Read Mousgoum Levitekai 6 Bible Online

Levitekai 6 - Mousgoum bible

Levitekai 6

¹EPIƊ-ƊAI a miɗini wiini Musus:

²Sa gadai hanɗa wiini Aaron gaiɗi alini, de na wiini ɓaka zi yi aga a za maini nɵa: Wala zi ɓaka zi yi ɗa a fana midini afu na war Gûwiŋ zi ɓaka haa gorof par, afu a fana pini aŋ yi lai.

³Pai zi ɓaka a wûti sapaini zi leŋ sini a wa kolsoŋ zi leŋ pini lai. A mulasi bono z'emel na wiini wazagai zi yi, a dara a muɗa, na wiini ɓaka zi yi n’a na midini Gûwiŋ zi ɓaka, a mulaŋ kokoni Gûwiŋ zi ɓaka ca.

⁴Asakal par a wa sapa na sini edi, a wa na zamai sini, a ka bono edi duɓani kaŋ par, war hlai na hilu.

⁵Afu na war Gûwiŋ zi ɓaka aga a ya kureɗ, e hiniŋ a mra kai. Gorof par paŋ, pai zi ɓaka a mula luwuŋ mini, a mula ɓaka zi yi midini, a ya wazagai z'emel na wiini ɓaka zi ɵeɗ lai

⁶Afu aga a ya kureɗ war Gûwiŋ zi ɓaka, aga a mra duk kai zaŋ.

⁷De na wiini ɓaka na gaini alini seyem aga a za maini nɵa: Aga e kiŋsi wuzani EPIƊ-ƊAI, wuzani Gûwiŋ zi ɓaka ɗa e ɗi alini Aaron.

⁸Asakal par ktai arbaɗi a mula pini avudi na gaini zilni gaini emel tiy juguɗ, a tika wala zi ɗûgûdi zi lûgûzi gaini hlaini paŋ lai, e yiŋ midini Gûwiŋ zi ɓaka. A lugos zi ɵiɗiti agul, a wala zi ɵi humok burini EPIƊ-ƊAI.

⁹Pini n’a hina, Aaron gaiɗi alini e simiŋ, e simiŋ gaini is arni kai war hlai na hilu, warɗi pakatai na wiini Gumu n’e nivi gaini EPIƊ-ƊAI woni;

¹⁰Aga e diŋ gaini is arni kai, buri hanɗa, a bri na Ta EPIƊ-ƊAI mu siŋɗi wiiɗi paakai zi ɓaka, pini ɓaka n’e yiŋ edi gaini afu n’a sa buriya par, a na sɗik gara, maini wala n’a hina pini ɓaka na burini tuwur, zaw na burini zizinini seŋ ɗa nɵa.

¹¹Ahini Aaron na wus paŋ a kiɗa a suma ɓaka hanɗa, a bri n’a sa siɗi pini ɓaka n’e yiŋ edi gaini afu burini EPIƊ-ƊAI par, haa kureɗ sini pinzibaku na wuzaku sek. Wala paŋ n’a tetemaŋ li ɗa a za edi sɗik.

¹²EPIƊ-ƊAI a miɗini wiini Musus:

¹³Ɓaka na Aaron gaiɗi alini aga e kiŋsi wiini EPIƊ-ƊAI war mefeŋ n’aga e mi emel midini ɗa a na maini nɵa: Mefeŋ paŋ e kisi avudi kilo hu, galni gorof par, galni koskoi lai.

¹⁴A da war wala na parkaɗak gaini emel, ku kaŋsi gaini zilni gaini emel gaini futini, ku guya gamla edi guyo guyo, ku kaŋsi wuzani EPIƊ-ƊAI aŋ lugos n’a ɵiɗiti agulni EPIƊ-ƊAI azumai.

¹⁵Ni n’aga e tikiŋ ezini aŋ pai zi ɓaka arbaɗi alini par gaini emel na e tiki ɗai war sda gaini aga a za nɵa lai. Hanɗa a wala n’aga e ziŋ kûreɗ-kûreɗ aga e yiŋ edi kafa burini EPIƊ-ƊAI.

¹⁶Ɓaka na gaini alini seyem na wiini pai zi ɓaka paŋ e yiŋ edi kafa, e simi pini kai.

¹⁷EPIƊ-ƊAI a miɗini wiini Musus:

¹⁸Miɗini wiini Aaron gaiɗi alini ɓa, de na wiini ɓaka na burini tuwur a na maini nɵa: Wala zi fiɗi na wiini ɓaka na burini tuwur a fuɗa war hlai n’e fiɗi wala zi ɓaka zi yi woni wuzani EPIƊ-ƊAI a wala na sɗik gara.

¹⁹A kiɗa a suma ɓaka hanɗa a pai zi ɓaka n’a za sdani ɗa, a sumaŋ war hlai na sɗik, warɗi pakatai na wiini Gumu n’e nivi gaini EPIƊ-ƊAI woni.

²⁰Wala paŋ n’a tetema neŋ hanɗa li ɗa a bunda sɗik, na ɓa fel ɗa a cirɗa li sini sapa, ku ma hlai na fel a cirɗa woni war hlai na sɗik.

²¹Grak z'afti n’e di wala zi ɓaka woni e hiɗiŋ edi, amma na ɓa a grak zi kiiya ɗa, e mi warni edi pɗem, e kiiwiŋ edi gaini yem lai.

²²Ɗif paŋ n’a pai zi ɓaka a kiɗa a suma ɓaka hanɗa, a wala na sɗik gara.

²³Amma wala n’e fiɗiŋ li aŋ ɓaka na burini tuwur na felni aga e kiŋ amlai war Gumu n’e nivi gaini EPIƊ-ƊAI woni aŋ zi de na wiini hinini tuwur amlai war hlai na sɗik gaini aga e limiŋ neŋni kai, e yiŋ edi gaini yi.