Read Mousgoum Yeremiyas 22 Bible Online

Yeremiyas 22 - Mousgoum bible

Yeremiyas 22

¹EPIƊ-ƊAI a na muɗa maini nɵa: hala ahani pai na Yuda, woni aga ku muɗa seŋ hanɗa,

²ku miɗiɗi ɓa: ɵina seŋ na wiini EPIƊ-ƊAI tuku pai na Yuda na ku sumna midiɗi Paramai zi pai na wiini David, tuku gaiɗi ɗaiku n’abakai gaiɗi na puku paŋ na ki niyi war mini porte hanɗa par.

³EPIƊ-ƊAI a na muɗa maini hanɗa nɵa: ki zi maini n’a na ɗa ɵa warni jre, nagai n’e ɗa warni vram ɗa, ki piliɗi edi tiɗi nagai n’e virmiɗi par, ki zini gir wiini ɗif zi zak ɗa kai, wiini ɗif na huyuk ɗa kai, wiiɗi muni na war greŋ kaalai, ki kiri ɗai kai, ki mi felɗi ɗai na tiɗi warni seŋ kai edi warni hlai hanɗa kaalai.

⁴Na ɓa ki zi pini seŋ hanɗa jre jre ɗa, paakai n’e simni midiɗi Paramai zi pai na wiini David ɗa paŋ, aga e niyisi war mini porte na wiini dalam hanɗa ɗaw, midini saretai gaini plasai, nagai gaiɗi ɗai ɗi n’abakai gaiɗi ɗai ɗi na piɗi paŋ.

⁵Amma na ɓa ki ɵini seŋ hanɗa kai ɗa, mu ha wala ma gaya ta dama, a miɗi na sini EPIƊ-ƊAI par, dalam hanɗa aga te bunda aŋ greŋ.

⁶Buri EPIƊ-ƊAI a na muɗa sini dalam na wiini pai na Yuda ɗa maini nɵa: ku tala ara juf maini jur na Galaad nɵa, maini merfeŋni huwoŋai na Liban nɵa lai, gaini hanɗa paŋ ɗa, fakat fakat aga mu bunduku aŋ basga na kaɗataŋ, aŋ fuŋ n’abai na ɗai warni kai.

⁷Aga mu kiɗisi ɗai zi tûûri hlai muduku, ɗif paŋ gaini wazagaini tini, aga e fiɗi luwuŋ sedreku na juvai gara ɗa azumai, e pûkiŋ arni afu lai.

⁸Pini zibaɗi ɗai viya aga e vigi ɵimani fuŋ n’abai hanɗa, aga e zilbi marɗi ɓa: EPIƊ-ƊAI a za sini fuŋ n’abai hanɗa ɵa buri maɗa.

⁹Aga e wiyiɗi seŋ ɓa: buri ɓa e hini bonu na wiini Epiɗ-ɗai Alaw na wiiɗi edi mak, e hûrgi azumai wuzani alawai na zamai, e zi ɵeŋni lai.

¹⁰Tiki ɗai na Yuda, ki tûwi ni n’a mra kai, ki ɵi hama siki burini kaalai, Amma tiwi ni n’a na hala ɗa, buri ɓa aga a wayasi kir kai, aga a tala afti na waa warni kir kaalai.

¹¹Buri EPIƊ-ƊAI a na muɗa midini Sallum n’ahini Yoziyas pai na Yuda n’a suma pai war balamni Yoziyas n’epini, na tiyana aŋ woni na kai ɗa maini nɵa: aga a wayasi woni na kir kai,

¹²amma aga a mra warni hlai n’e kiŋ edi woni ɗa, aga a tala afti hanɗa kir kai.

¹³Haw gara burini ni na a rga dalamni war jre kai na a rga dalamni zi etas wuzani sek, a ɗiya midini na a za siɗi ɗai kai, a mula ɗai aŋ zini sda kadai meere, a siɗi vrakɗi kai;

¹⁴a muɗa gaini warni ɓa: aga mu rgiti dilimi n’amai, gaini dalamai n’amai etas n’abakai, aga mu ɓula fenetir arɗi, mu gaara luwuŋ Sedre amai sini hlai gar gar, aga mu yima peŋtûr na mekele diɗi kaai kaai lai.

