Read Mousgoum Levitekai 5 Bible Online

Levitekai 5 - Mousgoum bible

Levitekai 5

¹Won hlai ɗif a tala wala na meefeŋ, zaw a ɵina wala na meefeŋ, na ɓa e ɗa piyi ɗai n’e zi zaida midini wala n’a za ɗa, amma ni a muɗa midini wala n’a talaŋ kaalai, n’a ɵinaŋ kaalai, nɵa a bunda hi-hir, seŋ aŋ midini.

²Zaw na ɓa, ɗif war siɗi kai a tika tini sini wala ktai na hi-hir maini: kopoŋni wala n’edi buza na hi-hir, zaw na wiini wala n’ezini puɗu, zaw na wiini wala zi hidili na hi-hir ɗi, nɵa a bunda hi-hir, a tuwur, seŋ aŋ midini lai.

³Zaw na ɓa war siɗi kai a tika tini sini ɗif n’a bunda li hi-hir, zaw sini wala na hi-hir paŋ n’a kiɗa a bunda ɗif hi-hir paŋ, na ɓa a sɗa hanɗa li ɗa, meefeŋni a pɵa midini, seŋ aŋ midini.

⁴Zaw na ɓa ɗif war siɗi kai, a ha wala mini gaini hiini kai, koo ɓa wala zi hi-mi hanɗa a zini meefeŋ zaw a navaŋ ɗi ɗa, war wala paŋ na ɗif a ha wala mini gaini hiini kai ɗa, na ɓa a sɗa hanɗa li ɗa, seŋ aŋ midini.

⁵Won hlai na ɗif a sɗa meefeŋni li, war ktai arbani wazagai na mu yukuŋmusi hanɗa, a muɗa edi midini meefeŋni n’a zaŋ,

⁶asakal par kapai a zizina arbani gaini EPIƊ-ƊAI burini tuwur n’a zaŋ ɗa, a kitisi adumi zaw hiki ktai aŋ ɓaka na burini tuwur, nɵa pai zi ɓaka a za de na burini hinini tuwur midini ɗif hanɗa.

⁷Na ɓa ɗif gdaŋni a suma wûrini adime zaw hek kai ɗa, a kiɗa a kasi mugɵuwi sulu zaw dere sulu aŋ ɓaka wiini EPIƊ-ƊAI burini tuwur n’a zaŋ, na ktai e zi ɓaka na burini tuwur gaini, na ktai e zi ɓaka zi yi gaini lai.

⁸A kiŋnisi wiini pai zi ɓaka, pai zi ɓaka a za ɓaka na burini tuwur avut. A yima ktai, a haɗasi wulani pini zakni par, amma a rɗa humokni edi kai.

⁹Felni wala zi fiɗi hanɗa a yamaŋ amai wulani Gûwiŋ zi ɓaka, asakal par pini n’a hina a sirɗaŋ azumai ezini Gûwiŋ zi ɓaka lai. Hanɗa a ɓaka na burini tuwur.

¹⁰N'ag'aŋ sulu ɗa a za ɓaka zi yi gaini pini gadai zi ɗiyi na wiini ɓaka hanɗa. Won hlai na pai zi ɓaka a za de na burini hinini tuwur na burini tuwur na ɗif a zaŋ ɗa midini li, tuwurni a nava girdi n’edi.

¹¹Na ɓa mugɵuwi na sulu, zaw dere na sulu a nava tini kai ɗa, a kasi kilo hu na wiini avudi aŋ ɓaka na burini tuwurni n’a zaŋ. A sa emel kai, a sa wala zi ɗûgûdi zi lûgûzi kaalai, buri a ɓaka na burini tuwur.

¹²A kiŋnisi wiini pai zi ɓaka, pai zi ɓaka a mula tini juguɗ aŋ wala zi ɵi humok, asakal par a yaŋ midini Gûwiŋ zi ɓaka gaini wazagai n’e yiŋ edi gaini afu burini EPIƊ-ƊAI. Hanɗa a ɓaka na burini tuwur.

