Read Mousgoum Yeremiyas 26 Bible Online

Yeremiyas 26 - Mousgoum bible

Yeremiyas 26

¹Sarti na Yoyakim n’ahini Yoziyas pai na Yuda a fana warɗi pai agwiya ɗa, EPIƊ-ƊAI a miɗini seŋ wiini Yeremiyas, a miɗini ɓa:

²EPIƊ-ƊAI a na muɗa maini nɵa: Ɗiya warɗi pakatai na warni tempel na wiini EPIƊ-ƊAI, ku miɗiɗi wiiɗi nagai paŋ n’aga e hilisi warni fuŋ n’abakai na Yuda par aŋ hûrg i amlai warni tempel na wiini EPIƊ-ƊAI, ku miɗiɗi seŋ paŋ n’aga mu muɗuŋku ɓa ku miɗiŋɗi, ku tika edi warni par kai,

³ablaŋtaŋkai n’aga e ɵini ɗi, e hini payaiɗi na meefeŋ edi, nɵa aga mu hina meefeŋ na mu hiinaŋ aŋ zaŋ siɗi pini sdaɗi na meefeŋ ɗa.

⁴Ku miɗiɗi ɓa: EPIƊ-ƊAI a na muɗa maini nɵa: Na ɓa ki ɵini ma kai, ki zi pini gadaiŋa zi ɗû na mu siŋkiŋa kai,

⁵ki ɵini seŋ na wiiɗi ɗaiŋa ɗai na mini Alaw na mu na ɵiniɗiɗi kureɗ, na tiki ki ɵini miɗi kai ɗa,

⁶nɵa aga mu za sini tempel hanɗa maiɗi Silo ɗa nɵa, aga mu bunda fuŋ n’abai hanɗa aŋ wala zi tusa buriɗi pinziba na midini afti paŋ.

⁷Paakai zi ɓaka gaiɗi ɗai na mini Alaw gaiɗi ɗai paŋ e ɵini seŋ na Yeremiyas a na muɗaŋ ɗa amlai warni tempel na wiini EPIƊ-ƊAI.

⁸Won hlai na Yeremiyas a vada li gaini seŋ n’EPIƊ-ƊAI a miɗiŋni buri a miɗiŋɗi wiiɗi ɗai paŋ ɗa, paakai zi ɓaka lai, ɗai na mini Alaw lai gaiɗi ɗai paŋ e yimiŋ, e miɗini: girna ɗa a mriku.

⁹Haa ku muɗa seŋ na wuze war yikini EPIƊ-ƊAI ɓa, tempel hanɗa aga a bunda maiɗi Silo ɵa, fuŋ n’abai hanɗa aga a bunda aŋ greŋ, ɗai aga e simni warni kir kai lai ɗa, buri maɗa? Ɗai e hiri Yeremiyas amlai har, amlai warni tempel na wiini EPIƊ-ƊAI.

¹⁰Won hlai na ɗai n’abakai na Yuda e ɵini seŋ hanɗa, e hiliɗi ahani pai par amai mini tempel na wiini EPIƊ-ƊAI, e simni mini porte na HEHE na wiini tempel na wiini EPIƊ-ƊAI.

¹¹Nɵa, paakai zi ɓaka gaiɗi ɗai na mini Alaw e miɗiɗi wiiɗi ɗai n’abakai gaiɗi ɗai maini nɵa: ɗif hanɗa sai e fiɗiŋ edi, buri a muɗa seŋ na wuze sini fuŋ n’abai hanɗa, maini na ki ɵiniŋ gaini ɵimaki na ɗa ɵa.

¹²Yeremiyas a miɗiɗi wiiɗi n’abakai gaiɗi ɗai paŋ ɓa: a ɵinaŋasi aŋ muɗa seŋ na wuze sini tempel gaini fuŋ n’abai hanɗa maini na ki ɵiŋ na ɵa ɗa a EPIƊ-ƊAI.

