Read Mousgoum Yeremiyas 24 Bible Online

Yeremiyas 24 - Mousgoum bible

Yeremiyas 24

¹EPIƊ-ƊAI a siŋkaŋa dologo na wiini alini luwuŋ Fige sulu wuzani tempel na wiini EPIƊ-ƊAI ca, asakal na Nebugatnezar pai na Babilon a yima Yekoniya n’ahini Yoyakim pai na Yuda, gaiɗi abakai na Yuda, gaiɗi ɗai n’e tûki dalam gaiɗi nagai n’e gɵi kawakai n’e ɵi mini porte gaini ɗa lai a Yeruzalem par a kiɗi a Babilon.

²Dologoi na ktai ɗa, alini luwuŋ Fige na warɗi ɗa a na pɗamai, maini na a naiya avut, n’e riwiŋ avut ɗa nɵa, dologoi na ktai ɗa aŋ warɗi ɗa alini luwuŋ Fige na maafanai, n’a kiɗa a luma kai buri ɓa a suwa maafanai gara.

³EPIƊ-ƊAI a zilbaŋa, Yeremiyas, ku tala ɗa a maɗa, mu wiyini seŋ, alini luwuŋ Fige, na pɗamai ɗa, pɗamai gara, na maafanai ɗa, maafanai gara, a kiɗa a luma kai buri ɓa a suwa maafanai.

⁴EPIƊ-ƊAI a muɗaŋa seŋ, a muɗaŋa ɓa: Epiɗ-ɗai Alaw na wiiɗi Izrayel a na muɗa maini nɵa:

⁵Epiɗ-ɗai Alaw na wiiɗi Izrayel a na muɗa maini nɵa: ta lai aga mu mula ara midiɗi ɗai na Yuda n’e miliɗiɗi edi woni na par, e kiɗi midini afti na wiiɗi ɗai na Babilon.

⁶Aga mu za pɗem siɗi, aga mu wiyiɗisi aha midini afti hanɗa, aga mu rgiɗi amai mu hûɗi azumai kir kai, aga mu piɗi azumai mu hûrɗiɗi amai kir kai.

⁷Aga mu sitiɗi agul na kapai e siɗiŋa ɓa Ta m’EPIƊ-ƊAI, aga e bindi aŋ ɗaiŋa, Ta aga mu bunda aŋ Alaw na wiiɗi lai, na ɓa e wiyisi li sa gaiɗi agulɗi paŋ ɗa.

⁸Amma burini alini luwuŋ Fige na a kiɗa a luma kai buri ɓa a maafanai ɗa, EPIƊ-ƊAI a na muɗa maini nɵa: aga mu za sini Sedesiyas pai na Yuda, gaiɗi ɗaini n’abakai, gaiɗi ɗai na Yeruzalem n’e hini gaiɗi nagai n’e hini ka aha midini afti hanɗa, gaiɗi nagai n’e ɗa warɗi Egipte ɗa lai maini nɵa.

⁹Aga mu bindiɗi aŋ wala na a mula hunai, aŋ gir buriɗi aftiɗi paakai na midini afti ɗa paŋ, aŋ wala zi tirki, aŋ wala zi murɵi, aŋ wala na ɗai e riyi pini, aŋ wala zi tusa lai Won hlai na mu ɵiriɗi edi woni paŋ.

¹⁰Aga mu hinasi gaw gaini wiyamai gaini vlak midiɗi haa e vidi edi midini afti na mu siŋɗi aŋ wiiɗi gaiɗi tamaiɗi paŋ par.