Read Mousgoum Yeremiyas 14 Bible Online

Yeremiyas 14 - Mousgoum bible

Yeremiyas 14

¹EPIƊ-ƊAI a miɗini seŋ wiini Yeremiyas war mefeŋ zi koɓro ɗa, maini nɵa:

²Yuda t'aŋ warni kwimi, fuŋɗi n’abakai ɗa, gdaŋni a na vada edi, arni a yima amai kai, mini magalani ɗa gaini hiɗi ɓaw ɓaw, hama na wiiɗi Yeruzalem ɗa a wa amai sek.

³Ɗai n’abakai ɗa, e ɵiniɗi n’agogoi ɗa aŋ piyisi yem, n’agogoi e cû mini kalaŋ ɗa e nivi yem kai, e wiyisi gaini argiŋɗi kadai yaw, siyer a yimiɗi, e diyiɓi gaini siyer, e biri wala midiɗi bar bar.

⁴Burini afti n’a luɓ aŋra ca ca buri faŋ a ɵa midini kai ɗa, ɗai zi hirim ɗa, siyer a yimiɗi, e biri wala midiɗi bar bar.

⁵Biryumi n’edi war basga ɗa te wa aliɗi ca, te hinaŋ edi buri ɓa kuzum aŋ kai.

⁶Amuru ɗa, a ɗiya amai midini boŋorai na huwoŋai midini kai, a yima merfeŋni pini maini barka cem cem nɵa, arni a tûûfa tini piyini kuzum ɗa, amma kuzum aŋ kai.

⁷Na ɓa merfeŋyi a pa seŋ midiyi ɗa, EPIƊ-ƊAI za siyi burini yikuku, buri jre ɗikat kai na wiyi ɗa a suwa viya gara, tiyi mi zi tuwur na ɗa suku tuku.

⁸Tuku na ku bayai na pini ɵeɗ na wiiɗi Izrayel, tuku na ku ɗif na ku kûrɗiɗi edi warni mefeŋɗi zi gir ɗa, ku bunda midini afti maini ɗif zi zak ɵa, maɵa maɵa ɗa? Maini morkoi na gaini ezini blaŋ na duvuk te cakaŋ woni hlai ɵa ɗa maɵa maɵa ɗa?

⁹Ku bunda maini ɗif n’ezini a pa kai, maini gaŋgalaŋ n’a kiɗa a kurɗa ɗif kai ɵa maɵa maɵa ɗa? Paŋ ktai EPIƊ-ƊAI, tuku ku na gaiyi, e yikiyi ɓa, mi ɗi ɗai na wiiku, ku hiniyi edi kai.

¹⁰EPIƊ-ƊAI a na miɗiɗi wiiɗi ɗaini maini nɵa: A jre, e firiyi ɗa a hili na yaw yaw, e simni warni hlai ktai kai, EPIƊ-ƊAI ɗa a firyiɗi kai. Tiyana ɗa, midini a kɵa gaini meefeŋ na wiiɗi, a na zilbiɗi miɗi burini tuwurɗi.

¹¹EPIƊ-ƊAI a muɗaŋa: Tuku ku siiwaŋa buri mu za pɗem siɗi ɗai hanɗa kai,

¹²koo ɓa e tiki sai ɗi, aga mu ɵina tuwiɗi a sekai, koo ɓa e ziŋa ɓaka zi yi gaini ɓaka na zamai zamai ɗi, aga mu yimaŋ kai. Mu firiya mu vidiɗi edi gaini gaw, gaini wiyamai, gaini vlak lai.

¹³Mu waya seŋ: Hay! Epiɗ-ɗai Alaw, ɗai na mini Alaw e yivi e miɗi na ɗa ɓa: Aga ki tili gaw gaini arki kai, wiyamai aga te ziki kaalai, amma aga mu siki ɵeɗ na gaini futini warni hlai hanɗa.

¹⁴EPIƊ-ƊAI a muɗaŋa: Ɗai na mini Alaw ɗa e miɗi na ɗa a eles, Ta mu ɵiniɗisi kai, mu siɗi miɗi miɗi kai, mu miɗiɗi seŋ kai, e zi na ɗa pini wala n’a siŋka arɗi pini jre kai, pini seŋ na wuze na jre kai, pini hûrgi n’azumai wuzaɗi alawai na zamai, pini rhai na wiiɗi agulɗi lai, e zi siɗi aŋ ɗai na mini Alaw na ɗa gaini hanɗa.

¹⁵Buri hanɗa, EPIƊ-ƊAI a na muɗa siɗi ɗai na mini Alaw n’e miɗi war yikini, na ni a ɵiniɗisi kai, n’e miɗi ɓa: Gaw aga a za kai, wiyamai kaalai, ɗai na mini Alaw hanɗa, gaw gaini wiyamai aga a vidiɗi edi.

¹⁶Amma ɗai na nagai e ɗa miɗiɗi seŋ na wuze ɗa, wiyamai gaini gaw aga a pûkûɗisi anene warɗi futi na Yeruzalem ɗa. Ɗif n’a piɗi azumai aŋ kai, nagai kaalai, falakaiɗi kaalai, meefeŋɗi n’e ziŋ ɗa aga mu wayaŋ midiɗi.

¹⁷Aga ku miɗiɗi seŋ hanɗa: Ara a ka tuwi girvudi gaini duvuk paŋ, mu nava si n’amla kai buri ɓa ɗaiŋa e nivi gir n’abai, gir n’a fuɗa si gara.

¹⁸Mu hala li edi war basga ɗa, mu niviɗi ɗai n’e mri mini gaw, mu niya li aha war fuŋ n’abakai ɗa, mu niviɗi ɗai na wiyamai te vada gdaŋɗi ɗa. Ɗai na mini Alaw gaiɗi paakai zi ɓaka ɗa lai e hini yaw aŋ gûni midini afti, e siɗi wala ktai kir kai.

¹⁹Tuku ku hiniti Yuda ɗa di mak ɗi? Siyon te baza muku ta ɗi? Ku ziyi wuruk ta, ku zûûliyi kai ɗa buri maɗa? Mi hiini ɓa hlai aga a bunda pɗem, amma wala na pɗem aŋ kai. Tiyi mi biyi sarti na wiini zûûli, amma a cosi ɗa a hunai n’abai.

²⁰EPIƊ-ƊAI, tiyi mi siɗi meefeŋ na wiyi gaini na wiiɗi tamaiyi lai, buri ɓa mi zi tuwur suku.

²¹Burini hormo na wiini yikuku ɗa, ku miisiyi kai. Paramai zi pay na wiiɗi abaiku ɗa, ku wiyitisi azumai kai, ku hina muduku a kɵa, ku ɗukla bonu n’arbaku gaiyi kai.

²²Arbani wazagai na a nafa kai na wiiɗi ɗai na kadai ɗa, ktai na a ɵa faŋ a na ɗi? A ɵa faŋ ɗa a hlai n’amai ɗa ɗi? Ku ɵa faŋ ɗa ku tuku Epiɗ-ɗai Alaw na wiyi kai ɗi, tiyi mi biyi na ɗa tuku, buri wazagai hanɗa ku zaŋ ku tuku.