Read Mousgoum Levitekai 7 Bible Online

Levitekai 7 - Mousgoum bible

Levitekai 7

¹De na wiini ɓaka na burini zizinini seŋ a na maini nɵa: Ɓaka hanɗa a na burini EPIƊ-ƊAI kiini.

²Hlai n’e fiɗi wala zi ɓaka zi yi woni, e fiɗi wala zi ɓaka na burini zizinini seŋ ɗa woni lai, asakal par pai zi ɓaka a yama felni amai sini gûwiŋ zi ɓaka war galni na puɗu paŋ.

³A ka wazagai z'emel na sini ɗa paŋ wuzani EPIƊ-ƊAI, maini: gɗer, emel na sini wazagai na war,

⁴ɓlaɓlamai na sulu gaini emel n’a yima sini mukuɗufni lai, eɵeɵetni e tikiŋ edi gaini ɓlaɓlamai na sulu lai.

⁵Asakal par pai zi ɓaka a ya wazagai hanɗa paŋ midini gûwiŋ zi ɓaka, a ɓaka n’e yiŋ edi gaini afu burini EPIƊ-ƊAI. Hanɗa a ɓaka na burini zizinini seŋ.

⁶Ɗif paŋ n’a pai zi ɓaka a kiɗa a suma ɓaka hanɗa, a sumaŋ war hlai na sɗik, buri ɓaka a ɓaka n’a na burini EPIƊ-ƊAI kiini.

⁷Ɓaka na burini tuwur gaini ɓaka na burini zizinini seŋ, deni ɗa a ni ktai. Wala n’e fiɗiŋ aŋ ɓaka ɗa a hina aŋ wiini pai zi ɓaka n’a za de na burini hinini tuwur ɗa.

⁸Pai zi ɓaka n’a za ɓaka zi yi li wiini ɗif ɗa, amurni wala zi ɓaka hanɗa a wiini.

⁹Ɓaka na gaini alini seyem paŋ n’e diŋ war fur, zaw war langa n’agwi gaini pini mogo tiɓ, zaw wala na parkaɗak paŋ ɗa, aga a sa sini pai zi ɓaka n’a zaŋ ɗa.

¹⁰Ɓaka paŋ n’a haaɗa gaini emel zaw, n’a haaɗa kai a sa siɗi alini Aaron na paakai zi ɓaka ɗa, e ɓûrwiŋ tiɗi kal kal.

¹¹Deni ɓaka zi ɵeɗ n’a sa sini EPIƊ-ƊAI a na maini nɵa:

¹²Na ɓa ɗif a za ɓaka zi ɵeɗ aŋ ka pini ɓaka zi zini tese ɗa, sini wala zi ɓaka zi zini tese ɗa, a kasi gato n’e hiiɗiŋ gaini emel na is arni kai, gaini gamla na gaini is arni kai n’a diina gaini emel, gaini gato z'avudi na gaini zilni gaini futini n’e hiiɗiŋ gaini emel.

¹³Pra a kasi peŋ na is arni aŋ ɓaka n’e diŋgiŋ gaini ɓaka zi ɵeɗ gaini ɓaka zi zini tese ɗa lai.

¹⁴War wazagai zi ɓaka hanɗa par, e milisi agwi agwi e siŋni wiini EPIƊ-ƊAI, asakal par a sa sini pai zi ɓaka n’a yama fel amai sini gûwiŋ zi ɓaka war gal na puɗu paŋ ɗa.

¹⁵Amma neŋni wala zi ɓaka zi ɵeɗ gaini zi zini tese ɗa, e simiŋ war mefeŋ n’e fiɗiŋ burini EPIƊ-ƊAI warni dama, e hini wala amai pini buri dawai kai.

¹⁶Na ɓa ɓaka zi ɵeɗ n’a za ɗa a na pini wala zi hi-mi, zaw pini dirini ɗif, e kiɗi e limi neŋni yuvai ni dama n’e fiɗi wala warni. Dawaini, e limi pini n’a hina lai.

¹⁷Amma na ɓa pini a hina li pra, haa war mefeŋ n’ag'aŋ hu ɗa e yiŋ edi.

¹⁸Na ɓa ɗif a lima li neŋ na wiini wala zi ɓaka zi ɵeɗ hanɗa war mefeŋ n’ag'aŋ hu ɗa, ɗif n’a ɓaka hanɗa a nava yum arni Alaw kai, ɓakani a pɵa burini aŋ wala ktai kai, a bunda aŋ neŋ n’a nava kai, ɗif n’a lumaŋ li ɗa seŋ aŋ midini.