¹³Tiyana ɗa, bindi paiyaiki na gaini sdaki ɗa, ɵini mini Epiɗ-ɗai Alaw na wiiki lai, EPIƊ-ƊAI aga a hina gir na a muɗa gaini ɓa aga a zaŋ siki ɗa.

¹⁴Amma Ta ɗa m’aŋ war tiki, ki zi sa maini na ki firiyiŋ ɵa, maini na a tala arki pɗem ɵa;

¹⁵Amma, ki yimiŋ midiki pɗem ɓa, na ɓa ki fiɗiŋa li ɗa, ki tiki midiki na ɗa a fel na wiini ɗif na tini war seŋ kai, tiki lai, fuŋ n’abai ɗa lai, ɗai na warni lai, buri EPIƊ-ƊAI a ɵinaŋasi siki jre jre aŋ miɗiki seŋ hanɗa.

¹⁶N'abakai gaiɗi ɗai e miɗiɗi wiiɗi paakai zi ɓaka gaiɗi ɗai na mini Alaw ɓa: ɗif hanɗa a fuɗa edi kai, buri a muɗumu ɗa war yikini Epiɗ-ɗai Alaw na wiimu.

¹⁷Zamai n’arbaɗi n’abakai n’arbaɗi ɗai na midini afti e miɗiɗi wiiɗi vokɗi ɗai ɓa:

¹⁸Mika na Moreset par na a naka aŋ ɗif na mini Alaw war sarti na wiini Ezekiyas pai na Yuda, a naka a muɗa wiiɗi ɗai na Yuda ɓa: EPIƊ-ƊAI zi spak paŋ a na muɗa maini nɵa: aga e hirmiti Siyon ɗa amai maini vuwai nɵa, Yeruzalem aga te bunda maini farani deeɓer nɵa, huwuŋ na tempel aŋ midini ɗa aga a bunda aŋ boŋor na a diya midini ɗa a evek.

¹⁹Ezekiyas pai na Yuda gaiɗi ɗai na Yuda paŋ ɗa e fiɗiŋ edi su ɗi? E sini hormo wiini EPIƊ-ƊAI, e piyi aŋ ɵiɗitini agulni azumai lai kai ɗi? Nɵa EPIƊ-ƊAI a hina gir na a muɗa ɓa aga a za siɗi ɗa mak lai kai ɗi, amma tumu ɗa, na ɓa mu fuɗumu ɗif hanɗa li ɗa, mu zumu na ɗa a meefeŋ n’abai sumu tumu dama.

²⁰Ɗif zamai ktai a naka aŋ ɗif na mini Alaw, na a muɗa seŋ na wuze war yikini EPIƊ-ƊAI, yikini ɓa Uriya ahini Semaya na war Kiriyat-Yeyarim par. A muɗa seŋ na wuze sini fuŋ n’abai hanɗa, sini afti hanɗa lai, seŋni ɗa maini na wiini Yeremiyas ɗa ɵa kal kal,

²¹pai Yoyakim gaiɗi gaŋgalaŋaini paŋ, gaiɗi ɗaini n’abakai ɗa paŋ e ɵini seŋ hanɗa, pai a payaŋ aŋ fuuɗaŋ edi. Hlai na Uriya a ɵina hanɗa, hunai te yimaŋ a pra edi a hala warɗi Egipte.

²²Pai Yoyakim a ɵina ɗai pini warɗi Egipte, Elnatan n’ahini Akbor gaiɗi ɗai zamai lai, e hili pini haa warɗi Egipte

²³E yimisi Uriya warɗi Egipte par, e kiŋnisi wiini pai Yoyakim a fuuɗaŋ edi gaini kaɵkar, a bula kopoŋni war n’e tipiɗi ɗai woni viya.

²⁴Amma Ahikam n’ahini Safan a ɵa tini midini Yeremiyas su, a hinaŋ aŋ sa war tiɗi ɗai aŋ fiɗi edi kai.