Read Mousgoum Yeremiyas 25 Bible Online

Yeremiyas 25 - Mousgoum bible

Yeremiyas 25

¹War buza n’ag'aŋ puɗu, Yoyakim n’ahini Yoziyas a na aŋ pai war Yuda, EPIƊ-ƊAI a miɗini seŋ wiini Yeremiyas buriɗi ɗai na Yuda paŋ; hanɗa a buza n’avut na Nebugatnezar a na aŋ pai war Babilon.

²Seŋ hanɗa Yeremiyas a muɗaŋ wiiɗi ɗai na Yuda, wiiɗi ɗai na Yeruzalem ɗa paŋ lai.

³Sini buza n’ag'aŋ doogo pi hu, na Yoziyas n’ahini Ammon a na aŋ pai war Yuda par haa girna, girna buza caaɓa pi hu n’EPIƊ-ƊAI a na muɗa seŋ hanɗa, mu na miɗiki seŋ hanɗa kureɗ, mu miɗiŋki amma ki ɵiniŋ kai.

⁴EPIƊ-ƊAI a ɵiniɗikisi ɗaini zi sda ɗai na mini Alaw, a ɵiniɗisi pra, pra a kaya kai, amma tiki ki ɵini kai, ki tiki hangalki aŋ ɵini kaalai.

⁵A miɗiki ɓa: a pɗem ɓa a siya ɗiu paŋ a hina payaini na meefeŋ gaini sdani na maafanai lai edi, kapai ki simni midini afti n’EPIƊ-ƊAI a siŋki wiiki gaiɗi tamaiki gamai par haa kureɗ.

⁶Ki hili pini alawai zamai aŋ zi ɵeŋni, aŋ hûrgi azumai wuzani lai kai. Ki ɓilkitiŋa agula gaini sda na ki ziŋ gaini tiki kai, nɵa aga mu ziki wala ktai na meefeŋ kai.

⁷Amma tiki ki ɵini ma kai, a miɗi na sini EPIƊ-ƊAI par, tiki ɓilkiŋa agula gaini sda na ki ziŋ gaini tiki na a na kasi gir midiki tiyana na ɗa.

⁸Buri hanɗa, EPIƊ-ƊAI zi spak paŋ a na muɗa maini nɵa: buri ki yimi seŋŋa kai ɗa,

⁹mu na ɵina piɗi ɗai na war gal n’azumai par ɗa, a miɗi na sini EPIƊ-ƊAI par, gaini Nebugatnezar pai na Babilon na ɵeŋŋa aga mu tiɗisi midini afti hanɗa, midiɗi ɗai na warni, gaini afti na ɵimani paŋ, kapai a vidiɗi edi, e bindi hlaiɗi aŋ hlai na kadai su su, mu bundaŋ aŋ hlai na hi-hir, aŋ basga zi greŋ, ɗai n’e vigi paŋ ɗa hunai a yimiɗi, e kikiyi midiɗi.

¹⁰Aga mu ɗiya suura na mini fet gaini yama zi firiyi, gaini yama na wiiɗi ɗai n’e mili marɗi, suura na wiini fuŋ zi siri wai gaini gaglai na wiini lampa lai.

¹¹Afti hanɗa paŋ aga a bunda aŋ basga zi greŋ, aŋ hlai na gaini tûûri edi, afti hanɗa paŋ a hina pini spakni pai na Babilon ɵa haa buza doogo doogo muguzak.

¹²Amma Won hlai na buza na doogo doogo muguzak a va li amai ɗa, aga zilbini mini pai na Babilon gaiɗi ɗaini buri meefeŋɗi n’e ziŋ ɗa, a miɗi na sini EPIƊ-ƊAI par. Afti na wiiɗi ɗai na Babilon ɗa aga mu bundaŋ aŋ hlai na kadai su ɵa gamai.

¹³Aga mu kasi midini afti hanɗa, wala na mu muɗa midini paŋ, n’aŋ gaini ɗû warni maktuɓ hanɗa, na ɗif na mini Alaw Yeremiyas a muɗa midini sini pinziba paŋ ɗa.

¹⁴Buri ɓa pinziba zi spak gaiɗi paakai n’abakai aga e ŋi midiɗi nagai lai, aga mu virgiɗi pini sdaɗi n’e ziŋ gaini meefeŋ paŋ n’e ziŋ ɗa.

¹⁵Buri Epiɗ-ɗai Alaw na wiiɗi Izrayel a na muɗa maini nɵa: yimitiɗi kup na gaini vi gaini viŋ na wiini suwar hanɗa, ku sitiɗi wiini pinzibaɗi ɗai na mu ɵunuku arbaɗi paŋ aŋ ci.

¹⁶Aga e ci, e kɵini, e bindi maini na yel midiɗi kai ɵa, Won hlai n’aga e tili gaw na mu ɵinaŋɗi arbaɗi ɗa.

¹⁷Mu tikiti kup ɗa war tini EPIƊ-ƊAI par, mu sitini wiiɗi pinziba n’EPIƊ-ƊAI a ɵinaŋa arbaɗi paŋ aŋ ci.

¹⁸Mu tikaɗi pa aha war Yeruzalem par, gaini fuŋ n’abakai na Yuda ɗa, gaiɗi paakaiɗi gaiɗi ɗai na abakai kapai a bunda aŋ basga zi greŋ, aŋ hlai na gaini tûûri edi, aŋ wala zi mili hunai piɗi ɗai, aŋ kikiyi midiɗi, aŋ wala zi tusa lai, hanɗa a wala n’a na za gir na ɗa.

