Read Mousgoum Yeremiyas 23 Bible Online

Yeremiyas 23 - Mousgoum bible

Yeremiyas 23

¹Haw gara buriɗi ɗai zi giɗimi n’e ɵiri fara n’aŋ war gɗamŋa ɗa edi, e hiniŋ a ba edi lai, a miɗi na sini EPIƊ-ƊAI par.

²Buri hanɗa, Epiɗ-ɗai Alaw na wiiɗi Izrayel a na muɗa siɗi ɗai zi giɗimi n’e ɵi wuzaɗi ɗaini maini nɵa: tiki ki ɵiri fara na wiya ɗa edi, ki birgi haakai gaini adumai ɗa edi ki tiki hangalki sini kai, nɵa ta aga mu tika hangala siki aŋ ziki meefeŋ burini sdaki na meefeŋ ɗa, a miɗi na sini EPIƊ-ƊAI par.

³Ta dama aga mu tapasi pini faraŋa na a hina edi midini afti na mu ɵaraŋ edi midini paŋ par, aga mu wayaŋsi war hlaini na a naka warni ɗa, aga a sisiɗa viya, a bunda viya lai.

⁴Aga mu mula ɗai zi giɗimi midini, aŋ giɗimiŋ, aga a huna kir kai, hunai n’abai aga a yimaŋ kir kai, ktai ma aga te ba edi kai, a miɗi na sini EPIƊ-ƊAI par.

⁵Mefeŋ a na a gizi, a miɗi na sini EPIƊ-ƊAI par, war mefeŋ ni ɗa aga mu sini ahi na jre wiini David, aga a ŋa aŋ pai, a riya wuzani lai, aga a za sda midini afti maini na a na ɗa ɵa, war jre lai.

⁶War sarti ni ɗa, Yuda aga te pla edi, Izrayel ɗa aga te sumna ɵeɗ, aga e sini yiki ɓa: EPIƊ-ƊAI ɗa a jre na wiyi.

⁷Buri nɵa mefeŋ a na gizi, a miɗi na sini EPIƊ-ƊAI par, war mefeŋ ni ɗa, ɗai aga e hi wala miɗi ɓa: "gaini EPIƊ-ƊAI na karni n’a miliɗisi aliɗi Izrayel edi warɗi Egipte par ɗa kir kai"

⁸Amma e hi miɗi ɓa: gaini EPIƊ-ƊAI na karni n’a miliɗisi pinzibaɗi Izrayel edi midini afti na war gal n’azumai sek ɗa par, edi midini afti n’a ɵiriɗi edi midini paŋ par lai, n’a wiyiɗisi aha kapai e simni midini aftiɗi.

⁹Miɗi na siɗi ɗai na mini Alaw, m’an na gdaŋ wara kai, sa paŋ a yima law law, m’an na maini ɗif na gaini ciini su ɵa, maini ɗif na sul ɗa a sûwiini gdaŋni su ɵa. Hanɗa burini EPIƊ-ƊAI, burini seŋni na sɗik lai.

¹⁰Afti ɗa a va gaiɗi ɗai n’e zi maɵara, afti ɗa aŋ kwimi burini tusa, hlai na farai a suma warni edi war basga ɗa a huula hûwel, ɗai ɗa e rivi pini meefeŋ, wala na kadai tiɓ a za kai ɗa, e ziŋ mriɗi edi ta.

¹¹Ɗai na mini Alaw gaiɗi paakai zi ɓaka e zi ɗa a sda na haharai, meefeŋ na e ziŋ ɗa mu nava haa amlai warni tempelŋa ta, a miɗi na sini EPIƊ-ƊAI par.

¹²Buri nɵa futiɗi ɗa aga te bunda te sirɓa, aga e hûgûɗi e kɵi azumai, buri aga mu hinasi gir midiɗi, war buza n’aga mu zilbiɗi miɗi ɗa, a miɗi na sini EPIƊ-ƊAI par.

¹³Mu tala wazagai na a fuɗa si gara siɗi ɗai na mini Alaw na Samariya, e miɗi seŋ na wuze ɗa war yikini Baal, e wûliɗi ɗaiŋa na Izrayel ɗa edi lai.

