Read Mousgoum Yeremiyas 15 Bible Online

Yeremiyas 15 - Mousgoum bible

Yeremiyas 15

¹EPIƊ-ƊAI a muɗaŋa: koo ɓa Musus gaini Samuwel e ɗiyisi wuza aŋ siwiŋa ɗi, hiinini-haw aga a yimaŋa buriɗi ɗai hanɗa kai, mu birgiɗi edi wuzani ara, e yimi siɗi edi.

²Na ɓa e zilbuku li ɓa: Mi hili wata sek ɗi ɗa? Ku wiyiɗi seŋ ɓa, EPIƊ-ƊAI a na muɗa maini nɵa: N'a sa mini mri a hala mini mri, n’a sa mini kaɵkar a hala mini kaɵkar n’a sa miɗi wiyamai a hala miɗi wiyamai, n’a sa mini bege a hala mini bege lai.

³Aga mu hinasi pinzibani gir puɗu midiɗi, a miɗi na sini EPIƊ-ƊAI par, Kaɵkar aŋ fiɗi, hirgakai aŋ sipiɗi edi gai gai, wala zi ɗufli n’arbani hlai n’amai gaini wazagai n’ezini puɗu puɗu na midini afti ɗa, aŋ luma, aŋ vidiɗi edi lai.

⁴Aga mu bindiɗi aŋ wala zi mili hunai burini afti na wiiɗi paakai na midini afti paŋ, buri Manase n’ahini Ezekiyas pai na Yuda, burini sda n’a zaŋ warɗi Yeruzalem ɗa.

⁵N'aga a zuku meefeŋ kai ɗa a siya ɗa, Yeruzalem, n’aga a tuwa muduku ɗa a siya ɗa? N'aga a niyasi aha muduku ɗaw aŋ zilba na suku ɗa a siya ɗa?

⁶Ku hinaŋa edi mak, a miɗi na sini EPIƊ-ƊAI par, ku waya duɓaku wai, nɵa mu wiyitisi ta te nasi edi par muduku, aga mu tuuruku edi, mu kaya tini hiinini-haw su,

⁷mu filiɗi gaiɗi wulai zi fili, mu ɵiriɗi edi midini afti, mu vidiɗi edi gaiɗi aliɗi paŋ, amma gaini hanɗa paŋ, e bindi payaiɗi kai.

⁸Pini sda na mu zaŋ ɗa, falakai na war greŋ ɗa e bindi viya e sûwi kai-kai na agoɗom ɗa. Midiɗi emini gaŋgalaŋ ɗa, mu kasi ɗif n’a tuura hlai girvudi, mu kasi dûrgûzi gaini hunai midiɗi tizaw.

⁹Na na te wa ali mugza ɗa, gdaŋɗi a vada, suŋfaɗi a wa edi, futiɗi te nawa girvudi, siyer a yimiti, siyer a diɓiti, nagai n’e hini ɗa mu siɗi mini kaɵkar na wiiɗi gawɗi, a miɗi na sini EPIƊ-ƊAI par.

¹⁰haw gara buriya, buri ɓa tuku ama, ku waaŋa, ta ɗa mu ɗif zi gili sispai, zi gili hiy lai midini afti paŋ. Paŋ ktai mu ɗif na mu tufasi kaalai, mu sa edi aŋ tufa kaalai, gaini hanɗa paŋ, ɗai paŋ e miɗi meefeŋ sa.

¹¹EPIƊ-ƊAI a muɗa: Gazi, mu pulukusi edi ɓa kapai ku sumna ɵeɗ, gazi mu luwuku ɗuwal warni mefeŋ zi gir, warni mefeŋ zi kwimi.

¹²Kawai ɗa a haɗa ɗe? kawai n’a halasi war gal n’azumai par gaini kiiya ɗa.

¹³Tuku Yuda, derku gaini godaiku ɗa aga mu saŋ wiiɗi ɗai aŋ der na mini hatam. Mu saŋ burini vrak ktai kai, amma burini tuwurku paŋ na ku zaŋ midini afti ɗa.

¹⁴Aga mu kiki gaiɗi gawki paŋ edi midini afti na ki sɗiŋ kai, buri afu na wiini hiyŋa a yiba amai li, a na ya siki sek.

¹⁵Tuku, ku sɗa ya EPIƊ-ƊAI, hina muduku a kɵa buriya, zna pa ta, ku vurga meefeŋ na gawŋa e ziŋ sa ɗa, ku tika suŋfaŋa kai tuku na ku ziya seŋ gaini hagal, tuku ku sɗa ɓa mu yima tirki sa na ɗa buriku tuku.

¹⁶Won hlai na mu nava seŋku li ɗa, mu sumaŋ tar, seŋku a saŋa firiyi, a vaŋa gaini firiyi n’abai, buri yikukua na yika mada, Epiɗ-ɗai Alaw zi spak paŋ.

¹⁷Mu sumna war diŋgiɗi ɗai zi aniya ɗa aŋ ɵa dawaŋ kai, tuku zi spak ɗa te zaŋa dewele aŋ sumna kiiya buri te vaŋa gaini suwar.

¹⁸Girŋa ɗa a hala wuzani sek ɵa ɗa buri maɗa? Wuruk na sa ɗa, mini a yima kai ɗa buri maɗa? A dara a zuula kai ɗa buri maɗa? Ku bunda buriya na ɗa maini hlai zi liwi yem n’a ɗuula ɗai nɵa, maini yem na ɗif a pɵa midini kai nɵa ɗi?

¹⁹Buri hanɗa, EPIƊ-ƊAI a na muɗa maini nɵa: Na ɓa ku wayasi li ɗa, aga mu wiyukusi, aga ku ɗiya warni sdaku wuza, na ɓa ku za li ɓraw arbani wala na pɗem gaini na meefeŋ ɗa, aga ku bunda aŋ ma, e wiyisi suku ɗa e ɗi nagai, tuku aga ku waya piɗi kai.

²⁰Wuzani arɗi ɗai hanɗa aga mu bunduku gdaŋ maini ɵaga zi kiiya nɵa, aga e hitimuku, amma aga e kiɗi e rɗi amai muduku kai buri m’aŋ gaiku, aŋ kurɗuku, aŋ puluku edi lai, a miɗi na sini EPIƊ-ƊAI par.

²¹-Aga mu puluku edi tiɗi ɗai na maafanai par, mu hultukusi war tiɗi nagai zi karai ɗa par.