Read Mousgoum Yeremiyas 19 Bible Online

Yeremiyas 19 - Mousgoum bible

Yeremiyas 19

¹EPIƊ-ƊAI a na muɗa maini nɵa: hala ku wurasi argini ktai tini ɗif zi rgi grak par, ku miliɗi n’abakai n’arbaɗi ɗai gaini abakaiɗi paakai zi ɓaka puku,

²ku hala war huduk na wiiɗi alini Hinnom n’aŋ mini porte na wiini grak na gaini hiɗi, woni aga ku muɗa seŋ na mu mukuŋku ɗa gaini wuulaku amai.

³Aga mu miɗiɗi ɓa: ɵini seŋ na wiini EPIƊ-ƊAI, tiki paakai na Yuda gaiki tiki ɗai na Yeruzalem, EPIƊ-ƊAI zi spak paŋ, Alaw na wiiɗi Izrayel a na muɗa maini nɵa: mu na kasi gir midini hlai hanɗa, a siya ɗi paŋ n’a ɵina labar hanɗa li ɗa aga a kitiŋa fas tiɗi hunai.

⁴Buri ɓa e hiniŋa edi, e bindi hlai hanɗa hi-hir pla, e zi ɓaka wiiɗi alawai zamai woni hlai hanɗa, wiini alawai na nagai kai, tamaiɗi kai, paakai na Yuda ɗa kaalai e sɗiŋ kai, e vi hlai hanɗa gaini felɗi ɗai na tiɗi warni seŋ kai.

⁵E zizini hlai zi ɓaka na wiini Baal kapai woni e yiɗi aliɗi aŋ ɓaka zi yi wiini Baal, a wala na mu muɗa midini duk kai, na ma a muɗaŋ duk kai, na a halasi warni hiiniŋa duk kaalai.

⁶Buri nɵa mefeŋ a na halasi, a miɗi na sini EPIƊ-ƊAI par, war mefeŋ ni ɗa hlai hanɗa aga e yikiŋ ɓa: Tofet zaw huduk na wiiɗi alini Hinnom kir kai, amma huduk n’e fiɗi ɗai woni.

⁷Warni hlai ni ɗa aga mu vada hiini zi yel n’aŋ warɗi ɗai na Yuda gaiɗi ɗai na Yeruzalem ɗa edi. Aga mu fiɗiɗi edi gaini kaɵkar wuzaɗi gawɗi, mu siɗi war tiɗi nagai n’e piyiɗi aŋ fiɗi ɗa, kopoŋɗi ɗa mu saŋ aŋ simi wiini wazagai zi ɗufli n’arbani hlai n’amai, gaini wazagai n’ezini puɗu puɗu na midini afti.

⁸Aga mu bunda fuŋ n’abai hanɗa aŋ hlai na gaini tûûri edi, aŋ wala zi mili hunai piɗi ɗai, nagai n’aga e vigi ɵimani ɗa gdaŋɗi aga a vada edi, hlai n’aga e tili wazagai n’a ɓulka ɗa, e ciriyi tini hunai.

⁹Gawɗi gaiɗi nagai n’e piyi fiɗiɗi ɗa aga e ciki fuŋ n’abai ɗa, ɗai aga e wiŋ war gir, war haw, e bindi e limiɗi ɗa e ɗi aliɗi dama, e limi marɗi lai.

¹⁰Ku gɵiti argini ɗa wuzani arɗi ɗai n’e kuku puku ɗa,

¹¹ku miɗiɗi ɓa: EPIƊ-ƊAI zi spak paŋ a na muɗa maini nɵa: aga mu gɵiɗi ɗai maini fuŋ n’abai hanɗa nɵa maini n’e gɵi grak na a kiɗa a zizina kir kai ɗa nɵa, aga e pi ɗai maa war Tofet buri hlai zi pi ɗai aŋ kai.

¹²Aga mu za sini hlai hanɗa maini nɵa, a miɗi na sini EPIƊ-ƊAI par, siɗi ɗai na warɗi nɵa lai, aga mu bunda fuŋ n’abai hanɗa kal kal maini Tofet nɵa.

¹³Dalamai na Yeruzalem gaini dalamai na wiiɗi paakai na Yuda aga a bunda haharai maini hlai na Tofet nɵa, dalamai n’amai midini marni par n’e zi ɓaka na wiini wazagai zi ɗûgûdi zi lûgûzi wiini wazagai zi rgi n’arbani hlai n’amai gaini n’e mi ɓaka zi viŋ azumai wiini alawai zamai midini paŋ lai.

¹⁴Yeremiyas a wayasi edi war Tofet par, Won hlai n’EPIƊ-ƊAI a ɵinaŋ woni aŋ muɗa seŋ na wiini mini edi. A ɗiya warɗi pakatai na wiini tempel na wiini EPIƊ-ƊAI zaw a miɗiɗi wiiɗi ɗai paŋ ɓa:

¹⁵EPIƊ-ƊAI zi spak paŋ, Alaw na wiiɗi Izrayel a na muɗa maini nɵa: aga mu kasi midini fuŋ n’abai hanɗa gaini fuŋ n’aŋ pini paŋ, gir na mu miɗiɗi gaini ɓa aga a za siɗi ɗa, buri ɓa e bindi agulɗi gdaŋ e diri e ɵini seŋŋa kai.