Read Mousgoum Levitekai 8 Bible Online

Levitekai 8 - Mousgoum bible

Levitekai 8

¹EPIƊ-ƊAI a miɗini wiini Musus:

²Yima Aaron gaiɗi alini puku, ku mula sapa gaini emel n’e tiki ɗai war sda gaini. Ku yima gari zi ɓaka na burini tuwur, gaini adumai na maɵagai na sulu. Ku tikiti dologoi zi peŋ na gaini is arni kai tuku lai.

³Asakal hanɗa ku tipiɗi ɗai paŋ edi mini gumu n’e nivi gaini EPIƊ-ƊAI woni.

⁴Musus a za wala n’EPIƊ-ƊAI a gdaŋ midini, ɗai e tipisi edi mini gumu n’e nivi gaini EPIƊ-ƊAI woni.

⁵Nɵa Musus a miɗiɗi: Wala n’EPIƊ-ƊAI a muɗaŋa buri mu zaŋ ɗa a hanɗa:

⁶Musus a yikasi Aaron gaiɗi alini wuzaɗi, a miɗi gaini yem maini n’a za pini de nɵa;

⁷a witini rob zi tikiri sini Aaron, a rgini wuzani gaini santir, a witini rob ɗa sini, a wiini efod ɗa midiɗi, a rgaŋ gaini santir na wiini efod ɗa duɓani sek,

⁸A wiini ɵubu na sini didikni wulani, a mula Urim gaini Tumim ɗa warni.

⁹A fiɗini midini gaini kadamul, a tikini fler zi or amai midini arni n’a siŋkaŋ ɓa aŋ gaini viri edi ɗaw maini n’EPIƊ-ƊAI a miɗiŋni Musus ɗa nɵa.

¹⁰Musus a tika emel n’e tiki ɗai war sda gaini, a girdaŋ sini gumu n’e nivi gaini EPIƊ-ƊAI woni gaini wazagai n’amlai warni paŋ lai, a zaŋ edi sɗik.

¹¹A yama emel ɗa amai sini gûwiŋ zi ɓaka azi muguzak, asakal par a girdaŋ sini gûwiŋ zi ɓaka gaini wazagai n’e zi sda gaini paŋ, gaini daya gaini wala n’e tikiŋ azumai pini ɗa, kapai a za edi sɗik.

¹²A ma pini emel hanɗa agwi, a maŋ midini Aaron, kapai a saŋ edi mini sdani.

¹³Asakal par a ɗiyiɗi alini Aaron wuzaɗi, a wiiɗi sapaɗi siɗi, a rgiɗi santirɗi wuzaɗi, a fiɗiɗi midiɗi gaini kadamul maini n’EPIƊ-ƊAI a miɗini midini nɵa.

¹⁴A yimasi gari zi ɓaka na burini tuwur, Aaron gaiɗi alini e mili tiɗi midini gari hanɗa,

¹⁵Musus a ɵa wulani, a yima felni war wala, a girdaŋ amai sini koŋni gûwiŋ zi ɓaka na puɗu gaiɗi ahi tini, kapai a ma tuwurni edi, pini fel n’a hina a maŋ azumai ezini gûwiŋ zi ɓaka ɗa, a zaŋ edi sɗik maini hanɗa nɵa ɓa kapai e zi ɓaka na wiini hinini tuwur amai midini.

¹⁶Musus a mula emel na warni paŋ, a tika eɵeɵet gaini hlaini, ɓlaɓlamai na sulu gaini emel na sini lai, a yaŋ midini gûwiŋ zi ɓaka.

¹⁷Amma gari hanɗa, a dara a muɗa amurni, neŋni gaini wazagai na warni paŋ e yiŋ edi duɓani kaŋ ɗa par maini n’EPIƊ-ƊAI a miɗiŋni wiini Musus ɗa nɵa.

¹⁸A yimasi adime na burini ɓaka zi yi, Aaron gaiɗi alini e mili tiɗi midini adime hanɗa.

¹⁹Musus a ɵa wulani, a yama felni amai sini gûwiŋ zi ɓaka war galni na puɗu paŋ.

²⁰Musus a rɗaŋ edi bak bak, a yaŋ gaini nhumok gaini emel na warni lai.