¹³Won hlai na ɓa pai zi ɓaka a za li de na burini hinini tuwur na ɗif na ɗiif a zaŋ war ktai arbani n’a yikasi amai par hanɗa; tuwurni a nava girdi n’edi. Pai zi ɓaka a za de hanɗa kal kal maini wiini ɓaka na gaini alini seyem ɗa nɵa.

¹⁴EPIƊ-ƊAI a miɗini wiini Musus:

¹⁵Won hlai na ɗif a za meefeŋ war siɗi kai sini wazagai n’a sa sini EPIƊ-ƊAI, kapai a zizina seŋni ɗa a kasi adime ktai na tirki sini kai war farani par, n’a suma farai dai dai sini ɗiyini farai n’amlai war Hlai na sɗik. A ɓaka na burini zizinini seŋ.

¹⁶Meefeŋ n’a zaŋ sini hlai na sɗik ɗa, a vurgaŋ, a sa galni faraini wala n’ag'aŋ ɵim midini hanɗa pra, a siŋni wiini pai zi ɓaka. Won hlai na pai a za li de na burini hinini tuwur midini gaini adime na wiini ɓaka zi zizinini seŋ ɗa, tuwurni a nava girdi n’edi.

¹⁷Na ɓa ɗif a za tuwur war siɗi kai, a ha amai midini ktai arbani gadai n’EPIƊ-ƊAI a gada midini buri e ziŋ ɗa kai, seŋ aŋ midini, a luba gumani meefeŋni,

¹⁸a kasi adime ktai wiini pai zi ɓaka, adime na tirki sini kai, pini wûrini farai na wiini ɓaka na burini zizinini seŋ n’aŋ gaini ɗiyi zaw. Won hlai na pai zi ɓaka a za de na buri hinini tuwur na burini tuwur n’a zaŋ war siɗi kai ɗa midini li, tuwurni a nava girdi n’edi.

¹⁹Hanɗa a ɓaka na burini zizinini seŋ buri ɗif hanɗa a nafu gaini seŋ midini wuzani arni EPIƊ-ƊAI.

²⁰EPIƊ-ƊAI a miɗini wiini Musus:

²¹Won hlai na ɗif a za meefeŋ abai gara sini EPIƊ-ƊAI buri a muɗa eles wiini maini midini wala n’a siŋni tini aŋ gɗam, zaw midini wala n’a tufaŋ tini par, zaw midini wala n’a halaŋ gaini hill, zaw midini n’a tikaŋ tini maini par gaini gdaŋ,

²²zaw a muɗa eles burini wala n’a wula n’a navaŋ, zaw na ɓa a ha wala mini war jre kai midini meefeŋ n’a kiɗa a zaŋ,

²³ɗif n’a za tuwur maini hanɗa ɵa na seŋ aŋ midini ɓa, a waya wala n’a halaŋ, zaw n’a tikaŋ gaini gdaŋ tini maini par, zaw na maini a siŋni tini aŋ gɗam, zaw wala n’a wula n’a navaŋ,

²⁴zaw wala paŋ n’a ha wala mini burini war jre kai, a vurgaŋ ta, a sa galni farai n’ag'aŋ ɵim na wala a sumaŋ ta ɗa midini pra. A siŋni wiini epin-gezani wala, war mefeŋ n’a sɗa li ɓa seŋ aŋ midini ɗa.

²⁵Burini meefeŋ n’a zaŋ sini EPIƊ-ƊAI ɗa, a kasi adime ktai wiini pai zi ɓaka, adime na tirki sini kai war farani par, n’a kiɗa a suma farai na wiini wala zi ɓaka na burini zizinini seŋ ta ɗa.

²⁶Won hlai na pai zi ɓaka a za de na burini hinini tuwur na midini ɗif hanɗa li wuzani EPIƊ-ƊAI ɗa, tuwur n’a zaŋ paŋ, koo ɓa a na maɵa ɗi, tuwur hanɗa a nava girdi n’edi.