¹⁴Amma ɗai na mini Alaw na Yeruzalem ɗa, mu tala wazagai na haharai: e zi maɵara, e zi eles, e zini piɗi ɗai na maafanai, gaini hanɗa e hiniɗi ɗai aŋ hini payaiɗi na meefeŋ ɗa edi kai, nagai paŋ e bindi buriya maiɗi ɗai na Suduma nɵa, ɗai na warɗi maiɗi ɗai na Gumra nɵa lai.

¹⁵Buri hanɗa, EPIƊ-ƊAI zi spak paŋ a na muɗa siɗi ɗai na mini Alaw maini nɵa: aga mu siɗi luwuŋ na ɗewek miɗi aŋ simi, aga mu siɗi yem na gaini kiŋiwi miɗi aŋ ci lai, buri meefeŋ a waa tini edi midini afti paŋ na ɗa gaiɗi ɗai na mini Alaw na Yeruzalem ɗa.

¹⁶EPIƊ-ƊAI zi spak paŋ a na muɗa maini nɵa: ki yimi seŋ na wiiɗi ɗai na mini Alaw n’e miɗiki seŋ na wuze, na e dûûliki gaini seŋ na a nava kai ɗa kai. Wala na a siŋka arɗi n’e miɗiŋki na ɗa a na sini EPIƊ-ƊAI par kai, amma a wala na e hiiniŋ e ɗi nagai dama.

¹⁷Nagai n’e zi anya sini seŋ na wiini EPIƊ-ƊAI ɗa e miɗi ɗa ɓa: EPIƊ-ƊAI a muɗa ɓa: wala ktai na meefeŋ aga a za siki kai. Siɗi nagai n’e zi pini hiriŋ na wiiɗi agulɗi ɗa, e miɗiɗi ɓa: gir aga a titimiki kai.

¹⁸Ɗif na a sumna ka warni kitini-mi na wiini EPIƊ-ƊAI, aŋ tala, a ɵina seŋni ɗa a siya ɗa? N'a tika hangalni sini seŋni, na a ɵinaŋ ezini lai ɗa a siya ɗa?

¹⁹Barawai na wiini EPIƊ-ƊAI a na halasi, suwar na wiini ɗa a na luɓasi, barawai a na guna, a guna midiɗi ɗai na maafanai ɗa.

²⁰Hiy na wiini EPIƊ-ƊAI ɗa aga a tika azumai, haa hiini n’aŋ warni ɗa a dabaŋ edi ta, a vaŋ amai ta lai. Wuzamu sek ɗa aga ki nivi ezini seŋ hanɗa.

²¹Mu ɵiniɗiɗi ɗai na mini Alaw hanɗa kai, amma e riviɗi gaini rûvi, mu miɗiɗi seŋ kai, paŋ ktai e miɗi seŋ na wuze war yikiŋa.

²²Na ɓa e simnifu warni kitini-mi na wiya ɗa, aŋ ta ɗa aga e miɗi seŋŋa wiiɗi ɗaiŋa ɗa, aga e wiyiɗisi warɗi futi na mafuni par, sini sdaɗi na maafanai par lai.

²³Ta m’Alaw buri wala n’aŋsa gobi kiini ɗi, a miɗi na sini EPIƊ-ƊAI par, wala na gai gai ɗa m’Alaw na wiini kai sime ɗi?

²⁴Ɗif a sɗa aŋ ŋoya woni hlai ktai dam, mu kiɗa mu talaŋ kai ɗi? A miɗi na sini EPIƊ-ƊAI par. Hlai n’amai gaiɗi yai ɗa, mu vaŋ ta kai ɗi? A miɗi na sini EPIƊ-ƊAI par.

²⁵Mu ɵina seŋ na ɗai na mini Alaw n’e miɗi eles war yikiŋa, e ɗa miɗiŋ ɓa: weseŋ a pɵaŋa, weseŋ a pɵaŋa ɗa!

²⁶Ɗai na mini Alaw hanɗa, aga e miɗi ɗa a eles ɵa, a rhai n’aŋ war hiiniɗi ɵa haa kaswata ɗa?

²⁷Gaini weseŋɗi zi piɵi n’e ɗa e miɗiŋ arbaɗi marɗi ɗa, e firiyi ɓa ɗaiŋa midiɗi a wula gaya maini na tamaiɗi midiɗi a wula gaya pini Baal ɗa nɵa.

