Read Mousgoum Yeremiyas 27 Bible Online

Yeremiyas 27 - Mousgoum bible

Yeremiyas 27

¹Sarti na Yoyakim n’ahini Yoziyas pai na Yuda a fana warɗi pai agwi ɗa, EPIƊ-ƊAI a muɗa seŋ wiini Yeremiyas, a miɗini ɓa:

²EPIƊ-ƊAI a na muɗa maini nɵa: paya sogom gaini luwuŋ n’e zi jug gaini, ku mulaŋ wulaku ca.

³Asakal par ku ɵiniŋni wiini pai na Edom, wiini pai na Mowab, wiini pai na wiiɗi Ammonitekai, wiini pai na Tirus gaini pai na Sidon ɗa lai, tiɗi ɵeŋ n’e hilisi a Yeruzalem sini Sedesiyas pai na Yuda ɗa.

⁴Ku miɗiɗi ɓa: e hili e miɗiɗi wiiɗi epingezakaiɗi ɓa: EPIƊ-ƊAI zi spak paŋ Alaw na wiiɗi Izrayel a na muɗa maini nɵa: aga ki miɗiɗi wiiɗi epingezakaiɗi maini nɵa:

⁵Mu ziti yai muta, mu ziɗi ɗai murɗakai muta gaini wazagai n’ezini puɗu puɗu na midiɗi yai ɗa paŋ lai, gaini gdaŋŋa gaini spakŋa, mu siti yai ɗa wiini a siya ɗi paŋ na mu daraŋ.

⁶Tiyana ɗa ta mu sini afti hanɗa paŋ war tini Nebugatnezar pai na babilon na ɗifŋa ɗa, wazagai na basga ɗa paŋ mu siŋni paŋ, kapai a ɵina pini.

⁷Pini zibaɗi ɗai paŋ aga e ɵini pini, pini ni gaini ahini gaini tiyni paŋ haa Won hlai na sarti na wiini afti a cosi na pinziba zi spak gaiɗi paakai n’abakai aga e ŋi midini.

⁸Na ɓa pinziba ktai, zaw afti na wiini pai ktai a ɵina pini Nebugatnezar pai na Babilon kai, na ɓa a yima wulani pini jug na wiini pai na Babilon kai ɗa aga mu siɗi mariyi gaini pinziba hanɗa, aga mu vidiɗi edi gaini gaw, zaw gaini wiyamai, ɵa kai ɗa gaini vlak lai a miɗi na sini EPIƊ-ƊAI par. Mu za haa pai na Babilon ɗa a vidiɗi edi tini.

⁹Tiki ɗa, ki ɵini seŋɗi ɗaiki na mini Alaw gaiɗi ɗaiki zi siɗi wuti, weseŋki zi pɵi, nagai n’e siɗi wala na wuze sini wazagai n’arbani hlai n’amai gaiɗi ɗaiki zi hila n’e miɗiki ɓa: tiki ɗa pai na Babilon aga a ŋa midiki kai" ɗa kai.

¹⁰Seŋ na wuze na e miɗiŋki na ɗa a eles meere, e zina ɓa kapai e siki arki edi gai gai sini aftiki par, kapai mu birgiki edi, kapai ki vidi edi.

¹¹Amma pinziba na a waa wuulani li pini jug na wiini pai na Babilon ɗa, a ɵina li pini lai ɗa, aga mu sini si n’amla midini aftini, a miɗi na sini EPIƊ-ƊAI par, kapai a hirma, a sumna woni lai.

¹²Mu miɗini wiini Sedesiyas pai na Yuda ɗa ɵa kal kal, mu miɗini ɓa, a waa wuulani pini jug na wiini pai na Babilon, a ɵina pini gaiɗi ɗaini lai kapai a sumna karni.

¹³Tuku gaiɗi ɗaiku ɗa, ki mri mini gaw, zaw miɗi wiyamai, zaw mini vlak lai maini n’EPIƊ-ƊAI a muɗaŋ sini pinziba n’a dara a ɵina pini pai na Babilon kai ɗa ɵa buri maɗa?

¹⁴Ki ɵini miɗi na ɗai na mini Alaw n’e miɗiki ɓa: pai na Babilon ɗa aga a ŋa midiki kai ɗa kai, buri seŋ na wuze na e miɗiŋki na ɗa a eles meere.

¹⁵Mu ɵiniɗiɗi kai, a miɗi na sini EPIƊ-ƊAI par, e miɗi war yikiŋa na ɗa a eles, ɓa kapai mu birgiki edi, mu vidiki edi tiki gaiɗi ɗai na mini Alaw n’e ɗa miɗiki seŋ na wuze.

¹⁶Mu miɗiɗi wiiɗi paakai zi ɓaka gaiɗi ɗai paŋ ɓa, EPIƊ-ƊAI a na muɗa maini nɵa: ki ɵini miɗi na ɗaiki na mini Alaw e ɗa miɗiŋki ɓa: wazagai n’amlai warni dalamni EPIƊ-ƊAI ɗa aga e wiyiŋsi a Babilon par gobi gobi, buri seŋ na wuze na e miɗiŋki na ɗa a eles meere

¹⁷Ki ɵini miɗi kai, ki ɵini pini pai na Babilon ɗa aga ki simni karki, fuŋ n’abai hanɗa a bunda aŋ greŋ meere buri maɗa?

¹⁸Na ɓa e ɗi ɗai na mini Alaw jre jre, na ɓa seŋ na wiini EPIƊ-ƊAI aŋ miɗi fakat fakat ɗa, e siiwi EPIƊ-ƊAI zi spak paŋ ɗa kapai wazagai n’a hina amlai warni dalam na wiini EPIƊ-ƊAI lai, n’aha war dalam na wiini pai na Yuda lai, na a Yeruzalem ɗa lai ɗa a hala warɗi Babilon kir kai.

¹⁹Buri EPIƊ-ƊAI zi spak paŋ a na muɗa midini gaarakai, midini daya, midini wala n’e tikiŋ midini, gaini wazagai zamai n’a hina ka aha warni fuŋ n’abai hanɗa,

²⁰na Nebugatnezar pai na Babilon a mulaŋ kai, sarti na a yima Yekoniya n’ahini Yoyakim pai na Yuda gaiɗi n’abakai na Yuda gaiɗi na Yeruzalem ɗa paŋ, a Yeruzalem par a kiɗi war Babilon.

²¹Buri EPIƊ-ƊAI zi spak paŋ Alaw na wiiɗi Izrayel a na muɗa sini wazagai na a hinasi aha warni dalam na wiini EPIƊ-ƊAI, ahani pai na Yuda, aha warɗi Yeruzalem lai maini nɵa:

²²wazagai hanɗa aga e libiŋ aha warɗi Babilon, a hina woni ɵa haa sini mefeŋ na mu wayasi li aŋ zna piɗi, a miɗi na sini EPIƊ-ƊAI par, sini mefeŋ n’aga mu miliɗisi edi woni par mu wiyiɗisi woni hlai hanɗa.