¹⁹Asakal par mu sitini wiini Farawon pai n’Egipte, gaiɗi ɗai na ahani, gaiɗi ɗai n’abakai, gaiɗi ɗai na pini paŋ lai,

²⁰mu sitiɗi wiini pinziba na gaini ɵihiɗi n’aha warɗi Egipte, wiiɗi paakai na midini afti na Us, wiiɗi paakai na midini afti na wiiɗi Filistrekai paŋ, wiiɗi ɗai na Askalon, wiiɗi Gaza, wiiɗi Ekron gaiɗi piɗi Asdod na a hina lai.

²¹Wiiɗi Edom, wiiɗi Mowab, wiiɗi Ammonitekai lai,

²²wiiɗi paakai na Tirus ɗa paŋ, wiiɗi paakai na Sidon ɗa paŋ, gaiɗi paakai na midini huuɗi n’anene duɓani yem-ra n’abai ɗa par.

²³wiini Dedan, wiini Tema, wiini Buz gaiɗi nagai paŋ na pini ɵimani gaini fiɗi edi ɗa.

²⁴Wiiɗi paakai na Arabiya paŋ, wiiɗi paakai na wiiɗi pinziba na gaini ɵihiɗi paŋ n’e simni edi warni basga na kaɗataŋ,

²⁵wiiɗi paakai na Zimri paŋ, wiiɗi paakai na Elam paŋ gaiɗi paakai na Medi paŋ lai,

²⁶gaiɗi paakai na war gal n’azumai sek ɗa paŋ, na gobi zaw na gai gai siɗi marɗi paŋ, wiiɗi aftiɗi paakai na midiɗi yai ɗa paŋ, pai na Sesak a ca ɗa asakalɗi nagai par lai.

²⁷Ku miɗiɗi ɓa: EPIƊ-ƊAI zi spak paŋ, Alaw na wiiɗi Izrayel a na muɗa maini nɵa: ci ciini, hûŋvi, kɵi azumai, fiki amai kir kai, Won hlai n’aga ki tili gaw na mu ɵinaŋsi midiki ɗa.

²⁸Na ɓa e diri e yimiti kup ɗa tuku par aŋ ci kai ɗa, ku miɗiɗi ɓa: EPIƊ-ƊAI zi spak paŋ a na muɗa maini nɵa: aga ki citi tetew.

²⁹Buri ɓa mu tika pa gaini gir na ɗa sini fuŋ n’abai n’e yiki yikiŋa miɗini ɗa par, tiki ki hiini ɓa aga mu za wala siki kai ɗi? Zaw kai, aga mu hiniki kai, buri ɓa aga mu hinasi gaw midiɗi ɗai na midini afti paŋ, a miɗi na sini EPIƊ-ƊAI zi Spak paŋ par.

³⁰Tuku aga ku miɗiɗi seŋ na wuze hanɗa paŋ, ku miɗiɗi ɓa: amai par EPIƊ-ƊAI a na nuuma, warni hlai zi simni na sɗik par wulani a na wasi, a na nuuma gaini gdaŋ sini afti na wiini, a ɗuula piɗi ɗai na midini aftiɗi ɗa paŋ maiɗi nagai n’e cipiɗi alini luwuŋ zi viŋ ɗa ɵa,

³¹Suura n’abai a waa haa edi war koŋni afti ta, ɓa seŋ a na arbani EPIƊ-ƊAI gaini pinzibaɗi ɗai, aga a yikiɗisi wuzaɗi Paramai zi sariya paŋ, ɗai na maafanai ɗa aga a siɗi edi mini kaɵkar, a miɗi na sini EPIƊ-ƊAI,

³²EPIƊ-ƊAI zi Spak paŋ a na muɗa maini nɵa: gir ɗa aga a hala midini afti ktai par midini na zamai, barawai na gdaŋ a na fakasi edi mini dibiɗi yai ɗa par.

³³War mefeŋ ni ɗa, nagai na EPIƊ-ƊAI aga a fiɗiɗi sini koŋɗi yai na ktai par haa sini na zamai ta ɗa, nagai ɗa ɗif aga a tûûwiiɗi kai, a iitpiɗi amai warni hlai ktai kai, aga e piɗi kaalai. Aga e bindi maini fulai na e pûkiŋ edi warni vuwai nɵa.

³⁴Zini yama zi tuwi, ɗûûli tiki ɗai zi giɗimi, bibili siki azumai, tiki tamaini fara, buri mefeŋ a cosi ya na ɗai aga e ɵiki wulaki, e ɵiriki edi lai. N'aga ki yiki azumai, ki kûkûɗi edi maini wala na caŋ gara nɵa.

³⁵Hlai na ɗai zi giɗimi e ŋûyi warni aŋ kai, hlai na tamaini fara e pri edi warni aŋ kaalai.

³⁶Ki ɵini ɗuuwal na miɗi ɗai zi giɗimi, gaini tuwi na wiiɗi tamaini fara ɗa, buri ɓa EPIƊ-ƊAI a na tuura na faraiɗi a suma woni ɗa.

³⁷Hlai na farai a suma woni na gaini futini ɗa a bunda liyik, burini suwar n’abai na wiini EPIƊ-ƊAI.

³⁸A hinasi hlaini zi simni edi maini gurnai na a hinasi waŋni edi nɵa; buri ɓa aftiɗi ɗa a bunda aŋ hlai na gaini tûûri edi tini suwar na wiini ɗif zi tûûri hlai ɗa, burini hiyni na abai ɗa lai.