²¹Musus a ma wazagai na warni gaini ɓaɓarani lai edi gaini yem, asakal par a ya adime gaini hlaini midini gûwiŋ zi ɓaka. Hanɗa a ɓaka zi yi, a lugos na pɗem n’a ɵiɗiti agulni EPIƊ-ƊAI azumai, a ɓaka n’e yiŋ edi gaini afu burini EPIƊ-ƊAI, maini n’EPIƊ-ƊAI a miɗini wiini Musus midini nɵa.

²²A yimasi adime n’ag'aŋ sulu na buri tiki na war sda, Aaron gaiɗi alini e mili tiɗi midini adime hanɗa,

²³Musus a ɵa wulani, a ma fel agwi agirdaŋ sini mini ɵimani Aaron na wus gaiɗi ahi tini n’amai na wus gaiɗi ahiɗi ezini n’amai na wus ɗa lai.

²⁴Musus a yikiɗisi alini Aaron, a girda fel sini mini ɵimani na wus, midini ali tiɗi n’abakai gaini alini eziɗi n’abakai na wus ɗa lai. Asakal par a yama fel amai sini gûwiŋ zi ɓaka war galni na puɗu paŋ.

²⁵A mula wazagai z'emel na sini ɗa: gɗeri, emel na warni, eɵeɵet gaini hlaini, ɓlaɓlamai na sulu gaini emel na sini lai, gaiɗi ɓulki na wus ɗa lai.

²⁶Warɗi dologoi na wiini peŋ na gaini is arni kai par, a tikasi gato na gaini is arni kai, gato z'emel ktai, gamla ktai lai, a mulaŋ amai par midini wazagai z'emel gaiɗi ɓuli na wus ɗa ca ca.

²⁷A sa wazagai hanɗa paŋ war tini Aaron gaiɗi alini, aŋ siŋ sini EPIƊ-ƊAI pini de na wiini sda.

²⁸Musus a waya a mulasi wazagai hanɗa war tiɗi par, a yaŋ midini gûwiŋ zi ɓaka gaini ɓaka zi yi aŋ bonu, a ɓaka na buri tiki na war sda, a lugos na pɗem n’a ɵiɗiti agulni azumai, a ɓaka n’e yiŋ edi gaini afu burini EPIƊ-ƊAI.

²⁹Musus a tika didikni adime na buri tiki na war sda, a siŋni wiini EPIƊ-ƊAI maini n’a za pini de na wiini si ɗa nɵa. Asakal hanɗa didik ɗa a hina aŋ wiini Musus maini n’EPIƊ-ƊAI a miɗiŋni nɵa.

³⁰Musus a ma emel n’e tiki ɗai war sda gaini agwi, gaini fel na midini gûwiŋ zi ɓaka par agwi lai, a yama sini Aaron gaini sapani, siɗi alini gaini sapaɗi lai. Gaini hanɗa, Aaron, alini gaini sapaɗi lai e si edi mini sdaɗi.

³¹Musus a miɗini wiini Aaron gaiɗi alini: Di neŋ na wiini adime n’ag'aŋ edi mini gumu n’e nivi gaini EPIƊ-ƊAI woni, aga ki simiŋ woni lai gaini peŋ n’a na warɗi dologoi na wiini tiki na war sda, maini na mu gidiki midini ɓa aga a sumaŋ ɗa a Aaron gaiɗi alini nɵa.

³²Neŋ n’a hina gaini peŋ n’a hina ɗa, aga ki yiŋ edi.

³³Aga ki simni edi mini gumu n’e nivi gaini EPIƊ-ƊAI woni haa mefeŋni tikiki na war sda a vada, war mefeŋ n’ag'aŋ muguzak ɗa, tiki aga ki niyi war sda n’e tikiki midini.

³⁴Maini na mu zuŋmu girna na nɵa. EPIƊ-ƊAI a muɗaŋa buri mu za maini hanɗa nɵa, kapai mu za de na wiini tuwur, kapai tuwurki a nava girdi n’edi.

³⁵Tiki aga ki simni edi mini gumu n’e nivi gaini EPIƊ-ƊAI duvuk gaini girvudi haa mefeŋ muguzak, asakal hanɗa ki kiɗi ki zi sda na wiini EPIƊ-ƊAI, ki mri kir kai. Hanɗa a wala n’Alaw a muɗaŋa ɗa.

³⁶Aaron gaiɗi alini e zi pini gadai paŋ n’EPIƊ-ƊAI a siŋɗi mini Musus.