Read Mousgoum Yeremiyas 21 Bible Online

Yeremiyas 21 - Mousgoum bible

Yeremiyas 21

¹EPIƊ-ƊAI a miɗini seŋ wiini Yeremiyas won hlai na pai Sedesiyas a ɵinasi Pasehur n’ahini Malkiya gaini pai zi ɓaka Sofoniya n’ahini Maseya aŋ miɗini ɓa:

²Za barka zilba EPIƊ-ƊAI buriyi, buri ɓa Nebukadnezar pai na Babilon a na hitimiyi, ablaŋtaŋkai n’EPIƊ-ƊAI aga a za hilla n’abai ktai buriyi aŋ birgaŋɗi edi siyi par ɗi ɗa?

³Yeremiyas a miɗiɗi: Aga ki miɗini Sedesiyas ɗa maini nɵa:

⁴Epiɗ-ɗai Alaw na wiiɗi Izrayel ɗa a na muɗa maini nɵa: Wazagaiki zi gaw na ki ɗa hitimi pai na Babilon gaiɗi ɗai na Babilon n’e ɗa e cikiki aha gaini ɗa, aga mu wayaŋsi aha arbani fuŋ n’abai hanɗa.

⁵Aga mu hitimiki muta dama gaini spak n’abai, gaini gdaŋ, gaini hiy gaini suwar n’abai lai.

⁶Aga mu fiɗiɗi ɗai na war fuŋ n’abai hanɗa edi, ɗai murɗakai gaini wazagai n’e zini puɗu puɗu paŋ, aga e mri mini vlak na meefeŋ.

⁷Asakal hanɗa, a miɗi na sini EPIƊ-ƊAI par, aga mu sa Sedesiyas pai na Yuda gaiɗi ɗaini n’abakai gaiɗi ɗai na woni, gaiɗi ɗai n’e hini karɗi war fuŋ n’abai hanɗa pini vlak gaini gaw, gaini wiyamai lai paŋ, aga mu siɗi war tini Nebukadnezar pai na Babilon, gaiɗi gawɗi, gaiɗi nagai n’e piyi fiɗiɗi lai, aga e vidiɗi edi gaini kaɵkar, aga a hiina haw buriɗi kai, aga a hina ɗif ktai piɗi kai, hiinini haw aga a yimaŋ buriɗi kaalai.

⁸Wiiɗi ɗai hanɗa aga ku miɗiɗi ɓa, EPIƊ-ƊAI a na muɗa maini nɵa: Mu na ɓasa futi wuzaki sulu, futi na wiini mri gaini suŋfa, ki viri pini ktai.

⁹Ɗif n’a hina li aha warni fuŋ n’abai hanɗa aga a mra mini kaɵkar, mini wiyamai zaw mini vlak, amma ni n’a niyasi li edi, a sa sini li tiɗi ɗai na Babilon na e cikiki aha ɗa aga a sumna karni, suŋfani ɗa a der na wiini.

¹⁰Mu bundasi ara sini fuŋ n’abai hanɗa aŋ pɗem burini kai, amma aŋ zini meefeŋ, a miɗi na sini EPIƊ-ƊAI par, aga mu sa fuŋ n’abai hanɗa wiini pai na Babilon aga a ɵa afu pini.

¹¹Siɗi pakatai na wiini pai na Yuda, ɵini seŋ n’EPIƊ-ƊAI a na muɗaŋ ɗa.

¹²Pinzibani David, EPIƊ-ƊAI a na muɗa maini nɵa: gorof par paŋ ki ziti sariya maini n’a na ɗa ɵa war jre, nagai n’e ɗi war vram ɗa, ki piliɗi edi tiɗi nagai n’e ɗa virmiɗi par, ɵa kai ɗa, pini sdaki na meefeŋ ɗa, suwar na wiya aga a luɓasi maini afu nɵa, aga a ya ɗif n’aga a fuuɗaŋ aŋ kaalai.

¹³Tiyana mu tulumu marmu haw, tiki na ki simni warni huduk, midini huwuŋ na plas, a miɗi na sini EPIƊ-ƊAI par, na ki hiini warki ɓa, n’aga a niyasi azumai woni na aŋ hitimiyi ɗa a siya ɗa? N'aga a niya aha warni dalamyi ɗa a siya ɗa?

¹⁴Aga mu zilbiki miki pini ali na sdaki a waŋ ɗa, a miɗi na sini EPIƊ-ƊAI par, aga mu ɵa afu pini jur ɗa, aga a ya hlai na ɵimani paŋ.