²⁸Ɗif na mini Alaw na weseŋ a pɵaŋ li ɗa, a vurna weseŋ na a pɵaŋ ɗa, ni na seŋŋa aŋ mini ɗa a muɗa seŋŋa edi war jreni lai, bra na gaini wai ɗa a diŋgaŋ ɗa a maɗa? A miɗi na sini EPIƊ-ƊAI par.

²⁹Seŋŋa ɗa a na maini afu nɵa kai ɗi? A miɗi na sini EPIƊ-ƊAI par, maini marto n’e hiɗi huwuŋ gaini nɵa kai ɗi?

³⁰Buri nɵa aga mu faka amai, a miɗi na sini EPIƊ-ƊAI par, siɗi ɗai na mini Alaw n’e hili seŋŋa wiiɗi marɗi.

³¹Aga mu faka amai, a miɗi na sini EPIƊ-ƊAI par, siɗi ɗai na mini Alaw na gaiɗi alsiɗi ɗa e girɗi miɗi ɗa a na sini Alaw par.

³²Aga mu faka amai, a miɗi na sini EPIƊ-ƊAI par siɗi ɗai na mini Alaw n’e miɗi weseŋ zi pɵi z'eles, n’e virniŋ e wûliɗi ɗaiŋa edi gaini eles, gaini seŋ na jreni kaalai, paŋ ktai Ta mu ɵiniɗiɗi kai, mu miɗiɗi seŋ kai, e ɗi ɗai na e niviɗi ɗai hanɗa kaalai, a miɗi na sini EPIƊ-ƊAI par.

³³Na ɓa ɗai hanɗa, ɗif na mini Alaw, zaw pai zi ɓaka a zilbuku li ɓa miɗi na wiini EPIƊ-ƊAI ɗa a na wata ɗa? Guma n’EPIƊ-ƊAI a tukuŋmu mudumu ɗa a na wata ɗa? Ku miɗiɗi ɓa guma ni ɗa ki ɗi tiki, aga mu hogoŋ edi mada par, a miɗi na sini EPIƊ-ƊAI par.

³⁴Na ɓa a ɗif na mini Alaw, zaw pai zi ɓaka, zaw ɗif n’arbaɗi ɗai, na a muɗa li ɓa EPIƊ-ƊAI a tikaŋa guma maɗa ta ɗa, aga mu zilbini mini ni gaiɗi pakataini paŋ.

³⁵Aga ki miɗi wiiɗi marki, wiiɗi tawalakaiki lai maini nɵa: EPIƊ-ƊAI ɗa a waya seŋ ɗa ɓa maɵa ɗa, EPIƊ-ƊAI a muɗa ɗa maɵa ɗa?

³⁶Amma miɗi na ɓa EPIƊ-ƊAI a tika guma midini ɗif ɗa aga a niyasi miki par kir kai, seŋ na wiini EPIƊ-ƊAI ɗa a zak na guma ɗi, a na ɵa kai, amma na ɓa ki miɗi maini hanɗa ɵa ɗa, ki viɗi na ɗa a seŋ na wiini Alaw na karni, wiini Epiɗ-ɗai Alaw zi spak, Alaw na wiimu.

³⁷Ku miɗini wiini ɗif na mini Alaw ɗa ɓa: EPIƊ-ƊAI a wiyuku seŋ ɗa ɓa maɵa ɗa, EPIƊ-ƊAI a muɗuku ɓa maɵa ɗa?

³⁸Amma na ɓa siki aŋ miɗi ɓa: EPIƊ-ƊAI a tika guma midini ɗif, EPIƊ-ƊAI a na muɗa maini nɵa: buri ki ɗa miɗi seŋ na ɓa EPIƊ-ƊAI a tika guma midini ɗif, paŋkai mu miɗiki ɓa, aga ki miɗi ɓa: "EPIƊ-ƊAI a tika guma midini ɗif" kai!

³⁹Aga mu wula maɗa gaiki, aga mu birgiki edi sa par tiki gaini fuŋ n’abai na mu siŋki wiiki tiki gaiɗi tamaiki.

⁴⁰Aga mu dûgûki gaini siyer, ki hini warni siyer ɵa haa kureɗ, aga ki nivi siki kir kai.