¹⁹Pra, neŋ paŋ na tika li sini wala na hi-hir ɗa, e limiŋ kir kai, e yiŋ edi. Amma neŋ na pɗem ɗa, ɗif paŋ n’a na hilu a kiɗa a lumaŋ.

²⁰Amma ni n’a na hilu kai, n’a luma neŋ zi ɓaka zi ɵeɗ hanɗa li, aga a nava bili n’edi arbaɗi pinzibani par.

²¹Ɗif n’a tika tini sini wala na hi-hir paŋ: Ɓa a ɗif zaw, wala n’ezini puɗu puɗu zaw, wala n’ezini puɗu na gaini ɗili na hi-hir lai zaw, n’asakal hanɗa a luma neŋni wala zi ɓaka zi ɵeɗ n’a sa sini EPIƊ-ƊAI ɗa, aga a nava bili n’edi arbaɗi pinzibani par lai.

²²EPIƊ-ƊAI a miɗini wiini Musus:

²³Miɗiɗi wiiɗi aliɗi Izrayel ɗa ɓa, emel na sini farai paŋ, ɓa a na wiini ɵeŋ zaw, wiini adime, zaw a na wiiɗi hiki ɗi ɗa, aga e simiŋ kai.

²⁴Emel na warni wala n’ezini puɗu puɗu n’a mra kiini, zaw na wala na basga a fuɗaŋ, a kiɗa a za sda zamai zamai, amma tiki aga ki simiŋ kai.

²⁵A jre, asiya ɗi paŋ n’a suma emel na wiini wala n’e ziŋ aŋ ɓaka, n’e ɗa yiŋ edi gaini afu burini EPIƊ-ƊAI, buri ɓa suma hanɗa, aga e biliŋ edi arbaɗi pinzibani par.

²⁶Fel paŋ na wiini wala zi ɗufli zaw, na wiini wazagai n’ezini puɗu puɗu ɗi ɗa, aga ki simiŋ kai, woɗi paŋ n’aga ki simni.

²⁷Asiya ɗi paŋ n’a suma li fel, koo ɓa a na woɗi, ɗif hanɗa aga a nava bili n’edi arbaɗi pinzibani par.

²⁸EPIƊ-ƊAI a miɗini wiini Musus ɓa:

²⁹Miɗiɗi wiiɗi aliɗi Izrayel ɗa ɓa: Ɗif n’a dara a za ɓaka si ɵeɗ wiini EPIƊ-ƊAI ɗa a kinisi bri n’a sa sini ɗa

³⁰Gaini tini dama a ka ɓaka n’e yiŋ edi gaini afu burini EPIƊ-ƊAI a muɗa: Wazagai z'emel, gaiɗi dedeki ɗa lai. Dedeki hanɗa aga te sa sini EPIƊ-ƊAI gaini de na wiini si.

³¹Nɵa pai zi ɓaka a ya wazagai z'emel hanɗa midini gûwiŋ zi ɓaka, amma dediki te wiini Aaron gaiɗi alini.

³²Pra, aga ki sitini ɓuli na wus war ɓakai zi ɵeɗ par wiini pai zi ɓaka, a bri n’aga a sa sini.

³³Ɓuli na wus hanɗa, te bri na te sa sini ahini Aaron n’a ka fel gaini wazagai z'emel na wiini ɓaka zi ɵeɗ wuzani EPIƊ-ƊAI.

³⁴Buri nɵa mu mulaŋ pini ɓaka zi ɵeɗ na wiiɗi aliɗi Izrayel ɗa par dedeki n’e zi de na wiini si gaiɗi ɓuli ɗa lai, mu saŋ wiini pai zi ɓaka Aaron gaiɗi pinzibani, aŋ vrak na wiiɗi haa kureɗ.

³⁵Bri hanɗa aga a sa sini Aaron gaiɗi alini war sarti n’e tikiɗi li war sdaɗi zi paakai zi ɓaka war ɵeŋni EPIƊ-ƊAI.

³⁶Emel midiɗi par haa wuzaɗi sek, a hina buriɗi aŋ gadai n’a bunda kai haa kureɗ.

³⁷De na wiini ɓaka zi yi gaini na wiini ɓaka na gaini alini seyem, gaini na wiini ɓaka na burini tuwur, gaini na wiini ɓaka buri zizinini seŋ, gaini ɓaka na wiini tiki na war sda zi pai zi ɓaka, gaini ɓaka zi ɵeɗ, a na ɗa maini nɵa,

³⁸EPIƊ-ƊAI a sini gadai hanɗa wiini Musus amai midiɗi huwuŋ Sinai, war mefeŋ n’a miɗiɗi wiiɗi aliɗi Izrayel buri e kinisi ɓakaɗi edi war basga na Sinai ɗa.