Read Mousgoum Yeremiyas 18 Bible Online

Yeremiyas 18 - Mousgoum bible

Yeremiyas 18

¹EPIƊ-ƊAI a miɗini seŋ wiini Yeremiyas, a miɗini ɓa:

²Faka amai hala ahani ɗif zi rgi grak ɗa, woni aga mu muɗuku seŋ n’aŋ ma ɗa,

³Mu hala ahani ɗif zi rgi grak ɗa, mu navaŋ a na za sda gaini mul na e rgi grak gaini.

⁴Grak n’a zaŋ ɗa, a za gaini futini kai, maini na a yiva a za gaini adiŋkai n’a tuura tiɗi ɗai zi rgi grak ɗa nɵa, a za zamai maini n’a firiyaŋ ɵa.

⁵EPIƊ-ƊAI a muɗaŋa seŋ: A muɗaŋ seŋ, a muɗaŋa maini nɵa:

⁶Mu kiɗa mu za siki maini ɗif zi rgi grak hanɗa ɵa kai ɗi, ɗai na Izrayel? A miɗi na sini EPIƊ-ƊAI par. Ɗai na Izrayel, tiki ki ɗa war ta maini adiŋkai n’aŋ tini ɗif zi rgi grak nɵa.

⁷Hlai zamai ɗa, sini pinziba ktai zaw, sini afti na wiini pai ɗi ɗa, mu muɗa ɓa e rɗi wala amai, zaw e hû wala azumai, zaw e vidi wala edi,

⁸amma na ɓa, pinziba na mu muɗa sini ɗa a bunda payaini na meefeŋ n’aŋ warni pla ɗa, mu hina meefeŋ na mu hiinaŋ aŋ zaŋ sini ɗa.

⁹Hlai zamai ɗa sini pinziba ktai zaw, sini aftini pai ktai mu muɗa ɓa: E rgi wala zaw e pi wala azumai.

¹⁰Amma, na ɓa pinziba hanɗa a za wala n’a firiya agula kai, a ɵina ma kaalai ɗa, mu hina pɗem na mu hiinaŋ aŋ zaŋ sini ɗa.

¹¹Tiyana ɗa, mu siiwuku ku miɗiɗi wiiɗi ɗai na Yuda gaiɗi ɗai na Yeruzalem ɗa ɓa: EPIƊ-ƊAI a na muɗa maini nɵa: Mu zizina gir ktai buriki, mu na za plaŋ siki, a pɗem ɓa a siya ɗi paŋ a hinasi payaini na meefeŋ ɗa edi, ki bindi payaiki gaini sdaki na ki ziŋ ɗa.

¹²Amma e miɗi ɓa: A zi maɗa, tiyi aga mi zi ɗa pini hiini na wiyi, ɗif paŋ a za pini hriŋ na wiiɗi agulni na mafuni ɗa.

¹³Burini hanɗa, EPIƊ-ƊAI a na muɗa maini nɵa: Zi barka, hili ki zilbi arbaɗi pinzibaɗi ɗai ɗa, n’a ɵina ka wazagai na maini hanɗa ɵa ɗa a siya ɗa? Ɓulmi Izrayel te za wazagai na maafanai viya.

¹⁴Ɗif a kiɗa a hina wala n’a niyasi edi sini huwuŋ par ɗa edi war basga ɗi? Zaw maaɗai zi glas na Liban ɗa, ɗif a kiɗa a hinaŋ edi ɗi? Yem na ɗarak n’a kasi gai gai par ɗa, ɗif a kiɗa aŋ saŋ edi ɗi?

¹⁵Amma ɗaiŋa ɗa midiɗi a wula gaya, e zi ɓaka gaini wazagai zi ɗûgûdi zi lûgûzi wiini wazagai na futini su kai, n’abakai e kiɗi aŋ tûrli war payaiɗi, warɗi futiɗi na ɗipar ɗa, kapai e tiki futiɗi n’agogoi gaini n’abakai na gaini zizini kai.

¹⁶E bindi aftiɗi aŋ hlai na gaini tûûri edi, aŋ wala na hi-hir zi mili hunai piɗi ɗai haa kureɗ, nagai n’e vigi woni ɗa paŋ, gdaŋɗi a vada edi, e kikiyi midiɗi.

¹⁷Aga mu ɵiriɗi edi wuzaɗi gawɗi, maini smer na piɗi futi na dawai par nɵa, war mefeŋ na gir a halasi midiɗi, aga mu tiliɗi gaini ara kai, mu siɗiɗi ɗa a duɓa.

¹⁸E miɗi: Hilisi, kutumu mumu midini Yeremiyas, buri ɓa gadai zi ɗû ɗa aga a suwa pai zi ɓaka ɗa kai, gadai zi yel ɗa a suwa ɗif zi yel ɗa kai, seŋ zi miɗi ɗa a suwa ɗif na mini Alaw kaalai. Mu fuɗuŋmu edi gaini mumu, mu tukumu hangalmu sini seŋ na mini kaalai.

¹⁹Tika hangalku sa ta EPIƊ-ƊAI, ɵina seŋ na nagai n’e diriŋa kai ɗa e ɗa miɗiŋ sa ɗa.

²⁰Pɗem ɗa e virgiŋ gaini meefeŋɗi, buri e ɓili waŋ sa tiɓ buri e fiɗiŋa, hina muduku a kɵa buri mu ɗiya wuzaku aŋ muɗa pɗem midiɗi, kapai suwar na wiiku a halasi midiɗi kai.

²¹Buri hanɗa, vidiɗi aliɗi edi gaini wiyamai, pûkûɗi azumai mini kaɵkar, falakaiɗi e hini ali tiɗi kai, e hini war greŋ, maɵagaiɗi ɗa mri a yimiɗi, aliɗi na maɵagaiɗi e mri mini kaɵkar war hatam.

²²A zuva ɓa ɗuuwal a wasi aha war dalamɗi par, won hlai n’aga a kai vokɗi askarai midiɗi tizaw, e ɓili waŋ buri e yimiŋa warni, e gini azaw azumai wuza lai.

²³Amma tuku EPIƊ-ƊAI ku sɗa yel zi fiɗi ɗai n’e ɗa e ziŋ sa ɗa, ku haza meefeŋɗi edi kai, haza tuwurɗi edi wuzani arku par kaalai, a zuva ɓa e yiki azumai wuzaku, war sarti na wiini hiyku ɗa, ziɗi meefeŋ.