Read Mousgoum Yeremiyas 16 Bible Online

Yeremiyas 16 - Mousgoum bible

Yeremiyas 16

¹EPIƊ-ƊAI a muɗaŋa seŋ a muɗa:

²Ku tika muni kai, ku wa ahi na wus zaw na muni midini afti hanɗa kai,

³buri EPIƊ-ƊAI a na muɗa siɗi alini na maɵagai gaiɗi na falakai n’aga e wii warni hlai hanɗa, siɗi tamaiɗi na falakai gaiɗi tamaiɗi na maɵagai n’e wiiɗi midini afti hanɗa maini nɵa:

⁴Aga e mri mini veglek na maafanai, ɗif aga a tûwiɗi kai, e piɗi kaalai, e bindi maini fulai n’e pûkiŋ edi warni vuwai nɵa, kaɵkar gaini wiyamai aga a vidiɗi, kopoŋɗi aga a bunda aŋ wala zi simi na wazagai zi ɗufli n’arbani hlai n’amai gaini wazagai n’ezini puɗu puɗu na midini afti lai.

⁵Buri EPIƊ-ƊAI a na muɗa maini nɵa: ku niya aha warni dalam n’e ɗa e zi de na wiini tuwi aha warni kai, ku hala ku tuwa kai, ku ɵa hama suku kaalai, buri mu yima ɵeɗ na wiya edi midiɗi ɗai hanɗa par kaai, a miɗi na sini EPIƊ-ƊAI par, pɗemŋa gaini hiinini-haw na buriɗi ɗa, mu yimaŋ edi kaai.

⁶N'abakai gaiɗi n’agogoi lai aga e mri midini afti hanɗa, aga e piɗi azumai kai, ɗif a tûwiɗi kai, e ɓisi siɗi buriɗi kai, e fiiɗi midiɗi edi kaalai.

⁷Ɗif n’aŋ warni goho ɗa aga ki simi simi gaini kapai a nava arai-zi-pi kai, ɗif a sini wala zi ci wiini ni n’epini, zaw emini te mra aŋ sini arai-zi-pi kaalai.

⁸Ku niya aha warni dalam n’aŋ warni fet aŋ suma, aŋ ca lai kai,

⁹buri EPIƊ-ƊAI zi spak paŋ, Alaw na wiiɗi Izrayel a na muɗa maini nɵa: Aga mu ɗiya yama zi fet gaini yama zi firiyi, gaini na wiiɗi ɗai n’e tiki marɗi wuzani, warni sarti na wiiki.

¹⁰Won hlai na ku muɗa seŋ hanɗa li paŋ wiiɗi ɗai hanɗa, na ɓa e zilbuku li ɓa: EPIƊ-ƊAI a rga warni buri a hinasi gir n’abai nɵa midiyi buri maɗa? Meefeŋyi tiɓ ɗa a maɗa, Tuwur na mi ziŋ sini Epiɗ-ɗai Alaw tiɓ ɗa a na wata ɗa?

¹¹Nɵa, ku wiyiɗi seŋ ɓa: A za nɵa buri ɓa, tamaik e hiniŋa edi, a miɗi na sini EPIƊ-ƊAI par, e tiɓi pini alawai zamai e zi ɵeŋni, e hûrgi azumai wuzani lai. Amma ta ɗa, e hiniŋa edi mak, e zi pini gadaiŋa zi ɗû kaalai.

¹²Tiki ɗa, meefeŋ na wiiki a suwa na wiiɗi tamaiki pra, ɗif paŋ ɗa a hala na pini hriŋɗi agulni na mafuni, a ɵina ma kai.

¹³Midini afti hanɗa par ɗa, aga mu birgiki edi midini afti na ki sɗiŋ kai, tiki kaalai, tamaiki kaalai, woni aga ki zi ɵeŋɗi alawai na zamai duvuk gaini girvudi buri aga mu hiniki meefeŋki kai.

¹⁴Buri nɵa, mefeŋ a na gizi, a miɗi na sini EPIƊ-ƊAI par, woni ɗif aga a ha wala mini ɓa: Gaini EPIƊ-ƊAI na karni na a miliɗisi aliɗi Izrayel edi war Egipte par kir kai.

¹⁵Amma aga a muɗa ɗa ɓa: Gaini EPIƊ-ƊAI na karni zaŋ, ni n’a miliɗisi aliɗi Izrayel na midini afti na war gal n’azumai par, gaini afti zamai zamai n’a ɵiriɗi edi midini paŋ. Aga mu wiyiɗis aha midini aftiɗi, afti na mu siŋɗi wiiɗi tamaiɗi ɗa.

¹⁶Aga mu ɵina vokɗi ɗai zi yimi hilif edi, a miɗi na sini EPIƊ-ƊAI par, aga e yimiɗisi maini hilif ɵa, asakal hanɗa, aga mu ɵiniɗi ɗai zi ɵar, nagai e ɵiri amai midini huwuŋ, midini boŋor, war baŋa n sini huwuŋ lai.

¹⁷Buri ɓa, ara a na midini futiɗi paŋ, meefeŋɗi ɗa a kiɗa a ŋoya wuzani ara kai.

¹⁸- Mu tika pa ɗa mu virgiɗi meefeŋɗi gaini tuwurɗi ɗa azi sulu sulu, buri e bindi aftiŋa aŋ wala kadai, e vi bulumŋa gaini kopoŋni alawaiɗi zi rgi gaini wazagai na haharai lai.

¹⁹EPIƊ-ƊAI, gdaŋ na wiya, Hlai zi ŋoyai na wiya, Hlai na mu ŋoya warni war mefeŋ zi gir. Pinzibaɗi ɗai paŋ aga e hilisi suku war koŋɗi yai na puɗu paŋ par, aga e miɗi ɓa: Tamaiyi e nivi aŋ bulum ɗa a eles, a wala na a nafa wala ktai kai.

²⁰Ɗif murɗek ɗa a kiɗa a za Alaw ɗe, ni ɗa a Alaw kai ɗa koo!

²¹EPIƊ-ƊAI a muɗa: Tiyana ɗa aga mu siŋkiɗi gdaŋŋa gaini spakŋa edi jre jre, kapai a yima midiɗi ɓa, yikiŋa ɓa: EPIƊ-ƊAI.