwur war siɗi kai, a ha amai midini ktai arbani gadai n’EPIƊ-ƊAI a gada midini buri e ziŋ kai, na ɓa a bunda li tuwur burini wala n’a zaŋ ɗa,

²⁸na ɓa a sɗa tuwurni n’a zaŋ ɗa li, a kitisi hiki ktai na muni na tirki siɗi kai burini tuwurni n’a zaŋ,

²⁹a tika tini miɗini wala n’e fiɗiŋ burini tuwur ɗa ta, a ɵa wulaɗi hiki hanɗa, Won hlai n’e fiɗi wazagai zi ɓaka zi yi woni,

³⁰pai zi ɓaka a wûti ahini tini arni fel na wiini wala na e fiɗiŋ aŋ ɓaka na burini tuwur, a tikaŋ amai sini koŋni Gûwiŋ zi ɓaka na wiini ɓaka zi yi, asakal par a ma pini n’a hina paŋ azumai ezini Gûwiŋ zi ɓaka.

³¹Wazagai z'emel paŋ a tapaŋ maini n’e tipi na wiini ɓaka zi bonu nɵa, pai zi ɓaka a yaŋ midini Gûwiŋ zi ɓaka aŋ lugos na pɗem n’a ɵiɗitini agulni EPIƊ-ƊAI azumai. Won hlai na pai zi ɓaka a za de na burini hinini tuwur na midini ɗif hanɗa li, tuwurni ɗa a nava girdi n’edi.

³²Na ɓa ɗif n’a za tuwur ɗa a kasi ɗa adime aŋ ɓaka na burini tuwur ɗa, a kitisi t'adumi na muni na tirki siɗi kai.

³³A tika tini midini wala n’e fiɗiŋ burini tuwur ɗa, a ɵa wulaɗi aŋ ɓaka na burini tuwur Won hlai n’e fiɗi wazagai zi ɓaka zi yi woni ɗa.

³⁴Pai zi ɓaka a wûti ahini tini arni fel na wiini wala n’e fiɗiŋ aŋ ɓaka, a tikaŋ amai sini koŋni Gûwiŋ zi ɓaka na wiini ɓaka zi yi. Asakal par a ma pini n’a hina paŋ azumai ezini Gûwiŋ zi ɓaka hanɗa.

³⁵Wazagai z'emel paŋ a tapaŋ maini n’e tipi na wiini ɓaka zi bonu nɵa, pai zi ɓaka a yaŋ midini Gûwiŋ zi ɓaka gaini wazagai n’e yiŋ edi gaini afu burini EPIƊ-ƊAI aŋ bonu. Won hlai na pai zi ɓaka a za de na burini hinini tuwur na midini ɗif na tuwur hanɗa ɗa li burini tuwurni n’a zaŋ, tuwurni a nava girdi edi.