Read Mousgoum Levitekai 9 Bible Online

Levitekai 9 - Mousgoum bible

Levitekai 9

¹Mefeŋ n’ag'aŋ mitwis ɗa, Musus a yika Aaron gaiɗi alini gaiɗi n’abakai n’arbaɗi ɗai na Izrayel ɗa lai.

²A miɗini wiini Aaron: Paya ahi ɵeŋ zi ɓaka na burini tuwur ktai, adime ktai zi ɓaka zi yi lai, gaini suluni tirki sini kai, ku kaŋ wuzani EPIƊ-ƊAI.

³Asakal par ku miɗiɗi wiiɗi aliɗi Izrayel maini nɵa: Piyi hek ktai na burini ɓaka na burini tuwur, ahi ɵeŋ ktai, ahini adime ktai lai na buza ktai ktai, gaini suluni na tirki sini kai kapai e zi ɓaka zi yi gaini.

⁴Gari ktai gaini adime ktai lai aŋ ɓaka zi ɵeɗ n’a sa sini EPIƊ-ƊAI gain ɓaka na gaini alini seyem n’e hiɗiŋ gaini emel, buri EPIƊ-ƊAI aga a siŋka sini arki girna.

⁵E kisi wala na Musus a miɗiɗi gaini edi mini gumu n’e nivi gaini EPIƊ-ƊAI woni. Asakal par ɗai e tipisi e ɗiyi wuzani EPIƊ-ƊAI.

⁶Musus a muɗa: EPIƊ-ƊAI a miɗiki buri ki zi maini nɵa, zi hanɗa kapai abai na wiini te siŋka arki.

⁷Musus a miɗini wiini Aaron ku ɗiya wuzani gûwiŋ zi ɓaka, ku za ɓaka na burini tuwur gaini ɓaka zi yi na wiiku, asakal par za ɓaka na wiiɗi ɗai paŋ, kapai ku za de na wiini hinini tuwur na buriɗi ɗa maini n’EPIƊ-ƊAI a muɗaŋ ɗa nɵa.

⁸Aaron a torosi sini gûwiŋ zi ɓaka, a ɵa wulani ahi ɵeŋ zi ɓaka na burini hinini tuwur na wiini ni dama ɗa;

⁹Alini Aaron e kinisi felni ɗa, a jibiti ahi tini arni, a girdaŋ sini miyok na koŋni gûwiŋ zi ɓaka, a ma pini n’a hina ɗa azumai ezini gûwiŋ zi ɓaka ɗa.

¹⁰A ya wazagai z'emel, ɓlaɓlamai na sulu, eɵeɵetni ahi ɵeŋ lai maini n’EPIƊ-ƊAI a miɗiŋni wiini Musus ɗa nɵa.

¹¹Neŋni gaini amurni a yaŋ edi duɓani kaŋ par.

¹²A fuɗa adime na wiini ɓaka zi yi su, alini e kinisi felni ɗa, a yamaŋ amai sini gûwiŋ zi ɓaka war galni na puɗu paŋ.

¹³E kinisi adime zi ɓaka hanɗa gaini rɗi edi bak bak, gaini humokni lai. Ni a yaŋ midini gûwiŋ zi ɓaka.

¹⁴A ma wazagai na warni gaini ɓaɓarani lai edi, a yaŋ arbani ɓaka zi yi hanɗa lai midini gûwiŋ zi ɓaka.

¹⁵A ka ɓaka na wiiɗi ɗai wuzani EPIƊ-ƊAI, a yima hek zi ɓaka na burini tuwur na wiiɗi ɗai, a ɵa wulani, a za ɓaka gaini maini n’a zaŋ gaini ahi ɵeŋ ɗa nɵa.

¹⁶A ka ɓaka zi yi na wiini ahi ɵeŋ gaini na wiini ahini adime wuzani EPIƊ-ƊAI, a zaŋ maini pini deni nɵa.

¹⁷Asakal par a ka ɓaka na gaini alini seyem wuzani EPIƊ-ƊAI, a mula tiy juguɗ a yaŋ midini gûwiŋ zi ɓaka gaini ɓaka zi yi na gorof par.

¹⁸A fuɗa gari gaini adime na ɗai e kiŋsi burini ɓaka zi ɵeɗ, alini e kinisi felni wazagai n’e fiɗiŋ ɗa, a yamaŋ amai sini gûwiŋ zi ɓaka war gal na puɗu paŋ.

¹⁹Wazagai z'emel na sini gari gaini adime, a dara a muɗa: gɗer, emel na sini wazagai na war, ɓlaɓlamai, gaini eɵeɵet lai,

²⁰e miliŋ midini didik na sulu, a yaŋ midini gûwiŋ zi ɓaka.

²¹Aaron a za ɓaka na gaini didik, gaiɗi ɓuli na wus ɗa lai pini de na wiini si na sini EPIƊ-ƊAI, maini na Musus a miɗiŋni nɵa.

²²Won hlai n’Aaron a vada li gaini zini ɓaka na burini tuwur, gaini ɓaka zi yi gaini ɓaka zi ɵeɗ lai ɗa, a yima tini amai midiɗi ɗai a ɓikiɗi, asakal par a niyasi azumai.

²³Musus gaini Aaron e niyi amlai war gumu n’e nivi gaini EPIƊ-ƊAI woni, asakal par, e niyisi anene aŋ ɓikiɗi ɗai, nɵa abai na wiini EPIƊ-ƊAI te siŋka arɗi ɗai paŋ.

²⁴Afu a niyasi wuzani EPIƊ-ƊAI par, a ya ɓaka zi yi gaini wazagai z'emel na midini gûwiŋ zi ɓaka ɗa, ɗai paŋ e tili hanɗa, e ɗûûli gaini firiyi, e pûkû siɗi azumai, arɗi gaini pi azumai midini afti.