Read Mousgoum Yeremiyas 1 Bible Online

Yeremiyas 1 - Mousgoum bible

Yeremiyas 1

¹Miɗi na wiini Yeremiyas n’ahini Hilkiya, ktai arbaɗi paakai zi ɓaka n’e simni war Anatot midini afti na wiini Benyamin.

²EPIƊ-ƊAI a miɗini seŋ war mefeŋ na Yoziyas n’ahini Ammon a na aŋ pai war Yuda, war buzani n’ag'aŋ doogo pi hu.

³EPIƊ-ƊAI a miɗini katawai pra war mefeŋ na wiini Yoyakim pai na Yuda, haa sini vidini buza n’ag'aŋ doogo pi ktai na Sedesiyas n’ahini Oziyas a na aŋ ai warɗi Yuda, haa sini ki n’edi aŋ bege na wiiɗi ɗai na Yeruzalem warni tile n’ag'aŋ ɵim.

⁴EPIƊ-ƊAI a muɗaŋa seŋ, a muɗaŋa maini nɵa:

⁵Wuzani na mu rguku amlai warni gutɗi amuku sek ɗa, mu suɗuku ya, wuzani na ku niyasi edi warɗi amuku par ɗa mu vuruku ɗaw, aŋ za ɵeŋŋa, mu zuku aŋ ɗif na mini Alaw na wiya, na mu ɵinaŋ sini pinziba na zamai.

⁶Mu waya seŋ: kai, Epiɗ-ɗai Alaw, seŋ ɗa aga a muɗa gaya kai, mu suwa agwi gara.

⁷Amma EPIƊ-ƊAI a muɗaŋa: ku muɗa ɓa k’agwi gara ɗa kai, buri aga ku hala siɗi nagai n’aga ku hala siɗi ɗa paŋ, na mu muɗuŋku li paŋ ɗa aga ku muɗaŋ edi lai.

⁸Ku huna ɗif ktai kai, buri mu na gaiku aŋ puluku edi, a miɗi na sini EPIƊ-ƊAI par.

⁹Nɵa EPIƊ-ƊAI a witisi tini, a tikiti ma, EPIƊ-ƊAI a muɗaŋa: mu wa seŋŋa li war muku.

¹⁰Girna par ɗa mu suku spak midini pinziba paŋ, midiɗi pai paŋ aŋ hurɗa wala amai, aŋ bula wala azumai, aŋ tuura wala, aŋ ho wala azumai lai, a ni kiini kai, aŋ rga wala lai, aŋ pa wala azumai lai.

¹¹EPIƊ-ƊAI a muɗaŋa seŋ, a muɗaŋa ɓa: Yeremiyas, ku tala ɗa a maɗa? Mu wiyini seŋ, mu tala ɗa a tini luwuŋ Amande, luwuŋ na sartini zi sifiyi ɗa a wula arni kai ɗa.

¹²EPIƊ-ƊAI a muɗaŋa: a na ɵa, seŋ na mu muɗaŋ ɗa, a wula mada kai, sai mu vaŋ amai.

¹³EPIƊ-ƊAI a muɗaŋa azi n’ag'aŋ sulu pra: ku tala zamai ɗa a maɗa? Mu tiliti te doknai na te na huura war gal n’azumai par miɗi gaini hiŋilisi sa sek.

¹⁴EPIƊ-ƊAI a muɗaŋa: gir n’aga a halasi midiɗi ɗai na midini afti ɗa, aga a halasi war gal n’azumai ɗa par.

¹⁵Buri ɓa aga mu yikiɗisi piniziba paŋ n’e ɗa midini afti na wiiɗi paakai na war gal n’azumai sek ɗa, a miɗi na sini EPIƊ-ƊAI par, pinziba paŋ aga a tikiti Paramai zi pai na wiini paini mini porte na wiiɗi Yeruzalem ta ta, sini ɵaga na siɗi paŋ haa amlai gun, wuzani fuŋ n’abakai na Yuda ɗa paŋ lai.

¹⁶Aga mu zitiɗi sariya wiiɗi ɗai na midini afti hanɗa, burini meefeŋ paŋ n’e ziŋ: Ehiniŋa edi, e yi wazagai zi ɗûgûdi zi lûgûzi wiini alawai zamai, e hûrgi azumai wuzani wazagai n’e ziziniŋ gaini tiɗi lai.

¹⁷Amma tuku ɗa, aga ku rga wuzaku amai, faka amai ku miɗiɗi seŋ na mu muɗuŋku paŋ, ku hûniɗi kai, ɵa kai ɗa ta aga mu bunduku muhunai wuzaɗi.

¹⁸Ta ɗa, girna par aga mu zuku aŋ fuŋ n’abai zi ɵaga, aŋ gaarai zi kawai, aŋ ɵaga zi kiiya, wuzani arɗi ɗai na midini afti ɗa paŋ, wuzaɗi paakai na Yuda, gaiɗi ɗai ɗi n’abakai ɗa paŋ, gaiɗi paakai zi ɓaka gaiɗi ɗai na midini afti ɗa paŋ lai.

¹⁹Aga e hitimuku, amma aga e rɗi amai muduku kai buri m’aŋ gaiku aga mu puluku edi, a miɗi na sini EPIƊ-ƊAI par.