Read Mousgoum Yeremiyas 20 Bible Online

Yeremiyas 20 - Mousgoum bible

Yeremiyas 20

¹Pai zi ɓaka Pasehur n’ahini Immer abai na midiɗi ɗai n’e tiki hangalɗi siɗi ɗai n’e kisi tûrli warni Tempel, a tala Yeremiyas a na muɗa seŋ na mini Alaw par edi.

²Pasehur a faka gaini ɗif na mini Alaw Yeremiyas, a ɵiɓaŋ, asakal par a wiini pokolom ezini war mini porte n’amai na wiini Benyamin, na wiini Dalam na wiini EPIƊ-ƊAI.

³Dawaini ɗa Pasehur a waa pokolom n’ezini Yeremiyas ɗa edi, nɵa Yeremiyas a miɗini: EPIƊ-ƊAI aga a yukuku ɓa Pasehur kir kai, amma Mago- Misabib a dara a muɗa: hunai-war gal-paŋ.

⁴Buri EPIƊ-ƊAI a na muɗa maini nɵa: aga mu hunuku warni hunai n’abai, tuku gaiɗi marmakaiku paŋ, aga e mri mini kaɵkar na wiiɗi gawɗi, arku aga a talaŋ lai; Aga mu siɗi ɗai na Yuda paŋ war tini pai na Babilon lai, aga a miliɗi a kiɗi aŋ bege war Babilon, a fiɗiɗi edi gaini kaɵkar lai.

⁵Derni fuŋ n’abai hanɗa paŋ, godaini n’a na ɗa paŋ, wazagaini na caŋ gara ɗa paŋ, godai na wiiɗi paakai na Yuda ɗa paŋ mu siŋɗi wiiɗi gawɗi, gawɗi aga e miliŋ, e hili gaini warɗi Babilon.

⁶Amma tuku Pasehur gaiɗi ɗai n’ahaku paŋ aga ki hili edi aŋ bege, aga ku hala war babilon, aga ku mra woni, e puku woni, tuku gaiɗi marmakaiku na ku miɗiɗi seŋ na mini Alaw na jre kai ɗa.

⁷EPIƊ-ƊAI, tuku ku ɗuulaŋa duwul, mu hina puku su tiŋ tiŋ, ku yimaŋa gaini gdaŋ, gdaŋku a suwaŋa su, mefeŋ paŋ, ɗai e yivi aŋ riyi pa ɵa, ɗai paŋ e ziŋa yewere.

⁸Hlai paŋ na mu muɗa, na mu ɗuula, na mu muɗa edi midini: karai gaini wazagai zi ɓilki ɗa, seŋ na wiini EPIƊ-ƊAI a kaŋa kureɗ mini tirki gaini yewere.

⁹Mu muɗa li ɓa, aga mu yikaŋ ma kir kai, mu muɗa seŋ war yikini kir kaalai ɗa, mu tala sa maini na ɓa afu a na ya amlai warɗi agula, amlai warni keskeŋa lai, mu fuɗa was aŋ rozoŋ, amma mu kiɗa kai.

¹⁰Buri mu na ɵina seŋ na maafanai miɗi ɗai viya: e yikiŋa ɓa: "hunai war gal paŋ". Na zamai e miɗi ɓa: wunumu pini amai, na zamai ɗa e wiyi seŋ ɓa wunumu pini amai. Marmakaya maa e biyi na ɓa mu kɵa, e miɗi ɓa: aga mu nuvuŋmu war seŋ ktai ɗi; nɵa aga mu rɗumu amai midini, aga mu vurgunumu meefeŋ na a zuŋmu ɗa.

¹¹Amma EPIƊ-ƊAI aŋ gaya, maini gaŋgalaŋ zi spak nɵa, buri nɵa nagai n’e ɗa e ziŋa gir ɗa aga e yiki azumai, aga e rɗi amai kai, siyer aga a yimiɗi buri na e hiiniŋ warɗi ɗa a va amai kai, a siyer n’a vada kai, na midini ɗif aga a wula gaini kaalai.

¹²EPIƊ-ƊAI zi spak paŋ, na ku sɗa wala n’aŋ warni ɗif na jre, na ku sɗa wala n’aŋ war sini gaini n’aŋ warni hiinini ɗif, hinaŋa mu tala meefeŋ n’aga ku zaŋ siɗi aŋ vrak, buri mu hina seŋŋa paŋ ɗa war tuku.

¹³Zini yama burini EPIƊ-ƊAI, kûli EPIƊ-ƊAI buri a pla ɗif na haw ɗa edi, tiɗi ɗai na maafanai par.

¹⁴Mefeŋ na mu waa warni ɗa, tusa a sumna midini! mefeŋ na ama te waaŋa warni ɗa, ɓiki a sumna midini kai.

¹⁵Ɗif n’a kiini labar zi firiyi wiini apa ɓa: ku waa ahi bu ɗa, na a vaŋ gaini firiyi lai ɗa, tusa a sumna midini.

¹⁶A zuva ɓa ɗif ni ɗa a bunda maini fuŋ n’abakai n’EPIƊ-ƊAI, a tuuraŋ edi gaini hiinini haw kai ɗa nɵa! A zuva ɓa dawai par cup ɗa a ɵina ɗa a ɗuuwalzi zinai, girvudi ɗa a ɵina ɗa a suura zi gaw.

¹⁷Ku fuɗaŋasi warɗi ama par kai ɗa buri maɗa, aŋ ta ɗa ama te za funa aŋ yeɵŋa, ziyi na te ziya ɗe a ɵafu edi kaalai.

¹⁸Mu niyasi edi warɗi ama par tiɓ buri maɗa? Na ɓa a na burini siɗini gir gaini kayai, aŋ vada mefeŋŋa warni siyer maini hanɗa ɵa ɗa!