¹⁵Ku firiya ku siŋka suku ɓa ku pai gaini luwuŋ Sedre ɗa ɗi. Apuku a naka ɗa a suma lai, a ca lai kai ɗi? Amma a za paŋ maini na a na ɗa ɵa, war jre lai, wala ktai a zini gir kai.

¹⁶A ziti sariya wiiɗi na murgakai gaiɗi na haw ɗa war jre, nɵa hlai paŋ ɵeɗ, ɗif na a za maini hanɗa nɵa ɗa a siŋka a sɗaŋa ya kai ɗi? A miɗi na sini EPIƊ-ƊAI par.

¹⁷Arku gaini hiiniku ɗa, a na midini der na a niya suku ɗa, buri ma felɗi ɗai na tiɗi warni seŋ kai edi, aŋ za gir wiiɗi ɗai, aŋ kara ɗai lai.

¹⁸Buri hanɗa, EPIƊ-ƊAI a na muɗa midini Yoyakim n’ahini Yoziyas na pai na Yuda ɗa maini nɵa: war mrini ɗa ɗif aga a zina yama zi tuwi midini kai, ɗif aga a ɵa hama ɓa: aiya tawala na wus ɗa, aiya tawala na muni ɗa, ɵa kai. ɗif aga a tuwaŋ ɓa: aiya epin-geza, aiya paiŋa ɗa, nɵa kaalai.

¹⁹Aga e piŋ maini n’e pi ablehö nɵa, aga e sipiŋsi, e biliŋ anene mini porte na Yeruzalem ɗa su.

²⁰Yeruzalem, niya amai merfeŋni huwuŋ na Liban, ɗuula, ɗuula amai midini hlai na plas na Basan, ɗuulasi amai par midini huwoŋai na Abarim, buri nagai na e zi marmai gaiku paŋ, e vidi edi vat.

²¹Mu muɗuku war sarti na ku naka hûwiyi suku kai ɗa, haa war agwiku par, amma ku wayaŋa seŋ ɓa: mu firiya mu ɵina seŋku kai. Payaiku a na maini hanɗa nɵa haa war agwiku par, ku ɵina ka ma duk kai.

²²Ɗaiku zi giɗimi paŋ smer aga a dûgûɗi, marmakaiku paŋ aga e hili edi aŋ bege, nɵa siyer aga a yimiki, aga ku tika siyer, burini meefeŋ na ku zaŋ paŋ ɗa.

²³Tuku na ku sumna arbani jur na Liban, na gutku amai tini luwuŋ Sedre, aga ku ɵa hama suku, Won hlai na gir a soɗi li suku ɗa, Won hlai n’aga ku sɗa gir maiɗi muni na pûkûa tikitisi nɵa!

²⁴Jire zaŋ, mu ha wala ma gaya ta dama, a miɗi na sini EPIƊ-ƊAI par. Koo ɓa Koniya n’ahini Yoyakim pai na Yuda ɗa, a nafu midiɗi ta na wus maini adoŋo ɵa ɗi, aga mu rɗaŋsi edi.

²⁵Aga mu suku war tiɗi nagai n’e ɗa piyi fiɗiku ɗa gaiɗi nagai n’e miliku hunai puku gara ɗa lai, a dara a muɗa: Nebukatnezar pai na Babilon gaiɗi ɗai na Babilon ɗa lai.

²⁶aga mu burguku gaiɗi amuku na te wuku ɗa edi midini afti zamai na ki wii warni kai, aga ki mri edi woni.

²⁷Aga ki piyi aŋ wiyisi aha midini aftiki ɗa, amma aga ki kiɗi ki wiyisi kai.

²⁸Koniya ni ɗa aŋ maini grak na gaini giɵi duk na a nava wala kir kai ɵa ɗi? A wala na nafani kai ɗi? E birgiɗi edi gaiɗi alini paŋ midini afti n’e sɗiŋ kai ɗa buri maɗa?

²⁹Aftiŋa, aftiŋa, ɵina seŋ na wiini EPIƊ-ƊAI ɗa.

³⁰EPIƊ-ƊAI a na muɗa maini nɵa: ɗûɗif hanɗa maini ɗif na ahini aŋ kai nɵa, maini ɗif n’aga a nava kai haa sini mrini ta nɵa, buri ɓa arbaɗi pinzibani ɗa, ktai n’aga a sumna midiɗi Paramai zi pai na wiini David, aŋ ŋa midiɗi Yuda kai.